.jpg)
សកម្មភាពស្ទូចរថយន្តដែលចតគ្មានសណ្ដាប់ធ្នាប់ក្នុងខណ្ឌដូនពេញកាលពីថ្ងៃ ១២ មិថុនា ។ រូបថត ប៉ូលិស
ភ្នំពេញៈ រថយន្តចំនួន ៤០ គ្រឿង ដែលបានចតចោលនៅលើចិញ្ចើមផ្លូវ និងទ្រូងផ្លូវសាធារណៈធ្វើឱ្យបាត់បង់សណ្តាប់ធ្នាប់ របៀបរៀបរយសាធារណ: បង្កការកកស្ទះចរាចរណ៍ និងសោភណភាពរាជធានីភ្នំពេញ ត្រូវបានស្ទូចយកមករក្សាទុកនៅរដ្ឋបាលខណ្ឌដូនពេញ ខណៈការអនុវត្តសេចក្ដីជូនដំណឹងអំពីបម្រាមកំពុងបន្តតឹងរ៉ឹង។
លោក សុខ ពេញវុធ អភិបាលខណ្ឌដូនពេញបានឱ្យដឹងនៅថ្ងៃទី ១៣ ខែមិថុនាថា ការចុះស្ទូច និងដកហូតរថយន្តយកមករក្សាទុកនេះ បន្ទាប់ពីរដ្ឋបាលខណ្ឌបានចេញសេចក្តីជូនដំណឹងកាលពីថ្ងៃទី ៨ មិថុនា កន្លងមកនេះ ឱ្យបញ្ឈប់ការដាក់តាំងលក់រថយន្ត និងចតរថយន្តបែបនេះ ព្រោះធ្វើឱ្យប៉ះពាល់ដល់សណ្តាប់ធ្នាប់ និងរបៀបរៀបរយសាធារណៈ និងកកស្ទះចរាចរណ៍លើដងផ្លូវ។
លោក សុខ ពេញវុធ បានបន្តថា ការចុះរៀបចំសណ្តាប់ធ្នាប់ របៀបរៀបរយ សាធារណៈលើរថយន្តដាក់លក់ និងរថយន្តដែលបានមកចតចោលនៅលើទ្រូងផ្លូវនិងចិញ្ចើមផ្លូវសាធារណៈដែលធ្វើឱ្យបាត់បង់សណ្តាប់ធ្នាប់របៀបរៀបរយសាធារណ:បង្កការកកស្ទះចរាចរណ៍ និងសោភណភាពរាជធានីភ្នំពេញនេះ គឺសមត្ថកិច្ចបានស្ទូច និងដកហូតរថយន្តចំនួន ៤០គ្រឿង។
លោកបានបញ្ជាក់ថា៖ «ក្នុងនោះ នៅថ្ងៃទី ១២មិថុនា បានដកហូតចំនួន ៣៧ គ្រឿង និងព្រឹកថ្ងៃអាទិត្យបានដកហូតចំនួន ៣ គ្រឿង។ ៤០ គ្រឿងនេះ គឺរបស់ប្រជាពលរដ្ឋទូទៅ ចំនួន ៩ គ្រឿង និងក្រៅពីនោះ គឺរបស់ក្រុមអាជីវករ ដែលពួកគាត់យកមកដាក់នៅទ្រូងផ្លូវ ដែលធ្វើឱ្យបាត់បងសណ្តាប់ធ្នាប់សាធារណៈ»។
ចំពោះវិធានការបន្ត លោក សុខ ពេញវុធ បានអះអាងថា សមត្ថកិច្ចនឹងអនុវត្តចាប់ពីពេលនេះតទៅមិនមានការលើកលែងនោះទេ ដោយមិនអនុញ្ញាតឱ្យមានការចត លក់រថយន្ត ឬឈប់អនាធិបតេយ្យនៅលើទ្រូងផ្លូវ ដែលបង្កការកកស្ទះ ជាពិសេសគឺលើផ្លូវ ដែលមានសញ្ញាហាមចត ឬឈប់។
លោកថ្លែងថា ជាមួយនឹងការអនុវត្តវិធានការនេះ រដ្ឋបាលខណ្ឌនឹងបន្តពង្រឹងមន្ត្រីយុត្តិធម៌ ជាពិសេសមន្ត្រីនគរបាលចរាចរណ៍ខណ្ឌឱ្យអនុវត្តបានតឹងរ៉ឹងដើម្បីរក្សាសណ្តាប់ធ្នាប់ទូទាំងខណ្ឌឱ្យមានប្រសិទ្ធភាពខណៈយានយន្តទាំងនេះ ត្រូវបានរក្សាទុកនៅរដ្ឋបាលខណ្ឌដើម្បីដោះស្រាយជាមួយម្ចាស់ ដោយមិនមានការផាកពិន័យនោះទេ។
ប៉ុន្តែលោកថា ម្ចាស់យានយន្តត្រូវធ្វើកិច្ចសន្យាដោយហាមល្មើសបម្រាមនេះតទៅទៀត ហើយចំពោះយានយន្តដែលល្មើសនឹងបម្រាមជាថ្មី អាចនឹងត្រូវបានឃាត់ទុកក្នុងរយៈពេលយូរ និងមានការផាកពិន័យអន្តរការណ៍ផងដែរ។
លោកបញ្ជាក់ថា៖ «មកទល់ម៉ោងនេះ (ព្រឹកថ្ងៃទៅទី ១៣) មានការធ្វើកិច្ចសន្យាហាមចត និងអប់រំណែនាំគាត់ បានចំនួន ៨ គ្រឿង ដែលពួកគាត់ គឺជាប្រជាពលរដ្ឋទូទៅ។ ដោយឡែកចំពោះរថយន្តដាក់តាំងលក់ គឺយើងអនុវត្តវិធានការរដ្ឋបាលរាងតឹងបន្តិច ដោយត្រូវរក្សាទុក ៣ ទៅ ៥ ថ្ងៃ បានប្រគល់ជូនម្ចាស់វិញ ដោយគ្រាន់តែធ្វើកិច្ចសន្យា»។
កន្លងមក រដ្ឋបាលខណ្ឌដូនពេញ បានចុះអនុវត្តការរៀបចំសណ្តាប់ធ្នាប់ និងរបៀបរៀបរយនៅលើទ្រូងផ្លូវ និងចិញ្ចើមផ្លូវសាធារណៈបានស្អាតជាប្រចាំ។ ប៉ុន្តែក្រោយពេលបញ្ចប់ការបិទខ្ទប់រាជធានីភ្នំពេញមក រដ្ឋបាលខណ្ឌបានសង្កេតឃើញមានពលរដ្ឋមួយចំនួនតូចបានយករថយន្តមកដាក់តាំងលក់នៅលើទ្រូងផ្លូវនិងចិញ្ចើមផ្លូវសាធារណៈ ដែលធ្វើឱ្យបាត់បង់សោភណភាព សណ្តាប់ធ្នាប់ របៀបរៀបរយសាធារណៈ និងធ្វើឱ្យកកស្ទះចរាចរណ៍យ៉ាងខ្លាំង។
ដោយមើលឃើញដូច្នេះ រដ្ឋបាលខណ្ឌដូនពេញ កាលពីថ្ងៃទី ៨ ខែមិថុនា បានចេញសេចក្តីជូនដំណឹងមួយដោយបានដាក់ចេញជាគោលការណ៍មួយចំនួន ដោយមិនអនុញ្ញាតឱ្យមានការដាក់តាំងលក់ និងចតរថយន្តគ្រប់ប្រភេទនៅលើទ្រូងផ្លូវ និងចិញ្ចើមផ្លូវសាធារណៈជាដាច់ខាតចាប់ពីពេលនេះតទៅ។
សេចក្ដីជូនដំណឹងនេះបានទុកពេលត្រឹមថ្ងៃទី ១២ ខែ មិថុនា ឆ្នាំ ២០២១ ដើម្បីឱ្យម្ចាស់យករថយន្តចេញពីទីតាំងខាងលើនេះជាកំហិតហើយក្នុងករណីនៅតែមិនអនុវត្តតាម នោះរដ្ឋបាលខណ្ឌដូនពេញនឹងចុះអនុវត្តវិធានការរដ្ឋបាល ហើយរាល់ការខូចខាតបាត់បង់ទ្រព្យសម្បត្តិគឺមិនទទួលខុសត្រូវឡើយ។
ជាពលរដ្ឋម្នាក់រស់នៅក្នុងខណ្ឌដូនពេញ អ្នកស្រី ម៉ានី បានសាទរចំពោះចំណាត់ការរបស់អាជ្ញាធរខណ្ឌក្នុងការចុះអនុវត្តវិធានការនេះដោយលើកឡើងថាផ្លូវនៅតំបន់ខ្លួនរស់នៅ គឺរាងតូចចង្អៀតហើយបើចតយានយន្តច្រីន ឬចតទាំងសង្ខាងផ្លូវ នឹងធ្វើឱ្យអ្នកធ្វើដំណើរពិបាក និងមានការស្ទះចរាចរណ៍។
ប៉ុន្តែយ៉ាងណា អ្នកស្រី ម៉ានី បានទទូចឱ្យអាជ្ញាធរ គួរបង្កើតកន្លែងចតសាធារណៈឱ្យបានច្រើននៅក្នុងខណ្ឌ ដើម្បីបង្កលក្ខណៈងាយស្រួលដល់ពលរដ្ឋក្នុងការទុកដាក់យានយន្តរបស់ពួកគេឱ្យបានត្រឹមត្រូវចៀសវាងចតនៅលើផ្លូវបែបនេះ។
អ្នកស្រីបញ្ជាក់ថា៖ «វាក៏អាចពិបាកដែរសម្រាប់ម្ចាស់ផ្ទះដែលមានរថយន្ត ព្រោះមិនដឹងយកយានយន្តទៅចតនៅកន្លែងណាក្រៅពីមុខផ្ទះរបស់ខ្លួន។តំបន់របស់យើងមិនទាន់មានចំណតសាធារណៈសម្រាប់ចតនោះទេដែលធ្វើឱ្យពិបាកដល់អ្នកមានយានយន្ត»។
លោក គង់ សុវណ្ណ អ្នកជំនាញសុខភាពសាធារណៈ និងជានាយកកម្មវិធីមូលនិធិសុវត្ថិភាពអន្តរជាតិ បានថ្លែងថា ជាការពិត ការដាក់តាំងលក់រថយន្តលើចិញ្ចើមឬទ្រូងផ្លូវសាធារណៈ គឺពិតជាបង្កឱ្យផ្លូវរួមតូចចង្អៀត និងឈានទៅដល់ភាពកកស្ទះចរាចរណ៍ហើយនឹងបង្កផលប៉ះពាល់ជាច្រើនទៀត។ ដូច្នេះលោករំពឹងថាអាជ្ញាធរមានសមត្ថកិច្ចគួរតែអនុវត្តវិធានការនេះឱ្យបានគ្រប់គ្នា៕
វីដេអូ៖
