.jpg)
កម្លាំងមន្ទីរសាធារណការ និងដឹកជញ្ជូនខេត្តកោះកុង កំពុងជួសជូលផ្លូវដែលរងការខូចខាតដោយសារជំនន់ទឹកភ្លៀង។ រូបថត រដ្ឋបាលខេត្តកោះកុង
កោះកុងៈ មន្ទីរសាធារណការ និងដឹកជញ្ចូនខេត្តកោះកុង បានជូនដំណឹងពីការផ្អាកធ្វើចរាចរណ៍លើកំណាត់ផ្លូវជាតិលេខ ៤៨ ត្រង់គីឡូម៉ែត្រលេខ ១៥៤+៣៥០ បន្ទាប់ពីកំណត់ផ្លូវនេះ ត្រូវបានជំនន់ទឹកភ្លៀងហូរច្រោះដាច់ចិញ្ចើមផ្លូវ បង្កើតជារូង និងបានរីករាលដាលកាន់តែធំ ដល់ពាក់កណ្តាលទ្រូងផ្លូវខណៈមានភ្លៀងយ៉ាងខ្លាំងកាលពីថ្ងៃទី ១២ ខែមិថុនា។
សេចក្តីជូនដំណឹងរបស់មន្ទីរសាធារណការ និងដឹកជញ្ចូន ចុះថ្ងៃទី ១៤ មិថុនា បានឲ្យដឹងថា កំណាត់ផ្លូវជាតិលេខ ៤៨ ត្រង់គីឡូម៉ែត្រលេខ ១៥៤+៣៥០ គឺស្ថិតក្នុងភូមិនាងកុក ឃុំប៉ាក់ខ្លង ស្រុក មណ្ឌលសីមា ខេត្តកោះកុង ដោយ ការបិទចរាចរណ៍នេះ គឺចាប់ពីថ្ងៃទី ១៤ ខែ មិថុនា ឆ្នាំ ២០២១ នេះតទៅ។
មន្តីរសាធារណការបានបញ្ជាក់ថា៖ «ដោយលូចាស់កាត់ផ្លូវបានខូចខាត និងបាក់ស្រុត ត្រង់តំណ ធ្វើឲ្យរថយន្តតូច-ធំលំបាកក្នុងការធ្វើចរាចរណ៍ឆ្លងកាត់ ពិសេសការធ្វើដំណើររបស់បងប្អូនប្រជាពលរដ្ឋ។ មន្ទីរសាធារណការ និងដឹកជញ្ជូនខេត្តកោះកុង នឹងធ្វើការបិទចរាចរណ៍ឆ្លងកាត់កំណាត់ផ្លូវ នេះជាបណ្តោះអាសន្ន (ផ្លូវខាងឆ្វេង) និងពង្វាងចរាចរណ៍ឆ្លងកាត់ទៅផ្លូវខាងស្ដាំ (ទិសពីភ្នំពេញ)»។
ដូចបានជម្រាបជូនខាងលើ មន្ទីរសាធារណការ និងដឹកជញ្ចូនខេត្តជឿជាក់ថា ប្រជាពលរដ្ឋទាំងអស់នឹងបានជ្រាបជាព័ត៌មាន និងយោគយល់ អធ្យាស្រ័យ ដោយចូលរួមសហការ ដើម្បីឱ្យដំណើរជួសជុលកំណាត់ផ្លូវនេះ បានទាន់ពេលវេលា ប្រកបដោយសុខសុវត្ថិភាព។
លោក សុខ សុទ្ធី អ្នកនាំពាក្យសាលាខេត្តកោះកុង បានប្រាប់ ភ្នំពេញ ប៉ុស្តិ៍ នៅថ្ងៃទី ១៤ មិថុនាថា ដោយសារកាលពីថ្ងៃទី ១២ មិថុនា នៅក្នុងខេត្តកោះកុង មានភ្លៀងធ្លាក់ខ្លាំង ហើយក៏បណ្តាលឲ្យទឹកជំនន់ហូរច្រោះធ្វើឲ្យប៉ះពាល់ផ្លូវ។
លោកបន្តថា ជំនន់ទឹកភ្លៀងនេះ គឺមិនត្រឹមតែធ្វើឲ្យផ្លូវជាតិលេខ ៤៨ ខូចខាត និងបាក់ស្រុតនោះទេ ជំនន់ទឹកភ្លៀងនេះ ក៏បានធ្វើឲ្យផ្លូវមួយខ្សែរទៀត ស្ថិតក្នុងស្រុកកោះកុង ដែលកំពុងធ្វើការសាងសង់ ខូចខាត និងបាក់ស្រុតផងដែរ។
លោកបញ្ជាក់ថា៖ «មន្ត្រីជំនាញយើង កំពុងធ្វើការជួសជុលផ្លូវខូចខាត និងបាក់ស្រុតទាំង ២ ខ្សែនេះ ដោយការជួសជុលរួចពេលណា យើងមិនទាន់ដឹងច្បាស់ទេ។ តែសូមឱ្យបងប្អូនយើង ដែលធ្វើដំណើរតាមផ្លូវក្នុងខេត្តកោះកុងមេត្តាប្រុងប្រយ័ត្ន ព្រោះយើងដឹងហើយថា រដូវនេះ ជារដូវភ្លៀង ដូច្នេះ ក្រៅពីបាក់ស្រុតខូចខាតនេះ ផ្លូវយើងក៏មានលក្ខណៈរអិលដែរ»៕
