ភ្នំពេញៈ កម្លាំងគណៈបញ្ជាការឯកភាពរាជធានីសហការជាមួយសមត្ថកិច្ចខណ្ឌពោធិ៍សែនជ័យបានឃាត់ខ្លួនមនុស្សប្រុសស្រីចំនួន ៣២ នាក់នៅក្នុងប្រតិបត្តិការចុះបិទភោជនីយដ្ឋាន និងខារ៉ាអូខេ ១ កន្លែងយីហោផាតធី នៅតាមបណ្តោយផ្លូវបេតុង ក្នុងភូមិប៉ប្រកត្បូង សង្កាត់កាកាបទី១ ខណ្ឌពោធិ៍សែនជ័យពាក់ព័ន្ធករណីល្មើសបម្រាមរបស់រដ្ឋបាលរាជធានីភ្នំពេញ ក្នុងការទប់ស្កាត់ការរីករាលដាលនៃជំងឺកូវីដ ១៩។
លោក ម៉ន វុធី អធិការខណ្ឌពោធិ៍សែនជ័យប្រាប់ ភ្នំពេញ ប៉ុស្តិ៍ កាលពីម្សិលមិញថា សមត្ថកិច្ចបានចុះទៅបង្ក្រាប និងបិទហាងខារ៉ាអូខេ «យីហោផាតធី» កាលពីយប់ថ្ងៃទី ១៤ មិថុនា ដោយបានឃាត់ខ្លួនមនុស្សចំនួន ៣២ នាក់ និងបានបញ្ជូនអ្នកទាំងនោះទៅធ្វើចក្តាឡីស័កនៅស្នងការដ្ឋាននគរបាលរាជធានីភ្នំពេញ។
លោក សាន សុខសីហា អ្នកនាំពាក្យស្នងការនគរបាលរាជធានីភ្នំពេញ បានឱ្យដឹងដែរថា ក្រោមការដឹកនាំរបស់គណៈបញ្ជាការឯកភាពរាជធានីភ្នំពេញរួមជាមួយនឹងសមត្ថកិច្ចខណ្ឌពោធិ៍សែនជ័យបានចុះបង្ក្រាប និងបិទទីតាំងភោជនីយដ្ឋាន ១ កន្លែង ឈ្មោះ ផាតធី និងឃាត់ខ្លួនមនុស្សចំនួន ៣២ នាក់ ក្នុងនោះមានស្រីចំនួន ១៦ នាក់ ដែលសុទ្ធតែជនជាតិខ្មែរ និងបាននាំមកកាន់ស្នងការដ្ឋាននគរបាលរាជធានីភ្នំពេញ។
លោកបានបន្តថា ជំហានដំបូងសមត្ថកិច្ចមិនទាន់មានចំណាត់ការចំពោះបុគ្គលទាំង ៣២ នាក់នេះ នៅឡើយទេ ដោយរង់ចាំក្រុមគ្រូពេទ្យចុះមកយកសំណាកទៅពិនិត្យរកវីរុសកូវីដ ១៩ ជាមុនសិន ដើម្បីឱ្យបានដឹងថា បុគ្គលទាំងនេះអ្នកណាមាន ឬគ្មានជំងឺកូវីដ ១៩។
ទោះជាយ៉ាងណា លោក សាន សុខសីហា បានបញ្ជាក់ថា នេះមិនមែនជាករណីលើកទី១ ទេ ដែលសមត្ថកិច្ចរបស់ស្នងការដ្ឋាននគរបាលរាជធានីភ្នំពេញបានចុះបង្ក្រាប ប៉ុន្តែកន្លងទៅថ្មីៗនេះក៏បានចុះទៅបង្ក្រាបទីតាំងក្លិបមួយនៅក្នុងសង្កាត់បឹងកេងកង ខណ្ឌបឹងកេងកងផងដែរ ដោយបានឃាត់ខ្លួនមនុស្សមួយចំនួនក្នុងនោះមានម្ចាស់ទីតាំង និងអ្នកពាក់ព័ន្ធមួយចំនួនត្រូវបានបញ្ជូនទៅតុលាការ និងមួយចំនួនទៀតក៏បានអប់រំមុនឱ្យត្រឡប់ទៅកាន់គេហដ្ឋានវិញជាពិសេសភ្ញៀវ។
លោក សាន សុខសីហា បានថ្លែងថា៖ «ចំពោះករណីភោជនីយដ្ឋាន និង ខារ៉ាអូខេ យីហោផាតធីនេះ យើងរង់ចាំមើលថា តើលទ្ធផលនៃការធ្វើតេស្ដកូវីដ វាយ៉ាងម៉េចវិញ យើងនឹងបន្តសាកសួរបន្ថែមទៀត»។
បើតាមលោក សុខសីហា ដោយមានការណែនាំពីអភិបាលរាជធានីភ្នំពេញ និងអគ្គស្នងការរង និងជាស្នងការនគរបាលរាជធានីភ្នំពេញ កម្លាំងសមត្ថកិច្ចនឹងបន្តអនុវត្តរហូតដល់ដំណាច់ខែនេះ ខណៈបច្ចុប្បន្នសមត្ថកិច្ចនគរបាលរាជធានីភ្នំពេញបានដាក់វេនគ្នាចុះជាប្រចាំតាមបណ្តាខណ្ឌ ដើម្បីពិនិត្យមើលថា តើនៅមានក្លិប ឬខារ៉ាអូខេណាផ្សេងទៀតកំពុងបើកដំណើរការ ហើយប្រសិនបើរកឃើញ សមត្ថកិច្ចនឹងបង្ក្រាបភ្លាម៕