The Phnom Penh Post Search

Search form

Logo of Phnom Penh Post newspaper Phnom Penh Post - អាជ្ញាធរ​ខេត្ត​សៀមរាប ទទួល​ពលករ​មក​ពី​ប្រទេស​ថៃ តាម​ច្រក​អន្តរជាតិ​នានា​ចំនួន ៥១ នាក់ កាល​ពី​ម្សិលមិញ




អាជ្ញាធរ​ខេត្ត​សៀមរាប ទទួល​ពលករ​មក​ពី​ប្រទេស​ថៃ តាម​ច្រក​អន្តរជាតិ​នានា​ចំនួន ៥១ នាក់ កាល​ពី​ម្សិលមិញ

Content image - Phnom Penh Post
ពលករវិលត្រឡប់មកពីប្រទេសថៃ នាពេលថ្មីៗនេះ។ រូបថត ក្រសួងព័ត៌មាន

អាជ្ញាធរ​ខេត្ត​សៀមរាប ទទួល​ពលករ​មក​ពី​ប្រទេស​ថៃ តាម​ច្រក​អន្តរជាតិ​នានា​ចំនួន ៥១ នាក់ កាល​ពី​ម្សិលមិញ

សៀមរាប៖ អាជ្ញាធរ​ខេត្ត​សៀមរាប កាល​ពី​ម្សិលមិញ​នេះ បាន​ទទួល​ពលករ​មក​ពី​ប្រទេស​ថៃ​ តាម​ច្រក​អន្តរជាតិ​នានា​មក​កាន់​ខេត្ត​មាន​ចំនួន ៥១ នាក់ ខណៈ​ពលករ​នៅ​តែ​បន្ត​វិល​ចូល​ជា​រៀងរាល់​ថ្ងៃ ប៉ុន្តែ​មាន​ចំនួន​តិច​ជា​មុន។

លោក ស៊ុន ចំណាន អ្នក​នាំពាក្យ​រដ្ឋបាល​ខេត្ត​សៀមរាប​ប្រាប់ ភ្នំពេញ ប៉ុស្តិ៍ នៅ​ថ្ងៃទី ១២ ខែ មិថុនា ឆ្នាំ ២០២១ នេះ​ថា ប្រជាពលរដ្ឋ​ខ្មែរ​ទាំង ៥១ នាក់​នោះ បាន​ទៅ​បំពេញ​ការងារ​នៅ​ក្នុង​ប្រទេស​ថៃ។

លោក ស៊ុន ចំណាន បន្ត​ថា ជា​មួយ​គ្នា​នេះ រដ្ឋបាល​ខេត្ត​បាន​រៀបចំ​ក្រុម​ការងារ​ចំនួន ៣ ក្រុម សម្រាប់​ធ្វើ​ការ​សម្របសម្រួល​នៅ​តាម​ព្រំដែន រួម​មាន​ប៉ោយប៉ែត អូស្មាច់ និង​អូរបីជាន់​ជាដើម បន្ទាប់​ពី​ពលករ​ទាំង​នោះ​ត្រឡប់​មក​វិញ តាមរយៈ​ការ​ដឹក​ជញ្ជូន​តាម​រថយន្ត​ដែល​ត្រូវ​បាន​រៀបចំ​ជូន​ពួក​គាត់​ ដើម្បី​យក​មក​ធ្វើ​ចត្តាឡីស័ក​ចំនួន ៣ ទីតាំង។

បើ​តាម លោក ស៊ុន ចំណាន មក​ដល់​ពេល​នេះ ចំនួន​ពលករ​ដែល​មក​ពី​ប្រទេស​ថៃ ចូល​មក​កាន់​ខេត្ត​សៀមរាប ហាក់​មាន​ចំនួន​ថយ​ចុះ​ច្រើន​ជាង​លើក​មុន​ដោយសារ​តែ អាជ្ញាធរ​ថៃ​មាន​ការ​រឹត​បន្តឹង និង​មួយ​ទៀត គឺ​ពលរដ្ឋ​បាន​មក​កាល​ពី​លើក​មុន​មាន​ចំនួន​ច្រើន​ដង​រួច​មក​ហើយ។

លោក ស៊ុន ចំណាន ថ្លែង​ថា៖ «នៅ​ពេល​ដែល​គាត់​មក​ដល់ យើង​យក​ពួក​គាត់​ទៅ​ដាក់​នៅ​មណ្ឌល​ចត្តាឡីស័ក​ដែល​យើង​រៀប​រួច​ហើយ​ ដើម្បី​តាមដាន​សុខភាព​របស់​ពួក​គាត់​នៅ​ពេល​ចប់ ១៤ ថ្ងៃ​ហើយ អត់​មាន​អី​ទេ យើង​ឱ្យ​គាត់​ទៅ​ផ្ទះ​វិញ​ហើយ»។

បើ​តាម​របាយការណ៍​របស់​រដ្ឋបាល​ខេត្ត​សៀមរាប​បង្ហាញ​ថា ពលករ​ទាំង ៥១ នាក់ មាន​ស្រី ចំនួន ២៥ នាក់ ត្រូវ​បាន​ក្រុម​ការងារ​គ្រូពេទ្យ ប្រចាំ​ការ​តាម​ច្រក​ព្រំដែន​នីមួយៗ ពិនិត្យ​សុខភាព​បឋម ឃើញ​មាន​សុខភាព​ធម្មតា ហើយ​ត្រូវ​បាន​ធ្វើ​ការ​ដឹក​ជញ្ជូន​មក​ធ្វើ​ចត្តាឡីស័ក​នៅ​សៀមរាប​ក្នុង​ថ្ងៃ​នេះ​ទាំង​អស់​ហើយ។

ដោយ​ឡែក របាយការណ៍​របស់​រដ្ឋបាល​ខេត្ត​បាត់ដំបង​កាល​ពី​ថ្ងៃ​ម្សិលមិញ បាន​ទទួល​ពលករ​វិល​ត្រឡប់​ពី​ប្រទេស​ថៃ ចំនួន ៥ នាក់ និង​រក​ឃើញ​ឆ្លង​ជំងឺ​កូវីដ ១៩។

របាយការណ៍​ដដែល​បញ្ជាក់​ថា ចំពោះ​ពលករ​ដឹក​ចូល​ពី​ខេត្ត​ប៉ៃលិន បន្ទាយមានជ័យ ឧត្តរមានជ័យ ២៤ នាក់ ពលករ​ចូល​តាម​ច្រក​ក្នុង​ខេត្ត ១៤៨ នាក់ និង​ពាក់ព័ន្ធ​ព្រឹត្តិការណ៍ ២០ កុម្ភៈ ៣២ នាក់ ដូច្នេះ​ពលរដ្ឋ​ចូល​ក្នុង​មណ្ឌល​ចត្តាឡីស័ក​ថ្ងៃ​នេះ​សរុប ២០៤ នាក់៕

អត្ថបទគួរចាប់អារម្មណ៍