ភ្នំពេញៈ ក្រសួងសាធារណការ និងដឹកជញ្ជូន ពិភាក្សា និងពិនិត្យកែសម្រួល សេចក្តីព្រាងអនុក្រឹត្យស្តីពីការគ្រប់គ្រងលើការប្រើប្រាស់ដីចំណីផ្លូវ នៅតាមបណ្តាញផ្លូវថ្នល់ និងផ្លូវរថភ្លើង ដោយដាក់បន្ថែមការគ្រប់គ្រងដីចំណីផ្លូវនៅទីជនបទ ដោយបានបង្កើតគណៈកម្មការអន្តរក្រសួង ដើម្បីដាក់ស្នើទៅថ្នាក់ដឹកនាំ ពិនិត្យសម្រេច និងពន្លឿនសេចក្តីព្រាងអនុក្រឹត្យនេះឱ្យបានឆាប់រហ័ស។
កាលពីថ្ងៃទី ១១ ខែមិថុនា ក្រសួងសាធារណការ និងដឹកជញ្ជូន បានបើកកិច្ចប្រជុំមួយ ដើម្បីពិនិត្យមើលវឌ្ឍនភាពនៃការកែសម្រួលសេចក្តីព្រាងអនុក្រឹត្យ ស្តីពីការគ្រប់គ្រងលើការប្រើប្រាស់ដីចំណីផ្លូវ នៅតាមបណ្តាញផ្លូវថ្នល់ និងផ្លូវរថភ្លើង ដោយមានការចូលរួមពីថ្នាក់ដឹកនាំក្រសួង មន្ត្រីជំនាញបច្ចេកទេស តាមរយៈប្រព័ន្ធវីដេអូពីចម្ងាយ។
ទំព័រហ្វេសប៊ុករបស់ក្រសួងសាធារណការ និងដឹកជញ្ចូន បានឲ្យដឹងថា កិច្ចប្រជុំនេះ បានពិភាក្សាអំពីវឌ្ឍនភាពនៃការកែសម្រួលសេចក្តីព្រាងអនុក្រឹត្យនេះ ដោយការរៀបចំសមាសភាព គណៈកម្មការអន្តរក្រសួង ដើម្បីដាក់ស្នើទៅថ្នាក់ដឹកនាំ ពិនិត្យសម្រេចការរៀបចំសេចក្តីព្រាង អនុក្រឹត្យនេះ ឱ្យបានឆាប់តាមដែលអាចធ្វើទៅបាន ។
ក្រសួង បានបញ្ជាក់ថា៖«អនុក្រឹត្យនេះ មានគោលបំណងធ្វើឱ្យប្រសើរឡើង ដល់ការគ្រប់គ្រងលើការប្រើប្រាស់ដីចំណីផ្លូវនៅតាមបណ្ដាញផ្លូវល្បឿនលឿន ផ្លូវជាតិ ផ្លូវខេត្ត ផ្លូវជនបទ និងផ្លូវរថភ្លើង ប្រកបដោយសុវត្ថិភាព ប្រសិទ្ធភាពសម្រាប់បម្រើឱ្យការអភិវឌ្ឍវិស័យហេដ្ឋារចនាសម្ព័ន្ធរូបវន្ត សំដៅធានានូវនិរន្តរភាព និងជីវភាពរបស់ប្រជាពលរដ្ឋ ស្របតាមការអភិវឌ្ឍ និងការរីកចម្រើនរបស់កម្ពុជា»។
យោងតាមច្បាប់ស្តីពីផ្លូវថ្នល់ ដែលព្រះមហាក្សត្រប្រកាសឲ្យប្រើកាលពីឆ្នាំ ២០១៤ បានចែងថា រាល់ការសាងសង់លើដីសម្រាប់អភិវឌ្ឍហេដ្ឋារចនាសម្ព័ន្ធផ្លូវថ្នល់ ជាពិសេសលើដីចំណីផ្លូវជាលក្ខណៈអចិន្ត្រៃយ៍ ត្រូវបានហាមឃាត់ លើកលែងតែការសាងសង់ក្នុងគម្រោងចាំបាច់មួយចំនួនដូចជា បរិក្ខារបម្រើឲ្យវិស័យការពារជាតិ សន្តិសុខជាតិ បរិក្ខារបម្រើឲ្យការគ្រប់គ្រង ឬការសាងសង់ផ្លូវនិងបរិក្ខារ សំណង់សេវាសាធារណៈផ្សេងៗទៀត ដែលត្រូវស្នើសុំការឯកភាពជាគោលការណ៍ ពីរាជរដ្ឋាភិបាល តាមសំណើរបស់សមត្ថកិច្ចគ្រប់គ្រងផ្លូវថ្នល់។
ជាមួយនឹងការហាមប្រាមនេះ ច្បាប់នេះ ក៏បានចែងទៀតថា ដីចំណីផ្លូវ អាចប្រើប្រាស់បានសម្រាប់គោលបំណងផ្សេងៗ ជាលក្ខណៈបណ្តោះអាសន្ន ដោយ មិនត្រូវធ្វើប៉ះពាល់ដល់បរិក្ខារ និងសំណង់ផ្សេងៗសម្រាប់សុវត្ថិភាពចរាចរណ៍ផ្លូវថ្នល់ឡើយ។ ការគ្រប់គ្រងលើការប្រើប្រាស់ដីចំណីផ្លូវ នៅតាមបណ្ដាញផ្លូវថ្នល់ត្រូវកំណត់ដោយអនុក្រឹត្យ ។
លោក លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន ដែលបានដឹកនាំការប្រជុំពិភាក្សាកែសម្រួលអនុក្រឹត្យនេះ បានប្រាប់ភ្នំពេញប៉ុស្តិ៍នៅថ្ងៃទី ១៣ មិថុនាថា អនុក្រឹត្យស្តីពីការគ្រប់គ្រងលើការប្រើប្រាស់ដីចំណីផ្លូវនៅតាមបណ្តាញផ្លូវថ្នល់ និងផ្លូវរថភ្លើង ត្រូវបានប្រកាសឲ្យប្រើប្រាស់កាលពីឆ្នាំ ២០០៩ ។
លោកបន្តថា កិច្ចប្រជុំនេះ គឺការចាប់ផ្តើមការប្រមូលធាតុចូលនានា ដើម្បីធ្វើការកែប្រែអនុក្រឹត្យនេះ ឲ្យអាចអនុវត្តបានទូលំទូលាយ និងគ្រប់គ្រងលើការប្រើប្រាស់ដីចំណីផ្លូវទាំងអស់។
លោក បញ្ជាក់ថា៖«យើងប្រជុំគ្នា ដើម្បីបានជាមូលដ្ឋាន ដោយឲ្យគ្រប់គ្នា ផ្តល់មតិយោបល់ សម្រាប់ធ្វើការបូកសរុបជាក្រោយ ក្នុងការកែសម្រួលអនុក្រឹត្យនេះ។ កន្លងទៅ យើងមានអនុក្រឹត្យនេះហើយ ប៉ុន្តែយើងត្រូវកែសម្រួលវាខ្លះ ដោយរាប់បញ្ចូលទាំងចំណីផ្លូវនៅទីជនបទអីទាំងអស់ ដែលពីមុនអនុក្រឹត្យនេះ មិនមានបញ្ជាក់នោះទេ»។
ស្ថិតក្នុងដំណាក់កាលនេះ លោក លឹម ស៊ីដេនីន ក៏បានជំរុញលើកទឹកចិត្ត ឱ្យភាគីពាក់ព័ន្ធទូទាំងរាជធានី -ខេត្ត បញ្ចូនធាតុចូលបន្ថែមឱ្យបានល្អិតល្អន់ ដើម្បីជំរុញឱ្យការរៀបចំកែសម្រួលសេចក្ដីព្រាងអនុក្រឹត្យនេះ មានលក្ខណៈគ្រប់ជ្រុងជ្រោយ និងអាចបញ្ចប់តាមការគ្រោងទុក។
លោក គង់ សុវណ្ណ អ្នកជំនាញសុខភាពសាធារណៈ និងជានាយកកម្មវិធីមូលនិធិ សុវត្ថិភាពអន្តរជាតិ បានថ្លែងនៅថ្ងៃទី ១៣ មិថុនាថា នៅពេលដែលមានច្បាប់ នោះជាការពិតណាស់ បទដ្ឋានគតិយុត្ត ក្រោមច្បាប់ត្រូវរៀបចំគាំទ្រដល់ការអនុវត្តច្បាប់ឱ្យមានប្រសិទ្ធភាព និងតម្លាភាពបំផុត។
លោក យល់ថា មុនការអនុវត្តរឹតបន្តឹងច្បាប់ ចាំបាច់ត្រូវមានការអប់រំផ្សព្វផ្សាយ ឱ្យបានទូលំទូលាយ ឧទាហរណ៍ អប់រំផ្សព្វផ្សាយចន្លោះពី ៣ ឬ ៦ខែ ដល់មន្ត្រីអនុវត្តច្បាប់ និងអ្នកដែលកំពុងប្រើប្រាស់ចំណីផ្លូវ ដែលលោកយល់ថា ការកែប្រែនៃអនុក្រឹត្យនេះ គឺចាំបាច់សិក្សាឲ្យបានគ្រប់ជ្រុងជ្រោយ។
លោក បញ្ជាក់ថា៖«ក្នុងស្ថានភាពជាក់ស្តែងខ្លះ យន្តការដំណោះស្រាយសមស្របត្រូវយកមកអនុវត្តឱ្យដល់ទីបំផុត មុនឈានដល់យន្តការដាក់ពិន័យ ឬទោសទ័ណ្ឌ។ អ្វីដែលសំខាន់ត្រូវឈរលើឆន្ទ: និងបណ្តុះគោលជំហរប្រយោជន៍សាធារណជាចម្បង»៕
វីដេអូ៖