ស្ទឹងត្រែងៈសត្វផ្សោត ១ ក្បាល ទម្ងន់ ១៨០ គីឡូក្រាមនៅអន្លង់ផ្សោតអូរឈើទាលក្នុងឃុំព្រះរំកិល ស្រុកបុរីអូរស្វាយសែនជ័យ ខេត្តស្ទឹងត្រែង ត្រូវបានប្រទះឃើញងាប់កាលពីថ្ងៃទី ១៤ ខែមិថុនា ដែលសង្ស័យបណ្ដាលមកវ័យចំណាស់។
លោក សន ប៉ាន់ មេភូមិអន្លង់ស្វាយ ឃុំព្រះរំកិល ប្រាប់ ភ្នំពេញ ប៉ុស្តិ៍ នៅថ្ងៃទី ១៤ ខែមិថុនាថា ផ្សោតនេះមានប្រវែង ២៣០ សង់ទីម៉ែត្រ និងត្រូវបានប្រជានេសាទប្រទះឃើញងាប់ ខណៈកំពុងបង់សំណាញ់ដែលករណីនេះទំនងជាកើតឡើងកាលពីល្ងាចថ្ងៃទី ១២ ខែមិថុនា។
លោកថ្លែងថា៖ «យើងវាយតម្លៃផ្សោតរបស់យើងចុះធ្វើការ (ដូច) រាល់ដងអ៊ីចឹង។ (ស្លាប់) នៅខ្ទង់ថ្ងៃទី ១២ (មិថុនា) ពេលល្ងាចព្រោះថ្ងៃទី ១២ ពេលព្រឹក យើងចុះធ្វើការ ផ្សោតនៅទាំង ២ ទេ។ អ៊ីចឹងវាបាត់នៅពេលល្ងាចហ្នឹងហើយព្រោះថ្ងៃទី ១៣ យើងរកវាអត់ឃើញ។ ថ្ងៃទី ១៤ ទៅបានប្រទះឃើញ (ស្លាប់)»។
លោកបន្តថា ប្រជានេសាទគាត់ធ្វើនេសាទបង់សំណាញ់ពេលយប់។ អ៊ីចឹងគាត់ជួបគាត់ប្រទះឃើញទៅក៏រាយការណ៍មកមេឃុំ។ ក្រុមឆ្មាំយើងក៏ចុះទៅមើលនៅកន្លែងហេតុការណ៍ដែលកើតឡើងហ្នឹង»។
លោកបន្តថា ផ្សោតនេះត្រូវបានក្រុមការងារជំនាញយកទៅពិនិត្យ ដើម្បីធ្វើកោសល្យវិច័យ។
លោក សន ប៉ាន់ ថ្លែងថា៖ «អ៊ីចឹងវាក៏សោកស្តាយមែនទែនហើយ។ វានៅតែ ២ សោះ។ ឥឡូវាបាត់ ១ ទៀត។ វានៅសល់តែ ១»។
លោក សេង ទៀក នាយកប្រចាំប្រទេសនៃមូលនិធិអភិរក្សនិងសង្គ្រោះសត្វព្រៃកម្ពុជាប្រាប់ ភ្នំពេញ ប៉ុស្តិ៍ នៅថ្ងៃទី ១៤ ខែមិថុនាថា ផ្សោតដែលងាប់នេះគឺជាផ្សោតញី ហើយបន្ទាប់ពិនិត្យមើលសាកសពផ្សោតនេះ គឺមិនមានស្លាកស្នាមអ្វីនោះទេនៅលើដងខ្លួនផ្សោតនោះ។
លោកថ្លែងថា៖ «គ្រាន់តែ Team (ក្រុមការងារ) យើងសង្ស័យជំហានដំបងប្រហែលជាសាកសពហ្នឹងចាស់។ ស្លាប់ (ដោយចាស់)»។
នេះជាលើកទី២ ហើយ សម្រាប់ឆ្នាំនេះ ដែលផ្សោតនៅអន្លង់ផ្សោតអូរឈើទាលបានងាប់ ក្រោយពីមានផ្សោត ១ ក្បាលផ្សេងទៀតបានងាប់កាលពីខែមេសា៕