The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​ជំនាញ​គ្រោង​ចុះ​ពិនិត្យ​ទីតាំង​ស្នើសុំ​សង់​ទំនប់​ស្ទាក់​ទឹក

មន្ត្រី​ជំនាញ​គ្រោង​ចុះ​ពិនិត្យ​ទីតាំង​ស្នើសុំ​សង់​ទំនប់​ស្ទាក់​ទឹក

Content image - Phnom Penh Post
ព្រះសង្ឃ​និមន្ត​កាត់​ទីតាំង​ដែល​ស្នើសុំ​សង់​ទំនប់​ស្ទាក់​ទឹក​ពីថ្ងៃ​ ១៣ មិថុនា​។ រូបថត ហ្វេសប៊ុក

មន្ត្រី​ជំនាញ​គ្រោង​ចុះ​ពិនិត្យ​ទីតាំង​ស្នើសុំ​សង់​ទំនប់​ស្ទាក់​ទឹក

ព្រៃវែងៈ មន្ត្រី​ជំនាញ​ធនធានទឹក​ខេត្តព្រៃវែង គ្រោង​ចុះទៅពិនិត្យ​ទីតាំង​ជាក់ស្តែង​ ដើម្បី​ធ្វើសំណើ​ទៅកាន់​ក្រសួង​ធនធានទឹក​ក្នុងពេល​ឆាប់ៗ​នេះ បន្ទាប់ពី​មាន​ប្រជាពលរដ្ឋ​ជាង​ ៣០០ ​គ្រួសារ​ដាក់ពាក្យ​ស្នើសុំ​សាងសង់​ទំនប់​ស្ទាក់​ទឹក​នៅ​ភូមិ​ដូនដោក ឃុំ​ជាច ស្រុក​កំចាយមារ ខេត្តព្រៃវែង កាលពី​ថ្ងៃទី​ ១៣ ខែមិថុនា​។

អភិបាលស្រុក​កំចាយមារ លោក សឿង សុជាតិ ថ្លែង​ពី​ម្សិលមិញ​ថា ឯកសារ​សំណើ​របស់​ប្រជាពលរដ្ឋ​ពិតជា​ត្រូវ​បាន​លោកស្រី​មេភូមិ​យក​មក​ជួប​លោក​នៅ​​រដ្ឋបាល​ស្រុក​មែន​កាលពី​ថ្ងៃទី​ ១៣ ខែមិថុនា​។ ក្រោយពី​បាន​ពិនិត្យ​ឯកសារ​ភ្លាមៗ លោក​ក៏បាន​ទាក់ទង​តាម​ទូរស័ព្ទ​ទៅកាន់​ប្រធាន​មន្ទីរ​ធនធានទឹក និង​ឧតុនិយម​ខេត្ត ដើម្បី​ពិភាក្សា​ដោយ​បើក​សំឡេងឮ​ទាំងអស់​គ្នា​។

លោក​ថ្លែងថា​៖ «​លោក​ប្រធាន​មន្ទីរ​ក៏បាន​ផ្តល់យោបល់​ថា ឥឡូវ​ហ្នឹង​ឱ្យ​រង់ចាំ​បន្តិច​សិន​ទៅ​ឱ្យ​ក្រុមការងារ​ខេត្ត​ចុះ​ពិនិត្យមើល​ឱ្យបាន​ច្បាស់លាស់ និង​ស៊ីជម្រៅ​ជាង​ហ្នឹង​សិន ព្រោះ​គម្រោង​នេះ​ចំណាយ​ច្រើន ហើយ​ស្របពេល​ប្រទេស​កំពុង​ជួប​វិបត្តិ​កូវីដ​ ១៩ ​ផង ក្រែង​ដាក់​ទៅ​មិនបាន​សម្រេច​ខ្លាច​ធ្វើឱ្យ​ប្រជាពលរដ្ឋ​អាក់អន់ចិត្ត​»​។

បើតាម​លោក សឿង សុជាតិ ក្រោយពី​បានឮ​ព័ត៌មាន​ពី​ការសម្រេច​របស់​ប្រធាន​មន្ទីរ​ធនធានទឹក លោកស្រី​មេភូមិ​ក៏​យក​ឯកសារ​ត្រឡប់​ទៅវិញ ដោយ​ឯកសារ​នោះ​មិនមាន​រក្សាទុក​នៅ​រដ្ឋបាល​ស្រុក​នោះទេ​។ យ៉ាងណា​ក៏ដោយ​លោក​អភិបាល​ស្រុក​កំចាយមារ​បញ្ជាក់ថា នឹង​បង្កើត​​ក្រុមការងារ​ដើម្បី​ចុះ​ពិនិត្យ​ទីតាំង​ដែល​ពលរដ្ឋ​បាន​សំណូមពរ​នោះ​។

លោក​ថ្លែងថា​៖ «​ដើម្បី​ឆ្លើយតប​សំណូមពរ​របស់​ប្រជាពលរដ្ឋ រដ្ឋបាល​ស្រុក​នឹង​បង្កើត​ក្រុមការងារ​ចុះ​ពិនិត្យ និង​សិក្សា​ដើម្បី​ដាក់សំណើ​ទៅ​ថ្នាក់ដឹកនាំ​ក្នុង​ការពិនិត្យ​លទ្ធភាព ប៉ុន្តែ​ចាំមើល​បញ្ហា​កូវីដ​ថយចុះ​បន្តិច​សិន ហើយក៏​សូម​អធ្យាស្រ័យ​ផងដែរ​ចំពោះ​ប្រជាពលរដ្ឋ​»​។

ស្រដៀង​គ្នា​នោះ លោក ឃុន សាខឿន ប្រធាន​មន្ទីរ​ធនធានទឹក និង​ឧតុនិយម​ខេត្តព្រៃវែង​ថ្លែងថា លោក​នឹង​ចាត់​ឱ្យ​មន្ត្រី​ជំនាញ​ចុះទៅ​សហការ​ជាមួយ​អាជ្ញាធរ​ស្រុក​ក្នុងពេល​ឆាប់ៗ​នេះ​ ដើម្បី​ពិនិត្យមើល​ទីតាំង​ជាក់ស្តែង ដែល​ប្រជាពលរដ្ឋ​បានដាក់​ពាក្យស្នើសុំ​នោះ​។

លោក​ថា​៖ «​ជារួម ខេត្ត​មិនមាន​ថវិកា​ឯណា​សម្រាប់​ធ្វើ​កិច្ចការងារ​ធំៗ​ទេ អ៊ីចឹង​មានតែ​ខាង​ខ្ញុំ​ចុះទៅ​សិក្សា​មើល ហើយ​ធ្វើសំណើ​ទៅខាង​ក្រសួង ថា​តើ​វា​ជា​រឿង​របស់​ក្រសួង​ធនធានទឹក​ឬ​យ៉ាងណា​។ ចំពោះ​ពេលវេលា​ចុះ​ទៅ​ពិនិត្យ​ទីតាំង​នោះ​មិនអាច​ប្រាប់​ឱ្យ​ច្បាស់​ថា​ថ្ងៃ​ណា​បានទេ ដោយសារ​ពេលនេះ​មាន​ការរវល់​ខ្លាំង អ៊ីចឹង​ប្រហែលជា​អាច​នឹងធ្វើ​ឡើង​នៅ​អាទិត្យ​ក្រោយ​អីហ្នឹង​»​។

ភ្នំពេញ​ ប៉ុស្តិ៍​ មិនអាច​ស្វែងរក​ការបំភ្លឺ​ពី​តំណាង​ប្រជាពលរដ្ឋ​បានទេ កាលពី​ម្សិលមិញ​។ ប៉ុន្តែ​បើ​យោងតាម​លិខិត​​ដែល​ត្រូវបាន​គេ​បង្ហោះ​លើ​បណ្តាញ​សង្គម​ហ្វេសប៊ុក​ដែល​ភ្នំពេញ​ប៉ុស្តិ៍​ទទួលបាន​ពី​ម្សិលមិញ​បាន​ឱ្យ​ដឹងថា មាន​ប្រជាពលរដ្ឋ​ជាង​ ៣០០ ​គ្រួសារ​ បាន​​ស្រុះស្រួល​គ្នា​ឱ្យ​តំណាង​របស់​​ខ្លួន​ដាក់ពាក្យ​ស្នើសុំ​សាងសង់​ទំនប់​ស្ទាក់​ទឹក ស្ពាន និង​ទ្វារបិទ បើក​ឆ្លងកាត់​ស្ទឹង​ស្ថិត​នៅ​ភូមិ​ដូនដោក ឃុំ​ជាច ស្រុក​កំចាយមារ ខេត្តព្រៃវែង​។

លិខិតស្នើ​សុំ​នោះ​ពលរដ្ឋ​ផ្ញើ​ទៅកាន់​រដ្ឋមន្ត្រី​ក្រសួង​ធនធាន​ទឹក និង​ឧតុនិយម លោក លឹម គានហោ តាមរយៈ​អាជ្ញាធរ​ឃុំ ស្រុក និង​មន្ទីរ​ធនធានទឹក​ខេត្តព្រៃវែង​។ ​ក្នុង​លិខិត​បាន​​ឱ្យដឹងទៀតថា ទំនប់​ស្ទាក់ទឹក​មាន​ប្រវែង​ប្រមាណ​ ២ ០០០ ​ម៉ែត្រ ចំណែក​ស្ពាន និង​ទ្វារ​បិទ​បើកទឹក​មាន​ប្រវែង​ ៣០ ​ម៉ែត្រ ដែល​អាច​ផ្ដល់​ផលប្រយោជន៍​ដល់​ប្រជាពលរដ្ឋ​ជាច្រើន​ភូមិ ជាពិសេស​ភូមិ​ដូនដោក ភូមិ​កោះខ្ជាយ និង​ភូមិ រហាល ឃុំ​ជាច ស្រុក​កំចាយមារ ខេត្តព្រៃវែង​។

ក្នុង​លិខិត​សរសេរថា «​ទំនប់​ខាងលើនេះ នឹង​ផ្តល់​ទឹក​ស្រោចស្រព​លើ​ផ្ទៃដី​ស្រែវស្សា​បាន​ប្រមាណ​ជាង ១ ០០០ ​ហិកតា ប្រជាពលរដ្ឋ ៣៣៨ ​គ្រួសារ ឬ​ស្មើនឹង​ប្រជាពលរដ្ឋ​ចំនួន ១ ៤៥៩ ​នាក់​អាច​ធ្វើ​ដំណើរ​ឆ្លងកាត់​ទៅធ្វើ​ស្រែ និង​ដឹកជញ្ជូន កសិផល មកកាន់​លំនៅឋាន​បាន​យ៉ាង​ងាយស្រួល​»​។

លិខិត​ដដែល​បញ្ជាក់ថា ម្យ៉ាង​​វិញទៀត ក្រោយពេល​ទំនប់​ស្ទាក់ទឹក ស្ពាន និង​ទ្វារ​ទឹក​បិទ​បើក​នេះ​ត្រូវ​បាន​សាងសង់​រួចរាល់ ពលរដ្ឋ​នឹងមាន​លទ្ធភាព​ធ្វើស្រែ​ប្រាំង​បាន​ ១ ​ដង​ ឬ​ ២ ​ដង​​ ដើម្បី​បង្កើន​ប្រាក់ចំណូល​ទ្រទ្រង់​ជីវភាព​គ្រួសារ ស្រប​តាម​គោលនយោបាយ​កាត់បន្ថយ ភាពក្រីក្រ​របស់​រាជរដ្ឋាភិបាល​។

អ្នកស្រី អ៊ាង គឹមលី មន្ត្រី​សមាគម​អាដហុក​ប្រចាំខេត្ត​​ព្រៃវែង​បាន​ថ្លែង​ពី​ម្សិលមិញ​ថា លោកស្រី​មិនបាន​ទទួល​ពាក្យបណ្តឹង ឬ​ការស្នើសុំ​សម្របសម្រួល​ណាមួយ​ពី​ប្រជាពលរដ្ឋ​នៅ​ភូមិ​ដូន​ដោក ឃុំ​ជាច ស្រុក​កំចាយមារ​នោះទេ ជុំវិញ​រឿង​ស្នើសុំ​សាងសង់​ទំនប់​ស្ទាក់ទឹក​នេះ​៕

អត្ថបទគួរចាប់អារម្មណ៍