.jpg)
រថយន្តជាច្រើនគ្រឿងដែលបានចតចោលនៅលើចិញ្ចើមផ្លូវ និងទ្រូងផ្លូវសាធារណៈ ត្រូវបានអាជ្ញាធរខណ្ឌដូនពេញស្ទូចយកមករក្សាទុកនៅរដ្ឋបាលខណ្ឌ ក្រោយពីមិនអនុវត្តតាមសេចក្ដីជូនដំណឹង។
ភ្នំពេញៈ រថយន្តចំនួន ២៧ គ្រឿងដែលបានចតចោលនៅលើចិញ្ចើមផ្លូវ និងទ្រូងផ្លូវសាធារណៈធ្វើឱ្យបាត់បង់សណ្តាប់ធ្នាប់ របៀបរៀបរយសាធារណ:បង្កការកកស្ទះចរាចរណ៍ និងសោភណភាពរាជធានីភ្នំពេញត្រូវបានអាជ្ញាធរខណ្ឌដូនពេញស្ទូចយកមករក្សាទុកនៅរដ្ឋបាលខណ្ឌ ក្រោយពីមិនអនុវត្តតាមសេចក្ដីជូនដំណឹង។
លោក សុខ ពេញវុធ អភិបាលខណ្ឌដូនពេញបានឱ្យដឹងនៅថ្ងៃទី ១២ ខែមិថុនា នេះថា ការចុះស្ទូច និងដកហូតរថយន្តយកមករក្សាទុកនេះ បន្ទាប់ពីរដ្ឋបាលខណ្ឌបានចេញសេចក្តីជូនដំណឹងកាលពីថ្ងៃទី ៨ មិថុនា កន្លងមកនេះឱ្យបញ្ឈប់ការដាក់តាំងលក់រថយន្ត និងចតរថយន្តបែបនេះ ព្រោះធ្វើឱ្យប៉ះពាល់ដល់សណ្តាប់ធ្នាប់ និងរបៀបរៀបរយសាធារណៈ និងកកស្ទះចរាចរណ៍លើដងផ្លូវ។
បើតាម លោក សុខ ពេញវុធ ការចុះរៀបចំសណ្តាប់ធ្នាប់ របៀបរៀបរយ សាធារណៈលើរថយន្តដាក់លក់ និងរថយន្តដែលបានមកចតចោលនៅលើទ្រូងផ្លូវ និងចិញ្ចើមផ្លូវសាធារណៈ ដែលធ្វើឱ្យបាត់បង់សណ្តាប់ធ្នាប់ របៀបរៀបរយសាធារណ:បង្កការកកស្ទះចរាចរណ៍ និងសោភណ្ឌភាពរាជធានីភ្នំពេញនេះ គឺសមត្ថកិច្ចបានស្ទូច និងដកហូតរថយន្តដាក់លក់ (គួកជេ) ចំនួន ១៧ គ្រឿង រថយន្តសំចតសម្រាប់ជួលចំនួន ៥ គ្រឿង និងរថយន្តពលរដ្ឋចំនួន ៥ គ្រឿង។
លោក សុខ ពេញវុធ បានថ្លែងថា៖ «ដើម្បីធានាបាននូវប្រសិទ្ធភាពនៃការអនុវត្តនូវវិធានការរដ្ឋបាលនេះ កម្លាំងចម្រុះនឹងចុះអនុវត្តការងារនេះជាបន្តទៀត»។
កន្លងមក រដ្ឋបាលខណ្ឌដូនពេញបានចុះអនុវត្តការរៀបចំសណ្តាប់ធ្នាប់ និងរបៀបរៀបរយនៅលើទ្រូងផ្លូវ និងចិញ្ចើមផ្លូវសាធារណៈបានស្អាតជាប្រចាំ។ ប៉ុន្តែក្រោយពេលបញ្ចប់ការបិទខ្ទប់រាជធានីភ្នំពេញមក រដ្ឋបាលខណ្ឌបានសង្កេតឃើញមានបងប្អូនពលរដ្ឋមួយចំនួនតូចបានយករថយន្តមកដាក់តាំងលក់នៅលើទ្រូងផ្លូវ និងចិញ្ចើមផ្លូវសាធារណៈ ដែលធ្វើឱ្យបាត់បង់សោភណភាព សណ្តាប់ធ្នាប់ របៀបរៀបរយសាធារណៈ និងធ្វើឱ្យកកស្ទះចរាចរណ៍យ៉ាងខ្លាំង។
ដោយមើលឃើញ ដូច្នេះរដ្ឋបាលខណ្ឌដូនពេញកាលពីថ្ងៃទី ៨ ខែមិថុនាបានចេញសេចក្តីជូនដំណឹងមួយដោយបានដាក់ចេញជាគោលការណ៍មួយចំនួនក្នុងនោះទី ១- មិនអនុញ្ញាតឱ្យមានការដាក់តាំងលក់ និងចតរថយន្តគ្រប់ប្រភេទនៅលើទ្រូងផ្លូវ និងចិញ្ចើមផ្លូវសាធារណៈជាដាច់ខាតចាប់ពីពេលនេះតទៅ។ ទី ២- រដ្ឋបាលខណ្ឌដូនពេញទុករយៈពេល ៣ ថ្ងៃគិតចាប់ពីថ្ងៃជូនដំណឹងនេះរហូតដល់ថ្ងៃទី ១២ ខែមិថុនាឆ្នាំ ២០២១ ដើម្បីឱ្យម្ចាស់យករថយន្តចេញពីទីតាំងខាងលើនេះជាកំហិត និងទី ៣- ក្នុងករណីនៅតែមិនអនុវត្តតាមសេចក្តីជូនដំណឹងក៏ដូចជាការណែនាំនេះទេ រដ្ឋបាលខណ្ឌដូនពេញនឹងចុះអនុវត្តវិធានការរដ្ឋបាល ហើយរាល់ការខូចខាតបាត់បង់ទ្រព្យសម្បត្តិរបស់លោក-លោកស្រីគឺមិនទទួលខុសត្រូវឡើយ៕
