.jpg)
ទិដ្ឋភាពនៃកិច្ចប្រជុំថ្នាក់ដឹកនាំគ្រឹះស្ថានសិក្សាឯកជននិងផ្នែកពាក់ព័ន្ធកាលពីម្សិលមិញ ។ រូបថត សភាពាណិជ្ជកម្ពុជា
ភ្នំពេញៈ ថ្នាក់ដឹកនាំគ្រឹះស្ថានសិក្សាឯកជនជាង១០០បានឯកភាពស្នើសុំជួបពិភាក្សាជាមួយភាគីរាជរដ្ឋាភិបាលនិងក្រសួងពាក់ព័ន្ធ ដើម្បីស្វែងរកវិធីបើកដំណើការសាលារៀនឡើងវិញ ខណៈគ្រឹះស្ថានសិក្សាភាគច្រើនកំពុងប្រឈមនឹងការក្ស័យធននិងឈានទៅការបិទទ្វារ។
ថ្លែងនៅក្នុងកិច្ចប្រជុំតាមអនឡាញ លោក ហេង វ៉ាន់ដា នាយកវិទ្យាស្ថានវ៉ាន់ដានិងជាប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាកម្ពុជាបានលើកឡើងអំពីផលប៉ះពាល់ដែលកើតឡើងពីការរីរាលដាលជំងឺកូវីដ ១៩ និងបញ្ហាប្រឈម ដើម្បីស្នើសុំរកដំណោះស្រាយពីរដ្ឋាភិបាលនិងក្រសួងពាក់ព័ន្ធ។
លោកបានប្រាប់ភ្នំពេញប៉ុស្ដិ៍ក្រោយបញ្ចប់កិច្ចប្រជុំនេះថា ជំងឺកូវីដ ១៩ បានកើតឡើងតាំងពីឆ្នាំ ២០២០ បានធ្វើឱ្យគ្រឹះស្ថានសិក្សាឯកជនរងផលប៉ះពាល់រយៈពេលពេញ១ឆ្នាំរួចទៅហើយ។ រីឯឆ្នាំ២០២១នេះក៏កើតមានព្រឹត្ដិការណ៍ ២០ កុម្ភៈ ដែលកំពុងជះឥទ្ធិពលធ្ងន់ធ្ងរដល់គ្រឹះស្ថានសិក្សាឯកជន។
លោកថ្លែងថា៖ «លទ្ធផលនៃកិច្ចប្រជុំមានច្រើនចំណុច ប៉ុន្ដែអ្វីដែលអង្គប្រជុំលើកឡើងដើម្បីគោរពជូនរាជរដ្ឋាភិបាលស្នើសុំជួយដោះស្រាយ គឺធ្វើយ៉ាងណាអាចឱ្យគ្រឹះស្ថានសិក្សាឯកជនអាចមានស្ថិរភាពបន្តទៅមុខទៀតបាន»។
លោកបន្តថា៖ «គ្រឹះស្ថានសិក្សាឯកជនគឺមិនអាចធន់ទ្រាំបានបន្តទៅទៀតបានទេ គឺស្នើសុំឱ្យបើកដំណើការសិក្សាឡើងវិញព្រោះយើងមិនដឹងការរីករាលដាលជំងឺកូវីដ ១៩ នេះ ពេលណាអាចបិទបញ្ចប់»។
លោកបន្តថា ការស្នើសុំបើកដំណើការសាលារៀនឡើងវិញនេះ គឺឈរលើវិធីសាស្រ្ដសិក្សាក្នុងថ្នាក់ខ្លះនិងរៀនតាមអនឡាញខ្លះ (Online Plus) ដើម្បីកាត់បន្ថយចំនួនសិស្សរៀនក្នុងថ្នាក់ និងកុំឱ្យសិស្សរៀនតែតាមអនឡាញ។
លោកថ្លែងថា៖ «យើងនឹងប្រមូលលទ្ធផលដែលទទួលបានពីកិច្ចប្រជុំនេះ ធ្វើលិខិតស្នើសុំទៅជួបពិភាក្សាជាមួយក្រសួងពាក់ព័ន្ធ ដើម្បីជម្រាបពីបញ្ហានិងការព្រួយបាម្ភរបស់យើង»។
ឆ្លើយតបនឹងបញ្ហានេះ មន្រ្ដីនាំពាក្យ ក្រសួងអប់រំ យុវជន និងកីឡា លោក រស់ សុវាចា បានលើកទឹកចិត្តឱ្យគ្រឹះស្ថានសិក្សាឯកជន និងភាគីពាក់ព័ន្ធបន្តពិភាក្សាចរចាគ្នារកដំណោះស្រាយសមស្របនិងសម្បទានគ្នាទៅវិញទៅមកព្រោះទាំងអស់គ្នាសុទ្ធតែររងផលប៉ះពាល់ពីការរីករាលដាលជំងឺកូវីដ ១៩។
យ៉ាងណាក្ដី លោក រស់ សុវាចា បានថ្លែងថា ជារួមក្រសួងអប់រំបន្តផ្អាកគ្រឹះស្ថានសិក្សាសាធារណៈនិងឯកជននៅទូទាំងប្រទេសដោយបន្តតាមដាននិងវាយតម្លៃស្ថានភាពព្រឹត្តិការណ៍សហគមន៍២០កុម្ភៈ។ប៉ុន្តែចំពោះមុខនេះក្រសួងអប់រំលើកទឹកចិត្តគ្រប់ភាគីពាក់ព័ន្ធជាពិសេសបុគ្គលិកអប់រំមាតាបិតាសិស្សនិស្សិតបន្តអនុវត្តឱ្យបានខ្ជាប់ខ្ជួននូវវិធានការ ៣ ការពារ ៣ កុំ។
លោកថ្លែងថា៖ «គ្រឹះស្ថានសិក្សាសាធារណៈ និងឯកជនត្រូវបន្តការបង្រៀននិងរៀនពីចម្ងាយ និងតាមអនឡាញស្របតាមគន្លងជីវិតថ្មីនៃវិស័យអប់រំ»។
លោក ប៉ិច បូឡែន ប្រធានក្រុមប្រឹក្សាភិបាលសហព័ន្ធសេវាអប់រំនៅកម្ពុជាដែលបានចូលរួមប្រជុំដែរនោះបានឱ្យដឹងថា គ្រឹះស្ថានសិក្សាឯកជនភាគច្រើនសុំឱ្យក្រសួងអប់រំពិចារណាលទ្ធភាពនៃការបើកសាលារៀនឡើងវិញ ដោយមានការពិភាក្សាគ្នាទៅលើវិធានការចាំបាច់ ដើម្បីរក្សាការពារការឆ្លងរីករាលជំងឺកូវីដ ១៩ នៅក្នុងសាលារៀន។
លោកថ្លែងថា៖ «យើងចង់ឱ្យបើកសាលារៀនឡើងវិញល្អបំផុត ប្រសិនបើអាចបើកបាននៅអំឡុងខែសីហា ឬខែកញ្ញាខាងមុខនេះ៕
វីដេអូ៖
