ភ្នំពេញៈ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា កម្មករនិយោជិតជាង ៦ ០០០ នាក់ ដែលកំពុងត្រូវបានព្យួរការងារ ឬបាត់បង់ការងារដោយសារវិបត្តិជំងឺកូវីដ ១៩ បានចូលរួមវគ្គបណ្តុះបណ្តាលពិសេសរយៈពេល ៤ ខែ ខណៈកម្មករនិយោជិតជិត ៧ ម៉ឺននាក់ បានបញ្ចប់ការសិក្សាជំនាញទន់។
ការថ្លែងបែបនេះបានធ្វើឡើងតាមប្រព័ន្ធហ្វេសប៊ុកឡាយនៅក្នុងឱកាសដែលលោកបានថ្លែងសុន្ទរកថា ដើម្បីចូលរួមអបអរសាទរទិវាអប់រំបណ្តុះបណ្តាលបច្ចេកទេស និងវិជ្ជាជីវៈ TVET លើកទី ៤ ដែលត្រូវបានប្រារព្ធធ្វើឡើងជារៀងរាល់ឆ្នាំ នៅថ្ងៃទី ១៥ ខែមិថុនា។
លោក អ៊ិត សំហេង បានលើកឡើងថា កម្មករនិយោជិតចំនួន ៦ ៥០០ នាក់ ដែលកំពុងត្រូវបានព្យួរការងារ ឬបាត់បង់ការងារដោយសារវិបត្តិជំងឺកូវីដ ១៩ បានទទួលវគ្គបណ្តុះបណ្តាលពិសេសមួយដែលមានភាពបត់បែន និងផ្តោតលើគុណភាព ហើយក្រោយពេលបញ្ចប់ការសិក្សាត្រូវទទួលបានសញ្ញាបត្របច្ចេកទេស និងវិជ្ជាជីវៈ ១ ពិសេសដែលមានរយៈពេល ៤ ខែ។
បន្ថែមពីនេះ លោកថា កម្មករទាំងនោះក៏ទទួលបានប្រាក់ឧបត្ថម្ភក្នុងអំឡុងពេលសិក្សាផងដែរដោយសិក្ខាកាមម្នាក់ទទួលបាន ២០ ម៉ឺនរៀល ក្នុងរយៈពេល ១ ខែ ដើម្បីផ្តល់ឱកាសឱ្យពួកគាត់ទទួលបាននូវជំនាញមួយច្បាស់លាស់ សម្រាប់ចាប់យកការងារថ្មី នៅក្នុងទីផ្សារការងារដែលកំពុងមានតម្រូវការខ្ពស់នាពេលបច្ចុប្បន្ន និងទៅអនាគត។ ក្នុងអំឡុងពេលដូចគ្នានេះមានកម្មករនិយោជិត នៅតាមបណ្តារោងចក្រ សហគ្រាសចំនួន ៦៨ ០០០ នាក់ បានទទួលការបណ្តុះបណ្តាលជំនាញទន់។
លោក អ៊ិត សំហេង បានឱ្យដឹងទៀតថា មុនដំណាច់ឆ្នាំ ២០២០ ក្រសួងបានដាក់ចេញនូវផែនការមេសម្រាប់អភិវឌ្ឍគ្រឹះស្ថាន TVET រយៈពេល ៥ ឆ្នាំ ពីឆ្នាំ ២០២១ ដល់ឆ្នាំ ២០២៥ ដែលគ្រោងចំណាយថវិកាប្រមាណចំនួន ៤៩៣ លានដុល្លារ ដោយផ្តោតលើយុទ្ធសាស្ត្រចំនួន ៤។
លោកបានបញ្ជាក់ថា៖ «យុទ្ធសាស្ត្រចំនួន ៤ នោះ គឺរួមមាន ១ ការកសាង និងកែលម្អហេដ្ឋារចនាសម្ព័ន្ធរូបវន្តរបស់គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ ២ ការបំពាក់ឧបករណ៍ បរិក្ខារ និងសម្ភារបណ្តុះបណ្តាល ៣ ការពង្រឹងសមត្ថភាពអ្នកដឹកនាំគ្រប់គ្រង មន្ត្រីជំនាញ និងគ្រូបច្ចេកទេស និង ៤ ការបង្កើនបរិមាណ និងគុណភាពជំនាញបច្ចេកទេស និងវិជ្ជាជីវៈប្រកបដោយបរិយាប័ន្នយេនឌ័រ»។
ក្នុងនោះ លោក អ៊ិត សំហេង ក៏បានលើកឡើងពីកិច្ចខិតខំប្រឹងប្រែងរបស់ក្រសួងការងារ ដើម្បីលើកកម្ពស់ការអប់រំបណ្តុះបណ្តាលបច្ចេកទេស និងវិជ្ជាជីវៈក្នុងការជំរុញការអភិវឌ្ឍកម្លាំងពលកម្មជំនាញ ប្រកបដោយគុណភាព និងប្រសិទ្ធភាព ដើម្បីឱ្យឆ្លើយតបទៅនឹងតម្រូវការទីផ្សារការងារក្នុង និងក្រៅប្រទេសទៀតផង។
លោកបញ្ជាក់ថា៖ «ស្ថិតក្នុងបរិបទនៃជំងឺរាតត្បាតជាសកលកូវីដ ១៩ មកលើបញ្ហាសុខភាពសាធារណៈ សេដ្ឋកិច្ចសង្គមការអប់រំ និងបណ្តុះបណ្តាល និងជីវភាពរស់នៅប្រចាំថ្ងៃរបស់ប្រជាពលរដ្ឋ ការបាត់បង់ការងារជាច្រើន ហើយថែមទាំងបន្ទុចបង្អាក់ដល់ការអភិវឌ្ឍឈានឡើងរបស់កម្ពុជាផងដែរ»។
បើតាម លោក អ៊ិត សំហេង សម្រាប់ឆ្នាំសិក្សា ២០២០-២០២១ នេះគិតត្រឹមខែមិថុនា មានសិក្ខាកាមសិស្សនិស្សិតប្រមាណជិត ៤០ ០០០ នាក់ បាននិងកំពុងសិក្សាពីចម្ងាយ ឬអនឡាញនៅតាមគ្រឹះស្ថានអប់រំ បណ្តុះបណ្តាលបច្ចេកទេស និងវិជ្ជាជីវៈទាំងសាលារដ្ឋ សាលាឯកជន និងសាលាអង្គការសមាគមទូទាំងប្រទេស។
លោក ភា រម្យ ជាកម្មករម្នាក់ធ្វើការនៅរោងចក្រមួយក្នុងរាជធានីភ្នំពេញ បានចាត់ទុកការបណ្តុះបណ្តាលផ្នែកបច្ចេកទេស និងវិជ្ជាជីវៈដល់កម្មករនេះថា ជាការបន្ថែមនូវជំនាញដែលកម្មករ ស្រលាញ់ និងពិតជាការប្រសើរសម្រាប់កម្មករ។
លោកមើលឃើញថា៖ «បើកម្មករចេះជំនាញផ្សេងទៀត ក្រៅពីធ្វើការរោងចក្រ គឺល្អច្រើន ព្រោះពួកគាត់ក៏អាចប្រកបរបរផ្ទាល់ខ្លួន ដើម្បីចិញ្ចឹមជីវិត នៅពេលមានការបិទ ឬបញ្ចប់ការងារពីរោងចក្រអីទៅ»។
លោក ឌី ថេហូយ៉ា មន្ត្រីកម្មវិធីផ្នែកសិទ្ធិពលករចំណាកស្រុកនៃមជ្ឈមណ្ឌលសម្ព័ន្ធភាពការងារកម្ពុជា ហៅកាត់សង់ត្រាល់បានលើកឡើងថា នេះគឺជាជំហានមួយល្អដែលក្រសួងបានលើកកម្ពស់ និងជំរុញដល់ការអប់រំបណ្តុះបណ្តាលបច្ចេកទេស និងវិជ្ជាជីវៈទៅកាន់ប្រជាពលរដ្ឋឱ្យមានការយល់ដឹង។
ប៉ុន្តែលោកចង់ឃើញស្ថាប័នពាក់ព័ន្ធគួរផ្តល់តម្លៃដល់ជំនាញទាំងនេះឱ្យអាចប្រៀបធៀបគ្នានឹងការសិក្សាទូទៅដើម្បីឱ្យពលរដ្ឋ ទទួលស្គាល់ពីតម្លៃនៃការសិក្សាលើជំនាញបច្ចេកទេស និងវិជ្ជាជីវៈ។
បន្ថែមពីនេះលោក ឌី ថេហូយ៉ា ក៏ជំរុញឱ្យក្រសួងការងារ គួរយកចិត្តទុកដាក់បណ្តុះបណ្តាលដល់ពលរដ្ឋ ជាពិសេសយុវជននូវជំនាញដែលអាចមានតម្រូវការក្នុងទីផ្សារជាក់ស្តែងដើម្បីកាត់បន្ថយការប្រើប្រាស់កម្លាំងពលកម្មជំនាញពីបរទេសដែលមិនមែនជាជនជាតិខ្មែរច្រើនលើសលប់។
លោកបញ្ជាក់ថា៖ «ដូចជាក្នុងវិស័យសំណង់ជាដើម ខ្ញុំឃើញថា ពលរដ្ឋខ្មែរយើងធ្វើការងារសំណង់នេះដែរ ប៉ុន្តែមិនមែនស្ថិតក្នុងលំដាប់កម្មករជំនាញនោះទេ ហើយតែងយកជនជាតិវៀតណាម ឬជនជាតិចិនអីមកធ្វើអីអ៊ីចឹង។ ការបណ្តុះបណ្តាលវិជ្ជាជីវៈនេះ យើងសម្លឹងមើលថា តើអ្វីដែលជាតម្រូវការក្នុងការអភិវឌ្ឍប្រទេសជាតិយើង ដើម្បីឆ្លើយតបទៅនឹងតម្រូវការបច្ចុប្បន្នឱ្យគាត់បានដឹងថា ពេលរៀនចប់មកបានការងារធ្វើ និងបានប្រាក់ខែសមរម្យ ដើម្បីផ្គត់ផ្គង់ជីវភាពរបស់គាត់»។
លោក ធៀវ អៀង នាយកក្រុមហ៊ុន អ៊ីស៊ី រីហ្វ្រីជីរេសិន ដែលធ្វើការលើបរិក្ខារត្រជាក់ បាននិយាយថា ធនធានមនុស្សដែលមានជំនាញផ្នែកបច្ចេកទេស កំពុងតែមានទីផ្សារ ព្រោះដោយសារតែពេលនេះ ប្រទេសកម្ពុជាកំពុងតែត្រូវការធនធានទាំងនេះ ដើម្បីធ្វើការអភិវឌ្ឍប្រទេស។
លោកបញ្ជាក់ថា ជាក់ស្តែងសម្រាប់ក្រុមហ៊ុនលោកក៏កំពុងតែត្រូវការអ្នកមានជំនាញទាំងនេះ ប៉ុន្តែធនធានដែលមានពិតប្រាកដពាក់ព័ន្ធនឹងវិស័យនេះ គឺមានតិចតួច។
លោកបានបន្ថែមថា៖ «ពលរដ្ឋយើងមិនសូវចូលចិត្តរៀនជំនាញបច្ចេកទេសទេ ព្រោះពួកគាត់យល់ថា ធ្វើជាងមើលទៅមិនល្អមើល ប៉ុន្តែបើនិយាយទៅតាមពាក្យខ្មែរ គេថាមិនល្អមើល តែល្អស៊ី គឺបានន័យថា ពួកគាត់គឺគេត្រូវការណាស់។ ប្អូនៗយើងមើលៗទៅ ប្អូនៗគួរតែស្វែងរកជំនាញបច្ចេកទេសអីវិញទៅ ព្រោះទីផ្សារគេកំពុងទូលាយ»៕