.jpg)
ក្រុមគ្រូទាយនិងគ្រូមន្តអាគមន៍ ក្រោយសមត្ថកិច្ចឃាត់ខ្លួន ពីថ្ងៃទី ១៣ មិថុនា។ រូបថត ប៉ូលិស
ពោធិ៍សាត់ៈ គ្រូទាយបៀរនិងគ្រូមន្តអាគមចំនួន ៣ នាក់(ស្រី ២ នាក់) ត្រូវបាននគរបាលបញ្ជូនខ្លួនទៅស្នងការដ្ឋាននគរបាលខេត្តពោធិ៍សាត់នៅថ្ងៃទី ១៤ មិថុនានេះ
១ ថ្ងៃ បន្ទាប់ពីចាប់ខ្លួនតាមបណ្តឹងរបស់ស្ត្រីរងគ្រោះ ២ នាក់ ពាក់ព័ន្ធករណីបោកលុយចំនួន ៦៧ លានរៀល ប្រព្រឹត្តនៅភូមិបោះពួយ ឃុំលាច ស្រុកភ្នំក្រវាញ ខេត្តពោធិ៍សាត់ តាំងពីថ្ងៃ ២០ ខែតុលា ឆ្នាំមុន រហូតដល់ខែ មិថុនា ឆ្នាំនេះ។
លោក នង សម្បត្តិ អធិការរងទទួលផែនការងារព្រហ្មទណ្ឌនៃអធិការដ្ឋាននគរបាលស្រុកភ្នំក្រវាញប្រាប់ ភ្នំពេញ ប៉ុស្ដិ៍ នៅថ្ងៃទី ១៤ មិថុនានេះថា ជនសង្ស័យទី១- ឈ្មោះ សោម សារ៉ុន ភេទស្រី អាយុ ៧២ ឆ្នាំ (ត្រូវជាម្ដាយ) ជាអ្នកទាយសន្លឹកបៀរ,ទី២- ឈ្មោះ វ៉េត សារ៉ុម ភេទស្រី (ត្រូវជាកូនស្រីបង្កើត) ជាអ្នកទារទ្រនឹបរៀបឱ្យគ្រូ និងទី៣- ឈ្មោះ វង់ បឿ ហៅ បឿក ភេទប្រុស អាយុ ៣១ ឆ្នាំ (ត្រូវជាប្តី វ៉េត សារ៉ុម) ជាគ្រូមន្តអាគមដោះអំពើ។ ចំណែកជនរងគ្រោះឈ្មោះ ឈន ស្រីពេជ្រ ភេទស្រី អាយុ ២៩ ឆ្នាំ រស់នៅភូមិក្រូចឆ្មារ ឃុំលាច ស្រុកភ្នំក្រវាញ ខេត្តពោធិ៍សាត់, ទី២- ឈ្មោះ ណាម ស្រីមុំ អាយុ ២៩ ឆ្នាំ រស់នៅភូមិប៉ែន ឃុំលាច ស្រុកក្រវាញ ខេត្តពោធិ៍សាត់។
លោកបន្តថា៖ «ឥឡូវនេះជនសង្ស័យទាំង ៣ នាក់ សមត្ថកិច្ចខ្ញុំបានបញ្ជូនពួកគេបន្តទៅស្នងការដ្ឋាននគរបាលខេត្តហើយ ដើម្បីចាត់ការតាមនីតិវិធីច្បាប់។ ពួកគេជាគ្រូទាយបៀរតែប្រើរូបភាពបោកជនរងគ្រោះ»។
លោករៀបរាប់តាមសម្តី របស់ជនរងគ្រោះថា ស្ត្រីរងគ្រោះម្នាក់ៗមានបញ្ហាក្នុងក្រុមគ្រួសារ ហើយបានដឹងថា នៅក្នុងភូមិភូមិប៉ែន ឃុំលាច មានគ្រូទាយបៀរ និងចេះដោះអំពើអាបធ្មប់ផង។ដូច្នេះគាប់ជួនក្រុមគ្រួសារពួកគេ (ជនរងគ្រោះ) មានបញ្ហាផងនោះក៏បានទៅរកជនសង្ស័យ ដើម្បីមើលពីជោគជតារាសីបំណងធ្វើយ៉ាងណាឱ្យក្នុងគ្រួសារពួកគេមានសេចក្តីសុខមិនទាស់ទែងប្តីប្រពន្ធ។
លោកបានបន្ត លុះដល់នៅថ្ងៃទី ២០ ខែ តុលា ឆ្នាំ ២០២០ ស្ត្រីទាំង ២ នាក់ ដែលមានបញ្ហាក្នុងគ្រួសារដូចគ្នានោះបានទៅរកពឹងពាក់ក្រុមជនសង្ស័យ។ពេលជួបក្រុមជនសង្ស័យលើកដំបូងឈ្មោះ សោម សារ៉ុន បានទាយបៀរមើលជើងលេខទៅក៏ប្រាប់ស្ត្រីរងគ្រោះថា ក្នុងក្រុមគ្រួសារមានគ្រោះធំណាស់ ដូច្នេះទាល់តែឱ្យគ្រូមន្តអាគម (កូនប្រសា) ប្រើវេទមន្តខាបយកអំពើចេញពីក្នុងខ្លួនទើបក្នុងគ្រួសារមានសេចក្តីសុខ ហើយក៏លែងមានជំងឺឬមានអ្វីអាក្រក់មកបៀតបៀនទៀត។
លោកបន្តថា ពេលនោះស្ត្រីឈ្មោះ វ៉េត សារ៉ុម បានបង្គាប់ឱ្យស្ត្រីរងគ្រោះរៀបតង្វាយឱ្យគ្រូដោយតម្រូវឱ្យដាក់លុយលើកទី១ ចំនួន ២០ ម៉ឺនរៀល បន្ទាប់មកយក ៦០ ម៉ឺនរៀល និងបង្គាប់ឱ្យជនរងគ្រោះដាក់តង្វាយរហូត។
ចំពោះការដាក់តង្វាយទៀតសោតគឺក្រុមជនសង្ស័យកំណត់ពេលម៉ោង ៦ ព្រឹក ឬម៉ោង ១២ ថ្ងៃត្រង់ តែបើដាក់តង្វាយខុសពីម៉ោងនេះគឺគ្មានប្រសិទ្ធភាពទេ។បន្ទាប់ពីជនរងគ្រោះដាក់តង្វាយម្តងជា ២ ដង តែគ្មានប្រសិទ្ធភាពមិនអាចឱ្យជនរងគ្រោះសម្រេចបំណងបាន គឺក្រុមជនសង្ស័យបង្គាប់ឱ្យដាក់លុយបន្ថែមទៀត ដែលពេលខ្លះផ្ញើលុយតាមវីងក៏មានរហូតដល់ស្ត្រីរងគ្រោះចំណាយលុយក្នុងម្នាក់ៗអស់ជាង ៤២ លានរៀល និងម្នាក់ទៀតអស់ជាង ២៥ លានរៀល។
លោកបានបន្ថែមថា ដោយស្ត្រីរងគ្រោះម្នាក់ៗចំណាយលុយច្រើនពី ២០ ខែ តុលា ឆ្នាំ ២០២០ រហូតដល់មិថុនា ឆ្នាំនេះ មិនទទួលបានលទ្ធផលអ្វី ក៏ភ្ញាក់ខ្លួនដឹងថា ក្រុមជនសង្ស័យបោកក៏មកប្តឹងនគរបាលប៉ុស្តិ៍ឃុំលាច ហើយនគរបាលប៉ុស្តិ៍បានស្រាវជ្រាវឃាត់ខ្លួនពួកគេនៅថ្ងៃទី ១៣ មិថុនា តែម្តង ។
លោក នង សម្បត្តិ បញ្ជាក់ថា នៅចំពោះមុខសមត្ថកិច្ចក្រុមជនសង្ស័យបានសារភាពថាពួកគេពិតជាបានធ្វើសកម្មភាពបោកលុយពីជនរងគ្រោះមែនតែមិនដល់រាប់លានទេ។ ប៉ុន្តែទោះយ៉ាងណាក្នុងនាមសមត្ថកិច្ចអនុវត្តច្បាប់លោកត្រូវតែធ្វើតាមបណ្តឹងរបស់ជនរងគ្រោះ៕
