បន្ទាយមានជ័យៈតុលាការខេត្តបន្ទាយមានជ័យឃុំខ្លួនបុរសវ័យចំណាស់ម្នាក់ក្នុងពន្ធនាគារខេត្តកាលពីថ្ងៃទី១២ មិថុនា ១ថ្ងៃបន្ទាប់ពីនគរបាលចាប់ខ្លួននៅឃុំចង្ហា ស្រុកអូរជ្រៅ ខេត្តបន្ទាយមានជ័យ ពាក់ព័ន្ធករណីល្បួងក្មេងស្រីម្នាក់អាយុ ១៤ ឆ្នាំ រំលោភសេពសន្ថវៈបានសម្រេច៣ដង ខណៈមន្ត្រីអង្គការសង្គមស៊ីវិលថាករណីនេះភាគច្រើនកើតឡើងលើគ្រួសារក្រីក្រ នៅក្នុងតំបន់ដាច់ស្រយាល។
លោកស្រីឧត្តមសេនីយ៍ត្រី ឌី សុជាតិ ស្នងការរងទទួលផែនការងារប្រឆាំងការជួញដូរមនុស្សនិងការពារអនីតិជននៃស្នងការដ្ឋាននគរបាលខេត្តបន្ទាយមានជ័យប្រាប់ ភ្នំពេញ ប៉ុស្តិ៍ នៅថ្ងៃទី ១៣ មិថុនានេះថា លោកស្រីបានទទួលដីកាពីតុលាការបញ្ជាក់ថា ក្មេងស្រីរងគ្រោះឈ្មោះ ត. រ .អាយុ១៤ឆ្នាំ។ រី
ឯជនត្រូវចោទ ឈ្មោះ ឆុត ឆាន់ ហៅ ពៅ អាយុ៧៨ឆ្នាំ រស់នៅឃុំ ចង្ហា ស្រុកអូរជ្រៅ ត្រូវបានចៅក្រមស៊ើបសួរសម្រេចចេញដីកាឃុំខ្លួនក្នុងពន្ធនាគារហើយកាលពីថ្ងៃទី១២ មិថុនា បន្ទាប់ពីសមត្ថកិច្ចរបស់លោកស្រីបញ្ជូនដល់តុលាការបានប៉ុន្មានម៉ោងរួចមក។
លោកស្រីថ្លែងថា៖ «បុរសចំណាស់ម្នាក់នេះត្រូវបានលោក ព្រុំ ម៉ូនីន ជាចៅក្រមស៊ើបសួរសម្រេចចេញដីកាឃុំខ្លួនដោយចោទពីបទរំលោភសេពសន្ថវៈទាក់ទងនឹងជនរងគ្រោះតាមបញ្ញត្តិមាត្រា២៤១នៃក្រមព្រហ្មទណ្ឌ»។
យោងបញ្ញត្តិមាត្រា២៤១នៃក្រមព្រហ្មទណ្ឌនេះ ប្រសិនបើតុលាការរកឃើញថាជនត្រូវចោទពិតជាបានប្រព្រឹត្តមែននោះនឹងត្រូវប្រឈមការជាប់ពន្ធនាគារពី៧ ទៅ១៥ឆ្នាំ។
ទាក់ទងនឹងករណីនេះដែរ លោក ព្រឿង សុភាព នាយនគរបាលប៉ុស្តិ៍រដ្ឋបាលឃុំចង្ហា បានឱ្យដឹងនៅថ្ងៃទី១៣ មិថុនានេះថា បើតាមការរៀបរាប់ប្រាប់របស់ក្មេងស្រីរងគ្រោះគឺជនសង្ស័យជាអ្នករស់នៅក្នុងភូមិជាមួយនាង ហើយមានផ្ទះនៅជិតគ្នាទៀតផង។មុនកើតហេតុគឺជារៀងរាល់ថ្ងៃ នាងតែងតែទៅលេងផ្ទះឈ្មោះ ឆុត ឆាន់ ហើយជនម្នាក់នេះមិនទាន់ហ៊ានធ្វើអ្វីផ្តេសផ្តាសទៅលើនាងទេ ប៉ុន្តែជននេះឧស្សាហ៍ឱ្យលុយក្មេងរងគ្រោះចាយម្តងម្កាល។
លោកបន្តថា ក្រោយៗមកទៀត ជននេះបានឱ្យលុយក្មេងរងគ្រោះចំនួន២ទៅ៣ម៉ឺនរៀល ហើយក៏ចាប់នាងរំលោភនៅអំឡុងខែឧសភា ឆ្នាំ២០២១ បានសម្រេចរហូត៣លើក។ប៉ុន្តែនៅថ្ងៃទី១១ មិថុនា ដោយសារក្មេងស្រីរងគ្រោះមានអាការមិនស្រួលខ្លួន ពេលនោះយាយរបស់នាងក៏ហៅសួរទើបដឹងរឿងនេះ ហើយបាននាំក្មេងរងគ្រោះមកប្តឹងនៅប៉ុស្តិ៍នគរបាលរបស់លោកតែម្តង។
លោកបន្ថែមថា ក្រោយទទួលបានបណ្តឹងនិងទទួលបានចម្លើយពីក្មេងរងគ្រោះរួចមក សមត្ថកិច្ចរបស់លោកក៏ហៅឈ្មោះ ឆុត ឆាន់ មកសាកសួរនៅប៉ុស្តិ៍នគរបាលឃុំចង្ហា។ប៉ុន្តែពីដំបូងជននេះប្រកែក តែក្រោយមកទើបបានសារភាពថាគាត់បានឱ្យលុយ និងល្បួងក្មេងរងគ្រោះរំលោភបាន៣លើក ពិតប្រាកដមែន។
លោកបានបញ្ជាក់ថា៖«មុននឹងឃាត់ខ្លួនជននេះខ្ញុំបានផ្ទៀងផ្ទាត់ចម្លើយទាំងសងខាងឃើញថាទាំងជនរងគ្រោះនិងជនល្មើសឆ្លើយស៊ីចង្វាក់គ្នាទើបយើងសម្រេចឃាត់ខ្លួនគាត់តែម្តង»។
ដោយឡែកលោក ង៉ាប់ ងាម មេភូមិដែលក្មេងរងគ្រោះរស់នៅបានរៀបរាប់ប្រាប់ភ្នំពេញប៉ុស្តិ៍ថាតាចាស់ម្នាក់នោះជាអតីតទាហានប៉ារ៉ា ហើយមានកូនស្រី២នាក់ ប៉ុន្តែកូនៗរបស់គាត់មានប្តីអស់ហើយ។ចំណេកម្តាយឪពុកក្មេងរងគ្រោះជាគ្រួសារក្រីក្រហើយនាងជាកូនច្បងក្នុងចំណោមបងប្អូន៣នាក់។ប៉ុន្តែឪពុកម្តាយរបស់នាងបានធ្វើចំណាកស្រុកទៅប្រទេសថៃដោយទុកតែនាងម្នាក់ឱ្យរស់នៅក្នុងខ្ទមជាមួយជីដូនចាស់អាយុ៧៤ឆ្នាំ តែ២នាក់ជីដូនចៅប៉ុណ្ណោះ។
លោកបន្តថា៖«ប្រហែលមកពីជីដូនមានវ័យចាស់គ្មានអ្នកមើលថែត្រឹមត្រូវទើបរងគ្រោះជួបបញ្ហាបែបនេះ ប៉ុន្តែកន្លងមកនៅក្នុងភូមិរបស់ខ្ញុំក៏មិនដែលកើតមានរឿងបែបនេះដែរ»។
លោកស្រី ម៉ៅ ម៉ាប់ មន្ត្រីសមាគមការពារសិទ្ធិមនុស្សអាដហុកដែលធ្វើការផ្នែកកុមារបានឱ្យដឹងនៅថ្ងៃទី១៣ មិថុនានេះថា តាមការអង្កេតឃើញថា ករណីរំលោភសេពសន្ថវៈបែបនេះគឺភាគច្រើនដោយសារកត្តាជីវភាពគ្រួសាររបស់ក្មេងរងគ្រោះក្រីក្រហើយច្រើនតែកើតឡើងនៅតំបន់ដាច់ស្រយាល។រីឯក្មេងៗដែលជួបប្រទះបញ្ហានេះដោយសារឪពុកម្តាយធ្វើចំណាកស្រុកទៅធ្វើការនៅក្រៅប្រទេស។
លោកស្រីបានបញ្ជាក់ថា៖«ពួកគាត់ទុកកូនៗឱ្យជីដូនឬជីតាមើលថែរក្សាជំនួស។ដូច្នេះក្មេងទាំងនោះមិនបានទទួលការការពារខ្លួនឱ្យពេញលេញទេ ក្មេងៗរងគ្រោះកម្រនិយាយរឿងរ៉ាវនេះប្រាប់មនុស្សចាស់ណាស់ ទាល់តែឈឺ ឬមានបញ្ហាមិនស្រួលខ្លួនទើបមនុស្សចាស់ដឹង»៕