.jpg)
ម៉ូតូ២គ្រឿង កំពុងបើកកាត់ពីមុខក្រសួងប្រៃសនីយ៍ កាលពីថ្ងៃទី៨ខែមិថុនា ឆ្នាំ២០២១។ ហុង មិនា
ភ្នំពេញៈ ក្រសួងប្រៃសណីយ៍ និងទូរគមនាគមន៍ និងក្រសួងសុខាភិបាល បានច្រានចោលនិងថ្កោលទោសចំពោះការចុះផ្សាយរបស់សារព័ត៌មាន Asia Times ដែលមានមូលដ្ឋាននៅទីក្រុងហុងកុង ដែលបានចេញផ្សាយអត្ថបទថា ប្រទេសចិន គាបសង្កត់កម្ពុជា ដើម្បីទទួលបានទិន្នន័យឯកជនប្រជាពលរដ្ឋក្នុងការទប់ស្កាត់ជំងឺកូវីដ១៩។
យោងតាមសេចក្តីបំភ្លឺរបស់ក្រសួងប្រៃសណីយ៍ ចុះថ្ងៃទី១២ ខែមិថុនា បានឱ្យដឹងថា៖ «ក្រសួងប្រៃសណីយ៍ និងទូរគមនាគមន៍ និងក្រសួងសុខាភិបាល សូមច្រានចោលទាំងស្រុង នូវការប្រឌិតនិងបំផ្លើសព័ត៌មានមិនពិតនេះ ដែលបំពុលសង្គមនិងមតិសាធារណៈ ព្រមទាំងញុះញង់ ក្នុងគោលបំណងរារាំងការចូលរួមរបស់ប្រជាពលរដ្ឋ ក្នុងការអនុវត្តវិធានការ របស់រាជរដ្ឋាភិបាល ក្នុងការទប់ស្កាត់ការឆ្លងរាលដាលនៃជំងឺកូវីដ១៩ នៅក្នុងព្រះរាជាណាចក្រកម្ពុជា»។
កាលពីថ្ងៃទី១០ ខែមិថុនា Asia Times បានចុះផ្សាយអត្ថបទដោយដាក់ចំណងជើងថា«ចិនគាបសង្កត់កម្ពុជា ដើម្បីទទួលបានទិន្នន័យ ក្នុងប្រព័ន្ធទប់ស្កាត់កូវីដ» និងបានលើកឡើងថា ប្រទេសចិន ស្វះស្វែងស្នើសុំទិន្នន័យ អំពីការស្រាវជ្រាវរកអ្នកពាក់ព័ន្ធជំងឺកូវីដ១៩(Contact tracing) របស់ប្រទេសកម្ពុជាក្នុងហេតុផលទំនងជាធ្វើចារកម្ម ជាជាងការគ្រប់គ្រងជំងឺ។
ក្រោយព្រឹត្តិការណ៍សហគមន៍ ២០ កុម្ភៈ រដ្ឋាភិបាលបានដាក់ឱ្យដំណើរការប្រព័ន្ធ QRCode «ទប់ស្កាត់កូវីដ Stop Covid» ក្នុងគោលបំណងទប់ស្កាត់ការរីករាលដាលជំងឺកូវីដ១៩ នៅកម្ពុជា។
Asia Times បានរាយការណ៍ថា នៅក្នុងរបាយការណ៍ អង្គការឃ្លាំមើលសិទ្ធិមនុស្ស របស់សហរដ្ឋអាមេរិក (HRW)កាលពីថ្ងៃទី ៦ ខែមេសា បាននិយាយថា ប្រព័ន្ធនេះ ធ្វើឱ្យមានការព្រួយបារម្ភធ្ងន់ធ្ងរអំពីភាពឯកជន ការច្រៀតជ្រែកចូលទិន្នន័យហួសហេតុ និងការតាមដានប្រជាពលរដ្ឋហើយវានឹងធ្វើឱ្យអ្នករិះគន់រដ្ឋាភិបាល និងសកម្មជនមានហានិភ័យកាន់តែខ្លាំង។
Asia Timesបានចុះផ្សាយថា៖ «យោងតាមប្រភពព័ត៌មាន ដែលផ្តល់ជូនតាមការស្នើសុំបានឱ្យដឹងថាភ្លាមៗបន្ទាប់ពីការប្រកាសដាក់ឱ្យដំណើរការជាផ្លូវការ នូវប្រព័ន្ធនេះលោក WangWentian ឯកអគ្គរដ្ឋទូតចិន ប្រចាំទីក្រុងភ្នំពេញ បានជួបជាមួយមន្រ្តីកម្ពុជា និងស្នើសុំទិន្នន័យឯកជន ប្រជាពលរដ្ឋដែលប្រមូលបានតាមរយៈប្រព័ន្ធថ្មីនេះ»។
សេចក្តីបំភ្លឺបញ្ជាក់ថា៖ «ក្រសួងប្រៃសណីយ៍និងទូរគមនាគមន៍ និងក្រសួងសុខាភិបាលសូមបដិសេធថារហូតមកដល់ពេលនេះ ក្រសួងទាំងពីរ មិនធ្លាប់ជួបឬទទួលសំណើ សុំយកទិន្នន័យក្នុងប្រព័ន្ធ QR Code ពីសំណាក់ឯកឧត្តមឯកអគ្គរដ្ឋទូតចិននោះទេ។ នេះគឺជាការមួលបង្កាច់ ប្រឌិតរឿង និងបំផ្លើសការពិតទាំងស្រុង»។
សេចក្តីបំភ្លឺបន្ថែមថា៖ «ក្រសួងប្រៃសណីយ៍និងទូរគមនាគមន៍ និងក្រសួងសុខាភិបាលប្រកាសច្រានចោលទាំងស្រុងនូវព័ត៌មានប្រឌិតនេះ និងសូមថ្កោលទោសដល់ជនមួយចំនួនដែលប្រឌិតព័ត៌មានមិនពិត»។
សេចក្តីបំភ្លឺបន្តថា ការផ្សព្វផ្សាយអត្ថបទនេះ មានគោលបំណងប្រែក្លាយការខិតខំប្រឹងប្រែង ប្រយុទ្ធប្រឆាំងនឹងការរីករាលដាល នៃជំងឺកូវីដ១៩ របស់រាជរដ្ឋាភិបាលឱ្យទៅជាបញ្ហានយោបាយ ដើម្បីតែផលប្រយោជន៍របស់ក្រុមខ្លួន ដោយពុំគិតអំពីអាយុជីវិតនិងស្ថានភាពនៃការរាតត្បាតជំងឺកូវីដ១៩ មកលើប្រជាពលរដ្ឋកម្ពុជា និងពលរដ្ឋបរទេសដែលកំពុងរស់នៅក្នុងប្រទេសកម្ពុជា។
សេចក្តីបំភ្លឺដដែលបញ្ជាក់ថា ប្រព័ន្ធ QRCode «ទប់ស្កាត់កូវីដ Stop Covid»នេះ មិនមែនត្រូវបានប្រើប្រាស់តែនៅកម្ពុជានោះទេ គឺមានប្រើប្រាស់នៅក្នុងប្រទេសជាច្រើន ក្នុងតំបន់និងពិភពលោកក្នុងពេលជំងឺនេះកំពុងរីករាលដាល។
ប្រព័ន្ធ QR Code នេះកត់ត្រាលេខទូរស័ព្ទតែមួយគត់ ដោយមិនប្រមូលទិន្នន័យឯកជនផ្ទាល់ខ្លួនឬគន្លងធ្វើដំណើររបស់អ្នកប្រើប្រាស់នោះទេ។
ការដាក់ឱ្យប្រើប្រាស់ប្រព័ន្ធ QR Code នេះ មានគោលបំណងការពារសុខភាព ប្រជាពលរដ្ឋ នៅពេលមានជំងឺរីករាលដាលជាសកល ដូចមានចែងក្នុងរដ្ឋធម្មនុញ្ញកម្ពុជា និងកតិកាសញ្ញាអន្តរជាតិ ស្តីពីសិទ្ធិសេដ្ឋកិច្ចសង្គមកិច្ចនិងវប្បធម៌ (ICESCR) ព្រមទាំងច្បាប់និងលិខិតបទដ្ឋានគតិយុត្តជាធរមាន។
បើយោងតាមសេចក្តីបំភ្លឺនេះ ក្រសួងប្រៃសណីយ៍ មានសមត្ថភាពគ្រប់គ្រាន់ក្នុងការអភិវឌ្ឍនិងគ្រប់គ្រងប្រព័ន្ធ QR Code នេះ ដោយខ្លួនឯង ស្របតាមស្តង់ដារបច្ចេកទេសអន្តរជាតិ។ ជាក់ស្តែងក្រសួងស្ថាប័នរដ្ឋស្ថានទូត ក្រុមហ៊ុនអង្គការជាតិ និងអន្តរជាតិ និងម្ចាស់ទីតាំងនានា បានលើកទឹកចិត្ត ដល់ប្រជាពលរដ្ឋនិងបុគ្គលិករបស់ខ្លួន ឱ្យប្រើប្រាស់ប្រព័ន្ធនេះ ដើម្បីចូលរួមជាមួយរាជរដ្ឋាភិបាល ក្នុងការការពារសុវត្ថិភាពផ្ទាល់ខ្លួន សុខុមាលភាពសាធារណៈ និងទប់ស្កាត់ការរីករាលដាលនៃជំងឺកូវីដ១៩។
មន្ត្រីក្រសួងប្រៃសណីយ៍ និងទូរគមនាគមន៍ម្នាក់ ដែលសុំមិនបញ្ចេញឈ្មោះ បានប្រាប់ភ្នំពេញប៉ុស្តិ៍នៅថ្ងៃទី១៣ ខែមិថុនាថា ការចុះផ្សាយព័ត៌មាននេះ គឺជាកាប្រឌិតឡើង ក្នុងចេតនាជាលក្ខណៈនយោបាយជាជាងជួយជំរុញឱ្យប្រព័ន្ធ QR Code នេះប្រសើរឡើង។
លោកថ្លែងថា៖«វាជាការសោកស្តាយណាស់ ដែលកាសែតអន្តរជាតិមួយ គាត់រៀបចំធ្វើបែបនេះ។ យើងរៀបចំឱ្យមានប្រព័ន្ធនេះ គឺដើម្បីធ្វើយ៉ាងណា ឱ្យការឆ្លងហ្នឹងវាកាត់បន្ថយ ព្រោះអីកាលណាយើងមានពាក់ព័ន្ធជាមួយនឹងអ្នកដែលគាត់អាចមានហានិភ័យអ៊ីចឹង គឺអ្នកដែលចូលទីតាំងហ្នឹងនៅក្នុងពេលវេលាជាមួយគ្នាហ្នឹង គឺគាត់អាចត្រូវបានជូនដំណឹង។ អ៊ីចឹងឱ្យគាត់ការពារខ្លួនអី ។ល។ និង។ល។»។
លោក បន្តថា ប្រព័ន្ធនេះ គឺដើម្បីទប់ស្កាត់ការឆ្លងជំងឺកូវីដ១៩ មិនឱ្យរីករាលដាលបន្ថែមទៀត ហើយសំខាន់បំផុត ការពារអាយុជីវិត និងសុខុមាលភាពរបស់ប្រជាពលរដ្ឋ។
លោកថ្លែងថា៖«យើងព្យាយាមធ្វើការងារនេះ ដើម្បីជួយដល់ប្រទេសជាតិយើង ជួយដល់សង្គមជាតិហើយសំខាន់នោះ គឺយើងទប់ស្កាត់ការឆ្លង ហើយបែរជាគាត់យកការងារនេះ ធ្វើជាបំភ្លៃការពិត។ យើងពិតជាសោកស្តាយ ហើយថ្កោលទោសចំពោះបុគ្គលដែលគាត់ប្រឌិតរឿងនេះឡើងឱ្យទៅជាបញ្ហាទៅវិញ»៕
