ភ្នំពេញៈ តុលាការខេត្តបាត់ដំបង កាលពីថ្ងៃទី ១២ មិថុនា បានសម្រេចឃុំខ្លួនបុរសម្នាក់ក្នុងពន្ធនាគារខេត្តបន្ទាប់ពីចាប់ខ្លួនបាន ១ ថ្ងៃ ពាក់ព័ន្ធគ្រឿងញៀនមេតំហ្វេតាមីនជាង ១ គីឡូក្រាម ដែលជនសង្ស័យបានទៅយកពីក្រុមហ៊ុនផ្ញើឥវ៉ាន់មួយ ផ្ញើពីប្រទេសថៃ មកខេត្តបាត់ដំបង ដែលស្ថិត នៅភូមិដូង ឃុំបឹងរាំង ស្រុកកំរៀង។
លោក សូ ឌី ប្រធានមន្ទីរយុត្តិធម៌ នៃបញ្ជាការដ្ឋានកងរាជអាវុធហត្ថខេត្តបាត់ដំបង ឱ្យភ្នំពេញប៉ុស្តិ៍ដឹងនៅថ្ងៃទី១៣មិថុនាថា បើតាមលោកទទួលដីកាបាន ពីតុលាការខេត្តបាត់ដំបងបញ្ជាក់ថា ជនត្រូវចោទឈ្មោះ យឿន ជឿន ភេទ ប្រុស អាយុ ៣៦ឆ្នាំ រស់នៅភូមិស្វាយ ឃុំបឹងរាំង ស្រុកកំរៀង ខេត្តបាត់ដំបង ត្រូវបានតុលាការឃុំខ្លួនហើយកាលពីរសៀលថ្ងៃទី ១២ មិថុនា។
លោកថ្លែងថា៖«ជនត្រូវចោទម្នាក់នេះ ត្រូវឃុំខ្លួន តាមបទចោទជួញដូរគ្រឿងញៀនខុសច្បាប់ តាមមាត្រា៤០ច្បាប់ស្តីពីការត្រួតពិនិត្យគ្រឿងញៀន»។
លោក សូ ឌី រំឭកថា មុនមានការចាប់ខ្លួនជនត្រូវចោទម្នាក់នេះ គឺសមត្ថកិច្ចរបស់លោក បានទទួលសេចក្តីរាយការណ៍ពីក្រុមហ៊ុនផ្ញើទំនិញមួយកន្លែង ដែលមានទីតាំងនៅខេត្តបាត់ដំបង ព្រោះសង្ស័យលើកញ្ចប់ទំនិញមួយ ដែលផ្ញើមកពីប្រទេសថៃ។ ពេលនោះ លោកបានរាយការណ៍បន្តទៅលោកឧត្តមសេនីយ៍ត្រី មាស សុវណ្ណ មេបញ្ជាការកងរាជអាវុធហត្ថខេត្តបាត់ដំបងដើម្បីទទួលបញ្ជាចុះបង្ក្រាបបទល្មើសមួយនេះ។
លោកបន្តថា បន្ទាប់ពីទទួលបានបញ្ជាពីលោកឧត្តមសេនីយ៍ត្រី មាស សុវណ្ណ និងដោយមានការសម្របសម្រួលផ្លូវច្បាប់ពីលោក ឈឿន សុផុន ព្រះរាជអាជ្ញារងអមសាលាដំបូងខេត្តបាត់ដំបងផងនោះ ក៏សមត្ថកិច្ចរបស់លោក ដឹកនាំកម្លាំងចុះទៅទីតាំងក្រុមហ៊ុនផ្ញើឥវ៉ាន់ ហើយចាំឃ្លាំមើលជនល្មើស ដោយមានការសហការជាមួយក្រុមហ៊ុនផ្ញើ-ទទួលទំនិញនោះ។
បន្ទាប់មកខាងក្រុមហ៊ុន បានទូរស័ព្ទហៅតាមលេខទូរស័ព្ទដែលសរសេរលើកញ្ចប់ទំនិញនោះឱ្យទៅយក។
លោកបន្តទៀតថា នៅពេលនោះ វេលាម៉ោងប្រហែល៣កន្លះរសៀល ថ្ងៃទី១១មិថុនា ស្រាប់តែមានបុរសម្នាក់(ជនសង្ស័យ)បានទទួលទូរស័ព្ទហើយបានមកទទួលកញ្ចប់ទំនិញនោះ ពីកន្លែងក្រុមហ៊ុនផ្ញើទំនិញ។
ប៉ុន្តែពេលនោះប្រហែលជនសង្ស័យដឹងខ្លួនថា មានសមត្ថកិច្ចចាំចាប់ក៏បោះចោលកញ្ចប់គ្រឿងញៀន ហើយព្យាយាមជិះម៉ូតូរត់តែត្រូវកម្លាំងអាវុធហត្ថដេញស្ទាក់ចាប់បាន។
លោកសូ ឌី បញ្ជាក់ថា ក្រោយឃាត់ខ្លួនជនសង្ស័យ សមត្ថកិច្ចបានធ្វើការពិនិត្យទំនិញនោះ ឃើញមានគ្រឿងញៀនប្រភេទម៉ាទឹកកក (ICE)ចំនួន៦កញ្ចប់ ស្មើទម្ងន់១៣៧១,២៧ក្រាម ជញ្ជីងថ្លឹងគ្រឿងញៀន១ ម៉ូតូ១គ្រឿង។
ជនសង្ស័យបានសារភាពប្រាប់សមត្ថកិច្ចថា កញ្ចប់គ្រឿងញៀននេះ ត្រូវបានស្ត្រីម្នាក់ឈ្មោះមុំ ប្រាប់ឱ្យឈ្មោះខឿនបញ្ជាមកគាត់(ជនសង្ស័យ)ឱ្យទៅយកកញ្ចប់គ្រឿងញៀននោះ។
ករណីនេះជនសង្ស័យធ្លាប់ដឹកជញ្ជូនឲ្យគេជាង២០លើកមកហើយ ប៉ុន្តែលើកចុងក្រោយនេះ ក៏ត្រូវសមត្ថកិច្ចចាប់បានតែម្តង។
លោក ឌី បញ្ជាក់ថា៖«ករណីនេះនៅមានបក្ខពួករបស់គេទៀត ប៉ុន្តែជនដែលសមត្ថកិច្ចខ្ញុំចាប់ខ្លួននេះគ្រាន់តែជាកូនដៃគេទេ។ រឿងនេះយើងនឹងបន្តស្រាវជ្រាវរកបក្ខពួកគេបន្តទៀត»៕