វ៉ាក់សាំងបង្ការជំងឺកូវីដ ១៩ ស៊ីណូហ្វាមចំនួន ១ លានដូសបន្ថែមទៀតត្រូវបានដឹកមកដល់ប្រទេសកម្ពុជាហើយនៅរសៀលថ្ងៃទី ១២ ខែ មិថុនានេះ ដែលនេះជាវ៉ាក់សាំងលើកទី ៧ ហើយពីសាធារណរដ្ឋប្រជាមានិតចិន ទាំងវ៉ាក់សាំងដែលរាជរដ្ឋាភិបាលកម្ពុជាបានបញ្ជាទិញ និងការផ្តល់ជាជំនួយសប្បុរសពីមិត្តចិន។
នៅក្នុងខែមិថុនានេះ វ៉ាក់សាំងប្រមាណ ៤,៥ លានដូសនឹងដឹកមកដល់ប្រទេសកម្ពុជា ដែលជាការជួយឱ្យកម្ពុជាមានវ៉ាក់សាំងគ្រប់គ្រាន់សម្រាប់ចាក់ជូនប្រជាពលរដ្ឋ។ លោកនាយករដ្ឋមន្ត្រី ហ៊ុន សែន មានគោលដៅចាក់វ៉ាក់សាំងការពារវីរុសកូវីដ ១៩ ទៅដល់ប្រជាពលរដ្ឋកម្ពុជាឱ្យបានយ៉ាងហោចណាស់ ៥ ទៅ ៦ លាននាក់មុនបំណាច់ឆ្នាំ ២០២១ នេះ។
ប្រទេសកម្ពុជា គិតមកដល់ថ្ងៃទី ១២ ខែមិថុនានេះ ទទួលបានវ៉ាក់សាំងបង្ការវីរុសកូវីដ ១៩ សរុបជាង ៨ លានដូសហើយ សម្រាប់ចាក់ជូនប្រជាពលរដ្ឋ ដែលភាគច្រើនជាវ៉ាក់សាំងរបស់សាធារណរដ្ឋប្រជាមានិតចិន។
លោក ហ៊ុន សែន បានលើកឡើងថា រាជរដ្ឋាភិបាលកម្ពុជាបានដាក់ចេញយុទ្ធសាស្ត្រចាក់វ៉ាក់សាំងនេះឱ្យបានលឿន តាមដែលអាចធ្វើទៅបានជូនដល់ប្រជាពលរដ្ឋរបស់ខ្លួន។ ទន្ទឹមនឹងនេះរាជរដ្ឋាភិបាលស្វះស្វែងរកវ៉ាក់សាំង ហើយបាននាំមកដល់នូវវ៉ាក់សាំងជាបន្តបន្ទាប់ សម្រាប់ចាក់ជូនប្រជាពលរដ្ឋរបស់ខ្លួន។
យោងតាមរបាយការណ៍របស់ក្រសួងសុខាភិបាលបានឱ្យដឹងថា គិតត្រឹមថ្ងៃទី ១១ ខែមិថុនា កម្ពុជាបានចាក់វ៉ាក់សាំងជូនប្រជាពលរដ្ឋទូទាំងប្រទេសបានចំនួនជាង ២,៨ លាននាក់ហើយ ឬស្មើនឹង ២៨,៣៦%៕