ភ្នំពេញៈ លោក ទៀបាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ បានបញ្ជាឱ្យស្វែងរកមេខ្យល់ដែលយកលុយពីពលរដ្ឋពេលទៅចាក់វ៉ាក់សាំងការពារមេរោគកូវីដ ១៩ មកផ្តន្ទាទោសទៅតាមច្បាប់ឱ្យបាន ព្រោះការចាក់វ៉ាក់សាំងនេះ គឺរាជរដ្ឋាភិបាលមិនតម្រូវឲ្យយកថវិកាពីប្រជាពលរដ្ឋនោះទេ។
លោក ទៀ បាញ់ បានថ្លែងទៅកាន់អ្នកសារព័ត៌មានបែបនេះនៅថ្ងៃទី ១៤ ខែមិថុនា នៅទីស្ដីការគណៈរដ្ឋមន្ដ្រី ក្រោយពេលបញ្ចប់ការដឹកនាំកិច្ចប្រជុំបូកសរុបលទ្ធផលយុទ្ធនាការងារចាក់វ៉ាក់សាំងការពារជំងឺកូវីដ១៩ដល់ប្រជាពលរដ្ឋកម្មករ-កម្មការិនី និងជនបទរទេសដែលមានអាយុចាប់ពី ១៨ ឆ្នាំឡើងទៅ នៅខណ្ឌចំនួន ៦ ក្នុងភូមិសាស្ត្ររាជធានីភ្នំពេញ និងទីក្រុងតាខ្មៅនៃខេត្តកណ្ដាល។
លោកបានថ្លែងថា៖ «មិនត្រូវលើកលែងឱ្យនោះឡើយចំពោះបុគ្គលដែលមានពាក្យចរចាមអារាមថាបានយកលុយពីប្រជាពលរដ្ឋពេលទៅចាក់ថ្នាំវ៉ាក់សាំងការពារមេរោគកូវីដ ១៩ នេះ»។
លោក ទៀ បាញ់ បានឲ្យដឹងថារហូតមកដល់ពេលនេះក្រុមការងារចាក់វ៉ាក់សាំងការពារមេរោគកូវីដ ១៩ បានចាក់វ៉ាក់សាំង ដល់ប្រជាពលរដ្ឋនៅក្នុងខណ្ឌចំនួន ៦ នៃរាជធានីភ្នំពេញ។
ក្រោយចាប់ផ្តើមនូវយុទ្ធនាការរហូតមកដល់បច្ចុប្បន្ន ការចាក់វ៉ាក់សាំងការពារជំងឺកូវីដ ១៩ លើកទី១ ជូនដល់កងទ័ពគ្រួសារកងទ័ព និងប្រជាពលរដ្ឋបានជាង ១,៣ លាននាក់ ក្នុងនោះចាក់វ៉ាក់សាំងដល់ពលរដ្ឋនៅតំបន់ក្រហមបានជាង ៩៩ ម៉ឺននាក់។
លោកបន្តថា ជំហានបន្ទាប់ក្រសួងការពារជាតិនឹងធ្វើការចាក់វ៉ាក់សាំងដល់ប្រជាពលរដ្ឋនៅខេត្តចំនួន ៥ បន្តទៀតក្នុងនោះមានខេត្តកំពង់ចាម កំពង់ស្ពឺ តាកែវ ស្វាយរៀង និងខេត្តព្រះសីហនុ ដើម្បីធ្វើយ៉ាងណាពន្លឿនការចាក់ជូនដល់បងប្អូនប្រជាពលរដ្ឋឱ្យបានឆាប់រហ័សបំផុតស្របទៅតាមការណែនាំរបស់រាជរដ្ឋាភិបាលនោះ។
យុទ្ធនាការចាក់វ៉ាក់សាំងការពារជំងឺកូវីដ ១៩ ទ្រង់ទ្រាយធំដែលដឹកនាំដោយក្រសួងការពារជាតិបានធ្វើឡើងកាលពីថ្ងៃទី ៣០ ខែ មេសា ឆ្នាំ ២០២១ ក្រោមអធិបតីភាពលោក ទៀ បាញ់។
លោក ទៀ បាញ់ បានបញ្ជាក់ថា ក្រុមយោធានឹងធ្វើការចាក់វ៉ាក់សាំងឲ្យបានលឿនបំផុតដែលអាចធ្វើទៅបាន តាមពេលដែលវ៉ាក់សាំងមានគ្រប់គ្រាន់ដូចអ្វីដែលថ្នាក់ដឹកនាំបានលើកឡើងថា «មិនឱ្យវ៉ាក់សាំងដេកក្នុងឃ្លាំង ដោយត្រូវឱ្យវ៉ាក់សាំងជ្រាបចូលក្នុងខ្លួនមនុស្ស ដើម្បីបង្កើតភាពស៊ាំ»៕