.jpg)
ជនសង្ស័យ (២ នាក់ស្ដាំ) ដែលបន្លំខ្លួនចូលលួចទូរស័ព្ទអ្នកជំងឺកូវីដ ១៩ ក្រោយឃាត់ខ្លួន។ រូបថត គ្រូពេទ្យនៃ UYFC
ភ្នំពេញៈ សមត្ថកិច្ចនគរបាលខណ្ឌសែនសុខ រាជធានីភ្នំពេញ បានបញ្ជូនជនសង្ស័យប្រុស-ស្រី ២ នាក់ ទៅធ្វើចត្តាឡីស័ក មុនបញ្ជូនទៅតុលាការ បន្ទាប់ពីក្រុមគ្រូពេទ្យព្យាបាលជំងឺកូវីដនៅមណ្ឌលព្យាបាលជំងឺកូវីដសែនសុខ ១ ក្នុងខណ្ឌនេះ បានឃាត់ខ្លួនកាលពីថ្ងៃទី ១៣ មិថុនា ពាក់ព័ន្ធករណីចូលលួចទូរស័ព្ទអ្នកជំងឺកូវីដប្រមាណ ១០ គ្រឿង និងលុយជាង ១ លានរៀលទៀត។
លោក ហួរ ម៉េងវ៉ាង អធិការនគរបាលខណ្ឌសែនសុខ ឱ្យដឹងនៅថ្ងៃទី ១៤ មិថុនាថា ករណីនេះលោកមិនទាន់ប្រាប់ឈ្មោះរបស់ជនសង្ស័យនៅឡើយទេ ដោយសារតែពួកគេត្រូវនាំយកទៅធ្វើចត្តាឡីស័កសិន មុននឹងសម្រេចតាមផ្លូវច្បាប់។
លោកប្រាប់យ៉ាងខ្លីថា៖ «ពួកគេខ្ញុំបានយកទៅចូលក្នុងមណ្ឌលធ្វើចត្តាឡីស័កសិន ហើយបន្ទាប់មកថា គួរចាត់វិធានការយ៉ាងណានោះចាំឱ្យពួកគេចេញពីមណ្ឌលសិនទៅ»។
យ៉ាងណាក្ដីបើយោងតាមបណ្តាញសង្គមហ្វេសប៊ុករបស់សម្ព័ន្ធគ្រូពេទ្យសហភាពសហព័ន្ធយុវជនកម្ពុជាបានសរសេរបង្ហោះថា ជនសង្ស័យប្រុសស្រី ២ នាក់ ត្រូវសមត្ថកិច្ចឃាត់ខ្លួនបាន ខណៈពួកគេបន្លំខ្លួនជាអ្នកជំងឺកូវីដ ១៩ ចូលលួចទូរស័ព្ទដៃអស់ជិត ១០ គ្រឿង និងលុយជាង ១ លានរៀល។ ករណីនេះកើតឡើងកាលពីថ្ងៃទី ១៣ ខែ មិថុនា ឆ្នាំ ២០២១ នៅមណ្ឌលព្យាបាលជំងឺកូវីដ ១៩ សែនសុខ ១ ក្នុងខណ្ឌសែនសុខ រាជធានីភ្នំពេញ។
សារដដែលបន្តថា«ក្រុមគ្រូពេទ្យនៃសម្ព័ន្ធគ្រូពេទ្យ (ស.ស.យ.ក) សហការជាមួយកម្លាំងមានសមត្ថកិច្ចចាប់បានចោរទាំង ២ នាក់ និងធ្វើតេស្តពួកគេទាំង ២ គឺ «អវិជ្ជមាន» រួចបញ្ជូនឱ្យកម្លាំងមានសមត្ថកិច្ច ដើម្បីធ្វើចត្តាឡីស័កមុននឹងចាត់វិធានការតាមផ្លូវច្បាប់បន្ត»។
ករណីដូចគ្នានេះដែរកាលពីថ្ងៃទី ៥ មិថុនា ឆ្នាំ ២០២១ តាមរយៈបណ្តាញសង្គមដែលប្រើគណនីឈ្មោះ តុប ពន្លក ក៏បានបង្ហោះសាររៀបរាប់ថា ក្រុមគ្រូពេទ្យជួរមុខហួសចិត្តនឹងជនសង្ស័យ ១ រូប រហូតដល់ប្រសិទ្ធនាមឱ្យថាមហាចោរក្លាហាន ព្រោះថា បុរសសង្ស័យរូបនេះហ៊ានចូលលួចទូរស័ព្ទដៃរបស់អ្នកជំងឺកូវីដ ១៩ ចំនួន ២ ដង ខណៈអ្នកជំងឺកំពុងសម្រាកនៅមណ្ឌលព្យាបាលកម្រិតស្រាលនៃវិទ្យាល័យជម្ពូវ័ន ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ ។
បើតាមគណនីហ្វេសប៊ុកដដែលបានបង្ហោះរូបភាពជនសង្ស័យអមដោយសារថា៖ «ថ្ងៃនេះ (ថ្ងៃទី ៥ មិថុនា ២០២១) ខ្ញុំបានយកសំណាកជូនមហាចោរដែលមានចិត្តក្លាហានចូលលួចទូរស័ព្ទរបស់អ្នកជំងឺ COVID-19 បានសម្រេចចំនួន២លើកនៅមណ្ឌលព្យាបាលជំងឺកូវីដ ១៩ វិទ្យាល័យជម្ពូវ័ន ប៉ុន្តែជាអកុសល ត្រូវបានកម្លាំងនរគបាលប៉ុស្តិ៍ចាប់បាន» ។
គណនីហ្វេសប៊ុកដដែលបានបន្តទៀតថា ក្រោយពិនិត្យសំណាកលើបុរសសង្ស័យ (មិនស្គាល់អត្តសញ្ញាញ) រូបនេះ លទ្ធផលតេស្តរហ័សបង្ហាញថាអវិជ្ជមានកូវីដ ១៩។ ទោះជាយ៉ាងណាជនសង្ស័យត្រូវបានកម្លាំងនគរបាលនាំខ្លួនយកទៅសាកសួរ ដើម្បីចាត់ការតាមនីតិវិធីច្បាប់៕
