.jpg)
ជំនួបរវាង លោក នាយករដ្ឋមន្ត្រី ហ៊ុន សែន និងឯកអគ្គរដ្ឋទូតសាធារណរដ្ឋឆែក នៅថ្ងៃទី ១៤ មិថុនានេះ ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន ស្នើឯកអគ្គរដ្ឋទូតសាធារណរដ្ឋឆែកថ្មីប្រចាំកម្ពុជាឱ្យជំរុញបន្ថែមលើកិច្ចសហប្រតិបត្តិការវិស័យសេដ្ឋកិច្ច ពាណិជ្ជកម្ម វិនិយោគ និងការអភិវឌ្ឍធនធានមនុស្សរវាងប្រទេសទាំង ២។
ការស្នើរបស់លោក ហ៊ុន សែន ធ្វើឡើងក្នុងជំនួបរវាងលោកនិងលោក Martin Vávra ឯកអគ្គរដ្ឋទូតវិសាមញ្ញនិងពេញសមត្ថភាពនៃសាធារណរដ្ឋឆែកថ្មីប្រចាំកម្ពុជានៅឯវិមានសន្តិភាពនៃទីស្តីការនាយករដ្ឋមន្ត្រីនៅថ្ងៃទី ១៤ ខែមិថុនានេះ។
ហ្វេសប៊ុកលោក ហ៊ុន សែន បញ្ជាក់នៅថ្ងៃនេះថា៖«សម្ដេចតេជោ (ហ៊ុនសែន) បានស្នើឲ្យឯកឧត្តម Martin Vávraយកចិត្តទុកដាក់ទៅលើការជំរុញសហប្រតិបត្តិការលើវិស័យសេដ្ឋកិច្ចពាណិជ្ជកម្មវិនិយោគនិងការអភិវឌ្ឍធនធានមនុស្ស»។
បើតាមហ្វេសប៊ុកដដែល នៅក្នុងជំនួបនោះលោក Martin Vávra បានប្រាប់លោក ហ៊ុន សែន ថា បេសកកម្មរបស់លោកមកកាន់កម្ពុជានាពេលនេះគឺធ្វើយ៉ាងណាដើម្បីពង្រឹងនិងពង្រីកទំនាក់ទំនងប្រទេសទាំង ២ ឱ្យកាន់តែធំធាត់ឡើងបន្ថែមទៀត។
ប្រភពដដែលបញ្ជាក់ថា៖ «ឯកឧត្តម (Martin Vávra)បានបន្ថែមទៀតថាសាធារណរដ្ឋឆែកមានមនោសញ្ចេតនាចំពោះកម្ពុជា។ឈរលើមូលដ្ឋាននេះឯកឧត្តមបានសន្យាចំពោះសម្តេចតេជោនាយករដ្ឋមន្ត្រី (ហ៊ុន សែន)ថានឹងប្រឹងប្រែង ដើម្បីជំរុញកិច្ចសហប្រតិបត្តិការលើវិស័យនយោបាយ សេដ្ឋកិច្ច វិស័យពាណិជ្ជកម្ម និងវិស័យវិនិយោគ។ជាមួយគ្នានោះផងដែរឯកឧត្តមក៏បានគោរពជម្រាបជូនសម្ដេចតេជោថា សាធារណរដ្ឋឆែកនឹងជួយដល់កម្ពុជាជាពិសេសលើការអភិវឌ្ឍធនធានមនុស្ស»។
ហ្វេសប៊ុកដដែលបន្តថា លោក ហ៊ុន សែន បានថ្លែងអំណរគុណដល់ប្រជាជន និងរដ្ឋាភិបាលនៃសាធារណរដ្ឋឆែកដែលបានជួយដល់កម្ពុជាពីអតីតកាលលើវិស័យនយោបាយ សេដ្ឋកិច្ច និងសង្គមកិច្ច។ លើសពីនេះទៅទៀតក៏បានលុបបំណុលមួយចំនួនធំ ហើយបំណុលដែលនៅសេសសល់បានយកមកជួយកម្ពុជាវិញ តាមរយៈការសាងសង់សាលារៀន និងវិស័យសង្គមកិច្ចជាដើម៕
