ភ្នំពេញៈ នគរបាលខណ្ឌឫស្សីកែវបានបញ្ជូនបុរសអ្នករត់ម៉ូតូកង់៣ម្នាក់ទៅសាលាដំបូងរាជធានីភ្នំពេញ នៅថ្ងៃទី ១៥ មិថុនា បន្ទាប់ពីចាប់ខ្លួនបាន ១ ថ្ងៃ តាមបណ្តឹងរបស់ក្មេងស្រីរងគ្រោះពាក់ព័ន្ធអំពើរំលោភសេពសន្ថវៈបានសម្រេចជាច្រើនលើក លើកូនចុងរបស់ខ្លួន ដែលប្រព្រឹត្តក្នុងអំឡុងខែឧសភាឆ្នាំ ២០២១ នៅខណ្ឌឫស្សីកែវ។
លោក កែវ ធា ប្រធានការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាន នគរបាលរាជធានីភ្នំពេញប្រាប់នៅថ្ងៃទី ១៥ មិថុនាថា ករណីនេះមានជនសង្ស័យឈ្មោះ ម៉ៅ សាមឿន អាយុ ៤២ ឆ្នាំ មានរបរជាអ្នករត់ម៉ូតូកង់៣ ស្នាក់នៅផ្ទះជួលក្នុងភូមិសាស្ត្រខណ្ឌឫស្សីកែវ រាជធានីភ្នំពេញ។
រីឯក្មេងស្រីរងគ្រោះ ដែលជាកូនចុងឈ្មោះ ម.ថ អាយុ ១៧ ឆ្នាំ។ ចំពោះជនសង្ស័យម្នាក់នេះត្រូវបាននគរបាលខណ្ឌឫស្សីកែវកសាងសំណុំរឿងបញ្ជូនបន្តទៅសាលាដំបូងរាជធានីភ្នំពេញនៅថ្ងៃទី ១៥ មិថុនា ឆ្នាំ ២០២១ ដើម្បីចាត់ការតាមច្បាប់ហើយ។
លោកបន្តថា៖ «ការងារនេះខ្ញុំប្រគល់ឱ្យខាងជំនាញខណ្ឌធ្វើតាមនីតិវិធីហើយ។ ប៉ុន្តែខាងយើង ជួយសហការជាបច្ចេកទេសពាក់ព័ន្ធការអនុវត្តនីតិវិធីបញ្ជូនទៅតុលាការ»។
ដោយឡែកលោក ហ៊ាង ថារ៉េត អធិការនគរបាលខណ្ឌឫស្សីកែវឱ្យដឹងនៅថ្ងៃទី ១៥ មិថុនាថា ចំពោះជនសង្ស័យម្នាក់នេះ គឺសមត្ថកិច្ចរបស់លោក បានបញ្ចប់នីតិវិធីស៊ើបសួរហើយ ហើយបានបញ្ជូនបន្តទៅសាលាដំបូងរាជធានីភ្នំពេញ ដើម្បីចាត់ការបន្តតាមផ្លូវច្បាប់។
លោកថ្លែងយ៉ាងខ្លីថា៖ «អំពើល្មើសនេះបុរសសង្ស័យបានប្រព្រឹត្តលើកូនស្រីចុងរបស់ខ្លួនហើយនាងបានប្តឹងមកនគរបាលយើង»។
ទោះយ៉ាងណា បើតាមមន្ត្រីនគរបាលខណ្ឌឫស្សីកែវ ១ រូប សុំមិនបញ្ចេញឈ្មោះបានប្រាប់ ភ្នំពេញ ប៉ុស្តិ៍ នៅថ្ងៃទី ១៥ មិថុនា តាមសម្តីរបស់ក្មេងស្រីរងគ្រោះថា ម្តាយរបស់នាងបានបែកបាក់គ្នាជាមួយឪពុកបង្កើតរបស់នាងអស់រយៈពេលជាច្រើនឆ្នាំមកហើយ។
ដោយមានការលំបាកក្នុងជីវិតជាស្ត្រីមេម៉ាយ និងទទួលបន្ទុកក្នុងការចិញ្ចឹមកូនផងនោះ ទើបម្តាយរបស់នាងបានសម្រេចចិត្តយកបុរសម្នាក់គ្រាន់ពឹងពាក់អាស្រ័យគ្នា។ ចំពោះក្មេងស្រីរងគ្រោះក៏បានចាត់ទុកជនសង្ស័យដូចជាឪពុកបង្កើតរបស់ខ្លួនអ៊ីចឹងដែរ។
មន្ត្រីនគរបាលខណ្ឌរូបនេះបានបន្តថា ក្នុងការរួមរស់ជាមួយម្តាយក្មេងស្រីរងគ្រោះគឺជនសង្ស័យបានប្រកបរបរជាអ្នករត់ម៉ូតូកង់៣ រីឯម្តាយរបស់នាងជាអ្នកលក់ដូរបន្តិចបន្តួច ដោយបានជួលបន្ទប់ស្នាក់នៅស្ថិតក្នុងភូមិមួយក្នុងខណ្ឌឫស្សីកែវ។
មន្ត្រីរូបនេះបានបញ្ជាក់ទៀតថា៖ «បើតាមក្មេងស្រីរងគ្រោះនិយាយចាប់តាំងពីជនសង្ស័យក្លាយជាឪពុកចុងរបស់ក្មេងស្រីរងគ្រោះមក គឺជនសង្ស័យមិនសូវបង្កបញ្ហាអ្វីធំដុំនៅក្នុងគ្រួសារនោះទេ តែក្មេងស្រីរងគ្រោះក៏ចេះប្រយ័ត្នប្រយែងខ្លួនឯងដែរ»។
ប៉ុន្តែនៅក្នុងអំឡុងខែឧសភា ឆ្នាំ ២០២១ ខណៈពេលខ្លះម្តាយក្មេងស្រីរងគ្រោះមិននៅផ្ទះស្រាប់តែជនសង្ស័យបានចាប់ក្មេងស្រីរងគ្រោះរំលោភសេពសន្ថវៈរហូតបានសម្រេចជាច្រើនលើកច្រើនសានៅក្នុងបន្ទប់ជួល។
ក្នុងការប្រព្រឹត្តទៅលើក្មេងស្រីរងគ្រោះម្តងៗគឺជនសង្ស័យតែងសំឡុតគំរាម មិនឱ្យក្មេងស្រីរងគ្រោះយករឿងនេះទៅនិយាយប្រាប់នរណាដឹងទេ បើបែកការណ៍គឺជនសង្ស័យនឹងសម្លាប់ក្មេងស្រីរងគ្រោះចោល។
ទោះយ៉ាងណា ដោយសារតែទ្រាំនឹងទង្វើចាប់រំលោភសេពសន្ថវៈរបស់ជនសង្ស័យលែងបាននៅថ្ងៃទី ១៤ ខែ មិថុនា ឆ្នាំ ២០២១ ទើបក្មេងស្រីរងគ្រោះបានមកប្តឹងនៅអធិការដ្ឋាននគរបាលខណ្ឌឫស្សីកែវ។
បន្ទាប់ពីទទួលបានបណ្តឹងមកសមត្ថកិច្ចបានចុះទៅឃាត់ខ្លួនជនសង្ស័យភ្លាមៗតែម្តង។ នៅពេលសមត្ថកិច្ចចាប់ឃាត់ខ្លួន ជនសង្ស័យបានសារភាពប្រាប់សមត្ថកិច្ចថា រូបគេពិតជាបានចាប់រំលោភសេពសន្ថវៈលើកូនស្រីចុងរបស់ខ្លួនពិតប្រាកដមែន៕