.jpg)
សកម្មភាពរុះរើសំណង់នៅលើទឹក ក្រោយពីរដ្ឋបាលរាជធានីភ្នំពេញដាក់ចេញវិធានការ។ ហុង មិនា
ភ្នំពេញៈ មកទល់ពេលនេះ ផ្ទះបណ្ដែតទឹកនិងបែចិញ្ចឹមត្រីរបស់និគមនជនជាតិវៀតណាមជាង ១ ៥០០ ត្រូវបានរុះរើ និងជម្លៀសចេញពីផ្ទៃទន្លេនៃភូមិសាស្ត្ររាជធានីភ្នំពេញ។ នេះបើតាមការអះអាងរបស់លោក សាន សុខសីហា អ្នកនាំពាក្យស្នងការដ្ឋានរាជធានីភ្នំពេញ។
ក្នុងបទសម្ភាសន៍ជាមួយ ភ្នំពេញ ប៉ុស្តិ៍ កាលពីថ្ងៃទី ១៦ ខែ មិថុនា ឆ្នាំ ២០២១ លោក សុខសីហា បានថ្លែងថាសំណង់អាណាធិបតេយ្យ លើទូក ផ្ទះបណ្ដែតទឹក និង បែចិញ្ចឹមត្រីរបស់និគមជនជាតិវៀតណាមចំនួន ១ ៥៣៧ ក្នុងចំណោម ១ ៧៤១ ដែលមានទីតាំងស្ថិតនៅលើផ្ទៃទន្លេក្នុងភូមិសាស្ត្ររាជធានីភ្នំពេញ បានស្ម័គ្រចិត្តរុះរើ និងជម្លៀសចេញដោយខ្លួនឯងពីភូមិសាស្ត្ររាជធានីភ្នំពេញ។
លោកបានបញ្ជាក់ថា៖ «នៅពេលនេះ ក្រុមកម្លាំងសមត្ថកិច្ចនគរបាលយើង កំពុងបន្តចុះជួយអន្តរាគមន៍រុះរើសំណង់មិនរៀបរយ លើទូក ផ្ទះបណ្ដែតទឹក និងបែចិញ្ចឹមត្រីមួយចំនួន ដែលនៅសេសសល់ តាមសេចក្ដីណែនាំរបស់គណបញ្ជាការឯកភាពរាជធានីភ្នំពេញ»។
បើតាមលោក សុខសីហា សំណង់មិនរៀបរយលើទូក ផ្ទះបណ្ដែតទឹក និងបែចិញ្ចឹមត្រី ក្នុងខណ្ឌចំនួន ៥ ដែលមានទីតាំងស្ថិតនៅជាប់ដងទន្លេនៃភូមិសាស្ត្រារាជធានីភ្នំពេញ ដែលបានរុះរើ និងចល័តចេញនោះរួមាន នៅខណ្ឌព្រែកព្នៅ បានរុះរើផ្ទះបណ្តែតទឹកសរុបចំនួន ៨២ និងបែចិញ្ចឹមត្រីចំនួន ១៧៩។
នៅខណ្ឌជ្រោយចង្វារ ផ្ទះបណ្តែតទឹក មានចំនួនសរុប ២១០ រុះរើរួចបានចំនួន ១៤៥ និងបែចិញ្ចឹមត្រីចំនួន ១២៩ រុះរើបានចំនួន ៨៥។ នៅខណ្ឌឫស្សីកែវ ផ្ទះបណ្តែតទឹក និងបែចិញ្ចឹមត្រីសរុបចំនួន ៣៦៦ ត្រូវបានរុះរើ និងជម្លៀសចេញទាំងស្រុង។
នៅខណ្ឌច្បារអំពៅ ផ្ទះបណ្តែតទឹក មានចំនួនសរុប ២៤៩ រុះរើរួច ២១០ និងបែចិញ្ចឹមត្រី មានចំនួន ២៩៣ រុះរើបានចំនួន ២៤៧ និងនៅខណ្ឌមានជ័យ ផ្ទះបណ្តែតទឹក មានចំនួន ១២ និងបែចិញ្ចឹមត្រី ចំនួន ៥ ត្រូវបានរុះរើទាំងស្រុង។
លោក សុខសីហា បានបន្ថែមថា៖ «នៅពេលនេះកម្លាំងនគរបាលនៃស្នងការដ្ឋាន កំពុងបន្តកិច្ចសហការជាមួយកម្លាំងបញ្ជាការឯកភាព ខណ្ឌទាំង ៥ ដើម្បីឃ្លាំមើលនិងអនុវត្តនីតិវីធីច្បាប់ តាមគោលការណ៍ណែនាំរបស់រដ្ឋបាលរាជធានីភ្នំពេញ ក្នុងការរុះរើ នូវសំណង់មិនរៀបរយលើទូក ផ្ទះបណ្ដែតទឹក និង បែចិញ្ចឹមត្រីទាំងនោះ»។
យ៉ាងណាក៏ដោយ កាលពីថ្ងៃទី ១៦ ខែ មិថុនា ឆ្នាំ ២០២១ អាជ្ញាធរមូលដ្ឋាននៃស្រុកលើកដែកខេត្តកណ្ដាល និងស្រុកពាមជរ ខេត្តព្រៃវែង បានប្រាប់ ភ្នំពេញ ប៉ុស្តិ៍ថា ផ្ទះបណ្តែតទឹក និងបែចិញ្ចឹមត្រីរបស់និគមជនជាតិវៀតណាម ចំនួនជាង ១៥០ ដែលបានចល័តចេញពីផ្ទៃទន្លេនៃភូមិសាស្ត្ររាជធានីភ្នំពេញ បានរំកិលទៅដល់តំបន់កោះខ្ពកអាទាវ ដែលមានទីតាំងស្ថិតនៅប្រមាណជិត ២០ គីឡូម៉ែត្ រពីព្រំប្រទល់ដែនទឹកនៃប្រទេសវៀតណាម។
លោក ជា ហេង អធិការស្រុកពាមជរ ខេត្តព្រៃវែង បានប្រាប់ ភ្នំពេញ ប៉ុស្តិ៍ថា ផ្ទះបណ្ដែតទឹកនិង បែចិញ្ចឹមត្រី របស់និគមជនជាតិវៀតណាម ដែលចល័តពីផ្ទៃទន្លេក្នុងភូមិសាស្ត្ររាជធានីភ្នំពេញចំនួន ១៥ បានទៅដល់ផ្ទៃទន្លេនៃភូមិសាស្ត្រស្រុកពាមជរ និងកំពុងព្យាយាមចូលឈប់សំចត ប៉ុន្តែត្រូវបានរារាំងដោយកម្លាំងបញ្ជាការឯកភាពស្រុកពាមជរ។
លោក ហេង បានបញ្ជាក់ថា៖ «កម្លាំងរបស់យើងកំពុងកៀងឲ្យម្ចាស់ផ្ទះបណ្ដែតទឹក និងបែចិញ្ចឹមត្រីរបស់និគមជនជាតិវៀតណាមទាំងនោះ ធ្វើដំណើរតាមខ្សែទឹកឆ្ពោះត្រង់ទៅប្រទេសវៀតណាមតែម្ដង»។
ស្រដៀងគ្នានេះ លោក ចាប ច័ន្ទវិទ្យា អភិបាលស្រុកលើកដែក នៃខេត្តកណ្ដាល បានប្រាប់ ភ្នំពេញ ប៉ុស្តិ៍ថា អាជ្ញាធររាជធានីភ្នំពេញបានតម្រូវឲ្យពួកគេ រុះរើសំណង់អាណាធិបតេយ្យលើទូក ផ្ទះបណ្ដែតទឹក និងបែចិញ្ជឹមត្រីរបស់ពួកគេចេញ ពីផ្ទៃទឹក ដើម្បីរំដោះភាពកកស្ទះនាវាចរណ៍ និងធ្វើឱ្យប្រសើរឡើងនូវគុណភាពទឹក សោភណ្ឌភាព បរិស្ថានតាមដងនិងផ្ទៃទន្លេ ប៉ុន្តែពួកគេបានសម្រេចចិត្តជ្រើសរើសដោយខ្លួនឯងគឺការចល័តចុះទៅកាន់ប្រទេសវៀតណាមវិញ។
លោកបានបញ្ជាក់ថា៖ «តាមបទបញ្ជា និងសេចក្ដីណែនាំរបស់គណៈបញ្ជាការឯកភាពខេត្តកណ្ដាល គឺមិនអនុញ្ញាតឲ្យពួកគេចូលឈប់សំចតឡើយ ទោះក្នុងហេតុផលណាក៏ដោយ ដូច្នេះពួកគេ ត្រូវចាកចេញឲ្យផុតពីផ្ទៃទន្លេក្នុងដែនទឹករបស់យើង ជាដាច់ខាត»។
បើតាមលោក ច័ន្ទវិទ្យា គិតមកទល់ថ្ងៃទី ១៦ ខែ មិថុនា ឆ្នាំ ២០២១ មានផ្ទះបណ្តែតទឹក និងបែចិញ្ចឹមត្រីរបស់និគមជនជាតិវៀតណាម ដែលចល័តចុះពីផ្ទៃទន្លេក្នុងភូមិសាស្ត្ររាជធានីភ្នំពេញ មកដល់ចំណុច កោះខ្ពមអាទាវ កោះកេក និងកោះពាមរាំង នៃភូមិសស្ត្រស្រុកលើកដែកមានចំនួន ប្រមាណជាង ១៣០។ ពីតំបន់នេះទៅកាន់ព្រំដែនទឹកនៃប្រទេសវៀតណាមគឺមានចម្ងាយប្រមាណ ២០ គីឡូម៉ែត្រទៀតប៉ុណ្ណោះ។
ជុំវិញករណីនេះ លោក ស៊ឹម ឈី ប្រធានសមាគមវៀតណាមប្រចាំកម្ពុជាបានប្រាប់ ភ្នំពេញ ប៉ុស្តិ៍ថា ដោយសារវិបត្តិនៃការឆ្លងរីករាលដាលនៃជំងឺកូវីដ ១៩ និងជំងឺកូវីដ ១៩ បប្លែងថ្មី រដ្ឋាភិបាលវៀតណាមបានប្រកាសបិទព្រំដែនជាបណ្ដោះអាសន្ន ដូច្នេះពួកគេមិនអាចធ្វើដំណើរតាមខ្សែទឹកឆ្ពោះទៅប្រទេសវៀតណាម វិញបានទេ។
លោក ឈី បានអះអាងថា នៅពេលនេះ ខាងសមាគម និងមន្ត្រីស្ថានទូតវៀតណាមប្រចាំកម្ពុជា កំពុងសម្របសម្រួលជាមួយអាជ្ញាធរនៃប្រទេសកម្ពុជា ដើម្បីស្នើសុំឲ្យមានការយោកយល់និងអាណិតអាសូរ ដល់ពលរដ្ឋខ្មែរដើមកំណើតវៀតណាមទាំងនោះ បានឈប់សំចតនិងស្នាក់នៅជាបណ្ដោះអាសន្ន ដើម្បីរង់ចាំឲ្យមានភាពធូរស្រាលនៃជំងឺកូវីដ ១៩ ឡើងវិញ ដែលអាចនឹងត្រូវបានអនុញ្ញាតឲ្យធ្វើមាតុភូមិនិវត្តចូលប្រទេសវៀតណាមវិញ។
លោកបានបញ្ជាក់ថា៖ «នៅពេលនេះ យើងបានទទួលដំណឹងថា មានបងប្អូនប្រជាពលរដ្ឋខ្មែរដើមកំណើតវៀតណាមប្រមាណជិត ៣០០ គ្រួសារ ដែលរស់នៅលើផ្ទះបណ្តែតទឹក និងបែចិញ្ចឹមត្រី ក្នុងរាជធានីភ្នំពេញ បានចល័តផុតពីតំបន់កោះខ្ពបអាទាវនៃស្រុកលើកដែកខេត្តកណ្ដាល ហើយនៅសល់ប្រមាណ ១៥ គីឡូមែត្រទៀតប៉ុណ្ណោះដល់ព្រំដែនទឹកប្រទេសវៀតណាម ហើយ។ ទោះយ៉ាងណាពួកគេនឹងមិនអាចឆ្លងចូលប្រទេសវៀតណាមបានទេ»។
លោក ឈី បានបន្តថា ចំណែកផ្ទះបណ្ដែតទឹក និងបែចិញ្ចឹមត្រី មួយចំនួនទៀត បានចល័តឡើងទៅតំបន់ភូមិគ្រោះ នៃសង្កាត់-ខណ្ឌព្រែកព្នៅ ជាបណ្ដោះអាសន្ន។
បើតាមលោឈី សមាគមវៀតណាមនៅកម្ពុជាពុំមានគោលការណ៍ណាមួយក្នុងការទិញដី ដើម្បីផ្ដល់ជូនដល់ពួកគេនោះទេ ប៉ុន្តែបានស្នើសុំឲ្យអាជ្ញាធរកម្ពុជា ជាពិសេសរដ្ឋបាលរាជធានីភ្នំពេញ ជួយគាំពារនូវស្បៀងអាហារ និងទីតាំងស្នាក់នៅបណ្ដោះអាសន្នប្រកបដោយសុវត្ថិភាពសម្រាប់ពួកគេ ដូចករណីនៅក្រុង-ខេត្តកំពង់ឆ្នាំង។
រដ្ឋបាលរាជធានីភ្នំពេញ កាលពីថ្ងៃទី២ខែមិថុនា ឆ្នាំ ២០២១ បានបញ្ជាក់ថា ការរស់នៅ និងប្រកបមុខរបរ លើផ្ទៃទឹកទន្លេ បែបអនាធិបតេយ្យ បានបង្កឱ្យប៉ះពាល់ដល់ប្រព័ន្ធអេកូឡូហ្ស៊ី ចរន្តទឹកហូរ គោករាក់ទន្លេ ពិសេសការប្រើប្រាស់ចំណីសម្រាប់ចិញ្ចឹមត្រី និងការបញ្ចេញកាកសំណល់ ការបន្ទោបង់ ពាសវាលពាសកាល ក្នុងទន្លេ ធ្វើឱ្យខូចខាតធ្ងន់ធ្ងរ ដល់ជីវៈចម្រុះក្នុងទឹក ខូចគុណភាពទឹក បំពុលបរិស្ថាន ប៉ះពាល់សោភ័ណភាព រាជធានីភ្នំពេញ ព្រមទាំងប៉ះពាល់ ដល់សុខភាព ប្រជាពលរដ្ឋ ដែលប្រើប្រាស់ទឹក មិនស្អាតនេះផងដែរ៕
វីដេអូ៖
