ភ្នំពេញៈ រដ្ឋបាលខេត្តកំពង់ស្ពឺ បន្តដាក់ចេញវិធានការរដ្ឋបាលរយៈពេល ១ សប្តាហ៍ទៀត រហូតដល់ថ្ងៃទី ២០ ខែមិថុនា ដោយក្នុងនោះការធ្វើអាជីវកម្ម ឬការទទួលទានគ្រឿងស្រវឹងត្រូវបានហាមឃាត់ ខណៈខេត្តកំពង់ចាម សម្រេចបិទខ្ទប់ខ្នងផ្ទះពលរដ្ឋជិត ៥០ គ្រួសារ ដែលស្ថិតក្នុងភូមិចំនួន ១១ នៅស្រុកស្រីសន្ធរ ដើម្បីទប់ស្កាត់ឆ្លងរាលដាលជំងឺកូវីដ ១៩។
សេចក្តីសម្រេចរបស់រដ្ឋបាលខេត្តកំពង់ស្ពឺ ចុះថ្ងៃទី ១៤ ខែមិថុនា បានឲ្យដឹងថា ក្នុងអំឡុងពេលអនុវត្តវិធានការរដ្ឋបាលនេះ គឺតាមបណ្តាភោជនីយដ្ឋាន អាហារដ្ឋាន តូបអាហារចល័តទូទាំងខេត្ត ដែលបើកទទួលអតិថិជនចូលទទួលទាន ត្រូវបានផ្អាកជាបណ្ដោះអាសន្ននៅចន្លោះម៉ោង ២០ (ម្ភៃ) ដល់ម៉ោង ០៣ (បី) ព្រឹក។ ប៉ុន្តែទីតាំងអាជីវកម្មទាំងនោះអាចលក់ អាហារ ជាលក្ខណៈ វេចខ្ចប់បាន។
ចំពោះភោជនីយដ្ឋាន អាហារដ្ឋាន តូបអាហារដែលបើកទទួលអតិថិជនចូលទទួលទានអាហារមិនត្រូវ លក់គ្រឿងស្រវឹងជាដាច់ខាត ហើយគ្រប់ផ្សាររដ្ឋ ផ្សារឯកជន ផ្សារម៉ាត ហាងលក់ភេសជ្ជៈ ក៏ត្រូវផ្អាកការលក់គ្រឿងស្រវឹងគ្រប់ប្រភេទផងដែរ។ នេះបើតាមសេចក្តីសម្រេចរបស់រដ្ឋបាលខេត្ត។
រដ្ឋបាលខេត្តបានបន្តថា៖ «ផ្អាកការជួបជុំជាលក្ខណៈគ្រួសារដែលមានការទទួលទានគ្រឿងស្រវឹង។ រាល់ការធ្វើសកម្មភាពកីឡា ដែលមានលក្ខណៈជួបជុំ ឬ ការប្រមូលផ្តុំមនុស្សលើសពី ២ (ពីរ) នាក់ ត្រូវបានផ្អាកជាបណ្ដោះអាសន្ន។ ការប្រមូលផ្តុំ ឬការជួបជុំគ្នាទទួលទានអាហារ ភេសជ្ជៈ ឬទទួលទាន គ្រឿងស្រវឹង នៅចន្លោះម៉ោង ២០ (ម្ភៃ) ដល់ម៉ោង ០៣ (បី) ព្រឹក គឺត្រូវបានផ្អាកជាបណ្ដោះអាសន្ន»។
នៅចន្លោះម៉ោង ២០ (ម្ភៃ) ដល់ម៉ោង ០៣ (បី) ព្រឹក រដ្ឋបាលខេត្ត បានចាត់ទុកថា ជាករណីដែលអាចលើកលែងចំពោះករណីមួយចំនួនដូចជា ការជួបជុំលក្ខណៈសមាជិកគ្រួសារដែលរស់នៅក្នុងលំនៅឋាន ឬទីសំណាក់ជាមួយគ្នា ការរៀបចំពិធីបុណ្យសព ដោយគោរពតាមវិធានការសុខាភិបាល និងតាមការកំណត់របស់អាជ្ញាធរមានសមត្ថកិច្ច។
ក្នុងនោះការជួបជុំរបស់បុគ្គលិកសុខាភិបាលដែលបំពេញការងារថែរក្សាសង្គ្រោះបន្ទាន់ផ្សេងទៀត និងការជួបជុំរបស់អាជ្ញាធរមានសមត្ថកិច្ចកម្លាំងគណៈបញ្ហាការឯកភាពរដ្ឋបាលខេត្ត ក្រុង ស្រុក ឃុំ សង្កាត់ ក្នុងការបំពេញភារកិច្ចថែរក្សាសន្តិសុខ សណ្ដាប់ធ្នាប់ និងរបៀបរៀបរយសាធារណៈ ក៏ត្រូវបានលើកលែងផងដែរ។
លោក វ៉ី សំណាង អភិបាលខេត្តកំពង់ស្ពឺ បានអះអាងក្នុងសេចក្តីសម្រេចថា ចំពោះបុគ្គល ឬនីតិបុគ្គលទាំងឡាយណា ដែលមិនចូលរួមអនុវត្តតាមខ្លឹមសារដូចមានចែងក្នុងសេចក្តីសម្រេចនេះ រដ្ឋបាលខេត្តនឹងអនុវត្តវិធានការរដ្ឋបាលតាមផ្លូវច្បាប់។
លោកបញ្ជាក់ថា៖ «វិធានការរដ្ឋបាល ដូចបានកំណត់ក្នុងច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺតូវីដ ១៩ និងជំងឺឆ្លងកាចសាហាវ និងប្រកបដោយគ្រោះ ថ្នាក់ធ្ងន់ធ្ងរផ្សេងទៀត ព្រមទាំងលិខិតបទដ្ឋានគតិយុត្តពាក់ព័ន្ធជាធរមាន»។
ចំណែកសេចក្តីសម្រេចរបស់រដ្ឋបាលខេត្តកំពង់ចាម ចុះថ្ងៃទី ១៤ មិថុនានេះដែរ បានឲ្យដឹងថា តាមការកំណត់របស់រដ្ឋបាលស្រុកស្រីសន្ធរ គឺខ្នងផ្ទះប្រជាពលរដ្ឋចំនួន ៤៥ ខ្នងផ្ទះ ត្រូវបានបិទខ្ទប់រយៈពេល ១៤ ថ្ងៃ រហូតដល់ ថ្ងៃទី ២៦ ខែមិថុនា ដោយមូលហេតុមានប្រជាពលរដ្ឋឆ្លងជំងឺកូវីដ ១៩ ក្នុងព្រឹត្តិការណ៍សហគមន៍ ២០ កុម្ភះ។
រដ្ឋបាលខេត្តកំពង់ចាមបានឲ្យដឹងថា ខ្នងផ្ទះទាំងនោះ គឺស្ថិតនៅក្នុង ភូមិចំនួន ១១ ក្នុងឃុំព្រែករំដេង ស្រុកស្រីសន្ធរ ខេត្តកំពង់ចាម ហើយក្នុងពេលបិទខ្ទប់នេះ គឺហាមឃាត់ពលរដ្ឋចេញចូលដោយគ្មានការអនុញ្ញាត ខណៈសមត្ថកិច្ចដែនដី ត្រូវរៀបចំសណ្តាប់ធ្នាប់ និងរបៀបរៀបរយឲ្យបានត្រឹមត្រូវ។
រដ្ឋបាលខេត្តកំពង់ចាម បានបញ្ជាក់ថា៖ «ត្រូវរៀបចំកងកម្លាំងការពារ ដើម្បីការពារកុំឱ្យមានការចេញ-ចូល ឱ្យបានសមស្របទៅតាមទំហំការងារ។ ការពារសន្តិសុខ សណ្តាប់ធ្នាប់សាធារណៈក្នុងតំបន់បិទខ្ទប់ជូនប្រជាពលរដ្ឋឱ្យបានល្អប្រសើរ»។
លោក អ៊ុន ចាន់ដា អភិបាលខេត្តកំពង់ចាម បានលើកឡើងក្នុងសេចក្តីសម្រេចនោះថា ជាមួយនឹងការរៀបចំរបៀបរៀបរយនេះ សមត្ថកិច្ចដែនដី ក៏ត្រូវរៀបចំចងខ្សែហ៊ុំព័ទ្ធ នៅតំបន់បិទខ្ទប់ ឱ្យបានត្រឹមត្រូវ និងរៀបចំឱ្យមានការលក់ដូរម្ហូបអាហារចល័តក្នុងឃុំ ដែលត្រូវបិទខ្ទប់ ១ ថ្ងៃ ១ លើក គឺពីម៉ោង ៨ និង ៣០ នាទី ដល់ ១០ និង ០០ នាទី ឬរៀបចំឱ្យមានការលក់ដូរម្ហូបអាហារនៅតាមព្រំប្រទល់ផងដែរ។
លោកបញ្ជាក់ថា៖ «ត្រូវចាក់ផ្សាយអំពីវិធានការការពារ ៣ កុំ ៣ ការពារ ឱ្យបានមួយថ្ងៃ៣ដង ក្នុងតំបន់បិទខ្ទប់ ត្រូវចាត់មន្ត្រីពាក់ព័ន្ធតាមដានពីសុខភាពប្រជាពលរដ្ឋ ក្នុងតំបន់បិទខ្ទប់ជាប្រចាំ ហើយមន្ត្រីមន្ទីរការងារ និងបណ្តុះបណ្តាលវិជ្ជាជីវៈខេត្តត្រូវស្រាវជ្រាវរកកម្មករ កម្មការី ដែលបានប៉ះពាល់ផ្ទាល់ និងប្រយោល ជាមួយអ្នកជំងឺកូវីដ ១៩»។
បន្ថែមពីនេះ លោក អ៊ុន ចាន់ដា ក៏បានប្រកាសហាមឃាត់ មិនឲ្យមានការជួបជុំនៅក្នុងតំបន់ដែលបានបិទខ្ទប់នោះដែរ ដោយរំពឹងថា ប្រជាពលរដ្ឋ និងមន្ត្រីពាក់ព័ន្ធក្នុងភូមិទាំង ១១ ចូលរួមសហការ និងអនុវត្តឲ្យមានប្រសិទ្ធភាពខ្ពស់៕