ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.)ប្រកាសអនុវត្តវិធានការ នៃការពិន័យអន្តរការណ៍លើអំពើល្មើសនឹងច្បាប់ស្តីពីកិច្ចការពារអ្នកប្រើប្រាស់ ចាប់ពីថ្ងៃទី ១ ខែកក្កដា តទៅ និងណែនាំឲ្យពលរដ្ឋស្វែងយល់ពីច្បាប់ឱ្យបានទូលាយចៀសវាងទទួលរងការពិន័យ។
ការប្រកាសអនុវត្តវិធានការពិន័យនេះ ធ្វើឡើងបន្ទាប់ពីក្រសួងចំនួន ៣ មានក្រសួងសេដ្ឋកិច្ច និងហិរញ្ញវត្ថុ ក្រសួងយុត្តិធម៌ និងក្រសួងពាណិជ្ជកម្ម រួមគ្នាប្រកាសឲ្យប្រើប្រាស់ប្រកាសអន្តរក្រសួងស្តីពីនីតិវិធីពិន័យអន្តរការណ៍ លើអំពើល្មើសនឹងច្បាប់ស្ដីពីកិច្ចការពារអ្នកប្រើប្រាស់ កាលថ្ងៃទី៣ ខែមិថុនា ឆ្នាំ ២០២១។
សេចក្តីជូនដំណឹងរបស់អគ្គនាយករដ្ឋាន ក.ប.ប បានឲ្យដឹងនៅថ្ងៃទី ១៤ មិថុនាថា ដើម្បីគាំទ្រដល់ការអនុវត្តច្បាប់នេះ អគ្គនាយកដ្ឋាន ក.ប.ប. ដែលជាលេខាធិការរបស់គណៈកម្មាធិការ ជាតិការពារអ្នកប្រើប្រាស់ គ.ជ.ក.ប. បានរៀបចំប្រកាសអន្តរក្រសួងស្តីពីនីតិវិធីពិន័យអន្តរការណ៍លើអំពើល្មើសនឹងច្បាប់ស្ដីពីកិច្ចការពារអ្នកប្រើប្រាស់ ជាមួយក្រសួងយុត្តិធម៌ និងក្រសួងសេដ្ឋកិច្ច និងហិរញ្ញវត្ថុ។
សេចក្តីជូនដំណឹងបញ្ចាក់ថា៖ «ដោយទទួលបានការអនុញ្ញាតពី គ.ជ.ក.ប. មន្ត្រីស៊ើបអង្កេតរបស់អគ្គនាយកដ្ឋាន ក.ប.ប. នៃក្រសួងពាណិជ្ជកម្ម ដែលទទួលបាននីតិសម្បទាជានគរបាលយុត្តិធម៌ នឹងចាប់ផ្តើមអនុវត្តវិធានការ ស្របតាមខ្លឹមសារដែលមានចែងនៅក្នុងប្រកាសអន្តរក្រសួងស្តីពីនីតិវិធីពិន័យអន្តរការណ៍ លើអំពើល្មើសនឹងច្បាប់ស្ដីពីកិច្ចការពារអ្នកប្រើប្រាស់ ចាប់ពីថ្ងៃទី ១ ខែ កក្កដា ឆ្នាំ ២០២១ នេះតទៅ»។
ដូច្នេះ អគ្គនាយករដ្ឋាន ក.ប.ប.រំពឹងថា សេចក្តីជូនដំណឹងនេះ នឹងឲ្យប្រជាពលរដ្ឋទាំងអស់ ដែលជាម្ចាស់ក្រុមហ៊ុន ផលិតករ ពាណិជ្ជករ អាជីវករ ស្វែងយល់អំពីខ្លឹមសារនៃប្រកាសអន្តរក្រសួង និងច្បាប់ស្ដីពីកិច្ចការពារអ្នកប្រើប្រាស់ ដើម្បីចូលរួមអនុវត្តប្រកាសអន្តរក្រសួងនេះប្រកបដោយប្រសិទ្ធភាព និងប្រសិទ្ធផល។
យោងតាមច្បាប់ស្តីពីកិច្ចការពារអ្នកប្រើប្រាស់ កាលពីខែវិច្ឆិកា ឆ្នាំ ២០១៩ បានឱ្យដឹងថា ច្បាប់នេះសំដៅធានាឱ្យមានកិច្ចការពារដល់អ្នកប្រើប្រាស់ ដើម្បីបង្កើតបរិយាកាសនៃការធ្វើពាណិជ្ជកម្មដោយស្មោះត្រង់ និងការប្រកួតប្រជែងដោយសុចរិត។
ច្បាប់នេះ ក៏បានចែងពីការដាក់ទោសទណ្ឌចំពោះម្ចាស់ក្រុមហ៊ុន ផលិតករ ពាណិជ្ជករ អាជីវករ ដែលបានប្រព្រឹត្តសកម្មភាពល្មើសនឹងច្បាប់នេះ ដោយការពិន័យជាប្រាក់ និងការដាក់ទោសទណ្ឌក្នុងពន្ធនាគារ៕
វីដេអូ៖