ភ្នំពេញៈ ប្រទេសកម្ពុជា នឹងសម្រេចបានលទ្ធផលនៃការចាក់វ៉ាក់សាំងបានរហូតដល់ ៣០% នៃចំនួនចាក់វ៉ាក់សាំងធៀបនឹងគោលដៅមនុស្សចំនួន ១០ លាននាក់ នៅទូទាំងប្រទេស នៅក្នុងពេលប៉ុន្មានថ្ងៃខាងមុខនេះ។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ ១៩ ក្នុងក្របខណ្ឌទូទាំងប្រទេស បានលើកឡើងនៅថ្ងៃទី ១២ ខែមិថុនាថា នៅប្រមាណជា ២ ទៅ ៣ ថ្ងៃទៀត កម្ពុជានឹងសម្រេចបានការចាក់វ៉ាក់សាំងរហូតដល់ ៣ លាននាក់។
លោកស្រីបានសរសេរលើបណ្តាញ Twitter ថា៖ «ក្នុងរយៈពេលពីរបីថ្ងៃខាងមុខនេះ យើងនឹងឈានដល់ការសម្រេចបាននូវយុទ្ធនាការចាក់វ៉ាក់សាំងបង្ការជំងឺកូវីដ ១៩ របស់យើង បានរហូតដល់ចំនួន ៣ លាននាក់»។
លោកស្រី ឱ វណ្ណឌីន បានបន្ថែមថា៖ «ប្រទេសកម្ពុជា ជាប្រទេសតូចមួយ ដែលមានបេះដូងធំហើយមានសំណាងណាស់ដែលមានសម្តេចតេជោនាយករដ្ឋមន្ត្រី ហ៊ុន សែន ជួយប្រជាជនឱ្យចាក់វ៉ាក់សាំងបានលឿនបំផុតតាមដែលអាចធ្វើទៅបាន»។
យោងតាមរបាយការណ៍របស់ក្រសួងសុខាភិបាលបានឱ្យដឹងថា គិតត្រឹមថ្ងៃទី ១៣ ខែមិថុនា កម្ពុជាបានចាក់វ៉ាក់សាំងជូនប្រជាពលរដ្ឋនៅទូទាំងប្រទេសបានចំនួន ២ ៩៣៩ ៥៤៣ នាក់ ដែលស្មើនឹង ២៩.៤០% នៃចំនួនគោលដៅប្រជាជនចំនួន ១០ លាននាក់។
ជាមួយគ្នានេះដែរ លោក ទៀ បាញ់ រដ្ឋមន្ត្រីក្រសួងការពារជាតិ បានបើកកិច្ចប្រជុំនៅព្រឹកថ្ងៃទី ១៤ ខែមិថុនានេះ ដើម្បីបូកសរុបលទ្ធផលយុទ្ធនាការងារចាក់វ៉ាក់សាំងការពារជំងឺកូវីដ ១៩ ជូនប្រជាពលរដ្ឋកម្មករ-កម្មការិនី និងជនបទរទេស នៅខណ្ឌចំនួន ០៦ ក្នុងភូមិសាស្ត្ររាជធានីភ្នំពេញ៕