.jpg)
សិស្សកម្ពុជា ដែលចូលរួមក្នុងកម្មវិធី ប្រកួតគណិតវិទ្យាអូឡាំព្យាដ។ រូបថត ក្រសួងអប់រំ
ភ្នំពេញៈ ក្រសួងអប់រំ យុវជន និងកីឡានៅថ្ងៃទី ១៥ ខែមិថុនានេះ បានប្រកាសអបអរដល់សិស្សកម្ពុជាចំនួន ២៣ នាក់ ដែលបានទទួលជយលាភី មេដាយមាស មេដាយប្រាក់ និងមេដាយសំរឹទ្ធក្នុងកម្មវិធីប្រកួតគណិតវិទ្យាអូឡាំព្យាដអាស៊ី-សិង្ហបុរីឆ្នាំ ២០២១ ក្នុងចំណោមសិស្ស ២៨ ៧៦០ នាក់ មកពី ២៦ ប្រទេស ដែលបានចូលរួមការប្រកួតប្រជែងនេះ។
ក្រសួងអប់រំបានឱ្យដឹងថា កម្មវិធី SASMO ត្រូវបានបង្កើតឡើងក្នុងឆ្នាំ ២០០៦ ដែលជាការប្រកួតគណិតវិទ្យាធំជាងគេមួយនៅអាស៊ី។ នៅឆ្នាំ ២០២១ នេះ មានសិស្សពូកែគណិតវិទ្យាចំនួន ២៨ ៧៦០ នាក់ មកពី ២៦ ប្រទេស ចូលរួមការប្រកួតប្រជែង។
ក្រសួងបញ្ជាក់ថា នៅឆ្នាំ ២០២១ នេះ សាលាអន្តរជាតិតិចសាសបានបញ្ជូនសិស្សានុសិស្សឱ្យចូលរួមការប្រកួត SASMO ហើយជាលទ្ធផលគឺសិស្សចំនួន ២ នាក់ បានទទួលមេដាយមាស ១ នាក់ទទួលមេដាយប្រាក់ ៨ នាក់ ទទួលមេដាយសំរឹទ្ធ និង ២ នាក់ ទទួលបានជយលាភីកិត្តិយស។ ចំណែកសាលា អន្តរជាតិ វើលដ៍ កម្ពុជា មានសិស្សចូលរួមប្រកួតចំនួន ១០ នាក់ក្នុងនោះ សិស្ស ១ នាក់បានទទួលមេដាយមាស និង ៩ នាក់ទៀតបានទទួលមេដាយសំរឹទ្ធ។
ក្រសួងអប់រំបញ្ជាក់ថា៖ «ជាមួយភាពជាក់ស្តែង និងស្តង់ដាខ្ពស់នៃការប្រកួតប្រជែង SASMO មានគោលបំណងដើម្បីពង្រីកសក្តានុពលនៃការគិតរបស់សិស្សានុសិស្សដែលចូលរួមការប្រឡង និងជួយពួកគេក្នុងការធ្វើឱ្យប្រសើរឡើងនៅក្នុងមុខវិជ្ជាគណិតវិទ្យា ក៏ដូចជាជំនាញក្នុងការគិតគូរខ្ពស់ជាងមុន»។
ចំណែកគណៈគ្រប់គ្រងសាលាអន្តរជាតិវើលដ៍កម្ពុជាបានឱ្យអបអរដល់សិស្សរបស់ខ្លួនដែលបានទទួល មេដាយថ្នាក់អន្តរជាតិក្នុងការប្រកួតប្រជែងសិស្សឆ្នើមផ្នែកគណិតវិទ្យាអូឡាំព្យាដ កម្រិតស្តង់ដាអន្តរជាតិនេះ។
គណៈគ្រប់គ្រងសាលានេះលើកឡើងថា៖ «យើងខ្ញុំពិតជាមានមោទនភាពជាខ្លាំង ចំពោះប្អូនៗ និងសូមកោតសរសើរពីសមត្ថភាព និងភាពឈ្លាសវៃរបស់ពួកគាត់។ សាលាជឿជាក់យ៉ាងមុតមាំថាប្អូនៗសិស្សានុសិស្សរបស់ពួកយើងនឹងក្លាយទៅជាជំហរដ៏រឹងមាំមួយសម្រាប់សង្គម គ្រួសារ និងជាធនធានមនុស្សដ៏ប្រពៃក្នុងការចូលរួមអភិវឌ្ឍប្រទេសជាតិយើងទាំងមូលនាថ្ងៃអនាគត»៕
