ភ្នំពេញៈ លោក ទៀ បាញ់ រដ្ឋមន្ត្រីក្រសួងការពារជាតិ បានអបអរសាទរចំពោះខួបលើកទី៣០ នៃទំនាក់ទំនងសន្ទនាអាស៊ាន-ចិន ដោយលោកចាត់ទុកនេះគឺជាឱកាសល្អប្រសើរមួយ ក្នុងការបង្កើនទំនាក់ទំនងអាស៊ាន-ចិន ឈានទៅដល់កម្រិតខ្ពស់ទៅមុខទៀតក្នុងការកសាងសហគមន៍មួយដែលមានអនាគតរួមគ្នា។
លោក ទៀ បាញ់ បានថ្លែងបែបនេះក្នុងពេលដឹកនាំប្រតិភូយោធាជាន់ខ្ពស់ក្រសួងការពារជាតិចូលរួមកិច្ចប្រជុំក្រៅផ្លូវការរដ្ឋមន្ដ្រីការពារជាតិអាស៊ាន-ចិន តាមប្រព័ន្ធវីដេអូអនឡាញនាល្ងាចថ្ងៃទី ១៥ ខែមិថុនានេះ នៅទីស្តីការគណៈរដ្ឋមន្ត្រី។ កិច្ចប្រជុំក្រៅផ្លូវការរដ្ឋមន្ដ្រីការពារជាតិអាស៊ាន-ចិននេះ ប្រទេសប្រ៊ុយណេដារូសាឡឹម គឺជាម្ចាស់ផ្ទះ។
លោកបានថ្លែងថា៖ «នេះជាឱកាសមួយដ៏ល្អប្រសើរក្នុងការបង្កើនទំនាក់ទំនងអាស៊ាន-ចិនឈានដល់កម្រិតខ្ពស់បន្ទាប់ទៀត ដើម្បីកសាងសហគមន៏មួយដែលមានអនាគតរួមគ្នាការបើកទំព័រថ្មីឆ្ពោះទៅរកវិបុលភាពរួមអាស៊ាន-ចិន។ ៣ ទស្សវត្សកន្លងមកនេះ យើងឃើញថា ទំនាក់ទំនងអាស៊ាន-ចិន បានរីកដុះដាល់កាន់តែជិតស្និទ្ធនិងរឹងមាំឡើងហើយប្រទេសចិន បានដើរតួនាទីយ៉ាងសំខាន់ក្នុងការថែរក្សាសន្តិភាពស្ថិរភាពវិបុលភាព និងនិរន្តភាពតំបន់»។
លោកបានវាយតម្លៃខ្ពស់លើជោគជ័យនៃលំហាត់លម្ហសមុទ្រអាស៊ាន-ចិន ដែលអនុវត្តកាលពីខែសីហា ឆ្នាំ ២០១៨ ដែលជួយពង្រឹងអន្តរប្រតិបត្តិការកងទ័ពជើងទឹកក្នុងការសាងទំនុកចិត្តនិងភាពជឿជាក់ក្នុងការធ្វើការជាមួយគ្នាដើម្បីដោះស្រាយឧប្បត្តិហេតុនៅលម្ហសមុទ្រ។
លោក ទៀ បាញ់ បញ្ជាក់ថា៖ «ចិនបានប្ដេជ្ញាចិត្ត ដើម្បីកសាងទំនុកចិត្តនិងពង្រឹងចំណងទំនាក់ទំនងជាមួយអាស៊ានជាពិសេសលើវិស័យសន្តិសុខលម្ហសមុទ្រ»។
លោកបានអបអរសាទរដល់ប្រទេសចិន ដែលបានធ្វើជាសហប្រធានក្រុមការងារជំនាញក្នុងក្របខ័ណ្ឌកិច្ចប្រជុំរដ្ឋមន្ត្រីការពារជាតិអាស៊ាន-បូក ដោយជោគជ័យរួមមានការធ្វើជាសហប្រធានក្រុមការងារជំនាញស្ដីពីជំនួយមនុស្សធម៌ និងសង្គ្រោះគ្រោះមហន្តរាយជាមួយប្រទេសវៀតណាម ក្នុងជុំទី១ និងសហប្រធានក្រុមការងារជំនាញស្តីពីការប្រឆាំងភេរវកម្មជាមួយប្រទេសថៃ ក្នុងជុំទី៣។ ហើយនៅក្នុងជុំទី៤ នេះកម្ពុជាមានកិត្តិយសដែលបានធ្វើជាសហប្រធានក្រុមការងារជំនាញស្ដីពីសកម្មភាពកម្ចាត់មីនមនុស្សធម៌ជាមួយប្រទេសចិន ផងដែរ។
លោក ទៀ បាញ់ បានកោតសរសើរ ចំពោះកិច្ចខិតខំប្រឹងប្រែងរបស់ប្រទេសប្រ៊ុយណេដាររូសាឡឹម ក្នុងការដោះស្រាយការងារដែលប្រកបដោយភាពប្រឈមទាំងឡាយក្នុងអំឡុងពេលនៃការធ្វើជាប្រធានឆ្នាំនេះ។ លោកក៏បានថ្លែងអំណរគុណដល់ឧត្តមមន្ត្រីការពារជាតិអាស៊ាន និងក្រុមការងារ ឧត្តមមន្ត្រីការពារជាតិអាស៊ានសម្រាប់ការព្យាយាមជំរុញ រាល់គំនិតផ្តួចផ្តើមនានាដើម្បីពង្រឹងឯកភាពអាស៊ាន និងមជ្ឈភាពអាស៊ាន និងសម្រេចបានកិច្ចសហប្រតិបត្តិការជាក់ស្តែង។
លោកបានថ្លែងថា៖ «កម្ពុជាសូមវាយតម្លៃខ្ពស់ចំពោះឯកសារ ទស្សនទានដែលបានអនុម័តទាំងអស់ជាឯកសារមានសារៈសំខាន់សម្រាប់ការថែរក្សានិម្មាបនកម្មសន្តិសុខដែលមានអាស៊ានជាមូលដ្ឋាននិងកិច្ចសហការជាមួយដៃគូខាងក្រៅ។កម្ពុជាក៏សូមថ្លែងអំណរគុណដល់ភាពជាប្រធានដ៏ជំនាញរបស់ប្រ៊ុយណេដារូសាឡឹម ការជួយគ្នានិងការយោគយល់គ្នាទៅវិញទៅមករបស់យើងទាំងអស់គ្នាដើម្បីជម្នះរាល់ឧបសគ្គទាំងអស់នេះ»។
លោក ទៀ បាញ់ បានបញ្ជាក់ថា នៅពេលធ្វើជាប្រធាន ADMM និងកិច្ចប្រជុំពាក់ព័ន្ធនៅឆ្នាំក្រោយកម្ពុជានឹងពិចារណាលើគំនិតផ្តួចផ្តើមមួយចំនួន ដើម្បីចែករំលែកជាមួយបងប្អូនអាស៊ានដោយមានគោលបំណងធ្វើឱ្យប្រសើរឡើងនូវកិច្ចខិតខំប្រឹងប្រែងរួមគ្នារបស់កងកម្លាំងការពារជាតិអាស៊ាន ក្នុងការប្រយុទ្ធប្រឆាំងនឹងការគំរាមកំហែងរួមលើកកម្ពស់ឯកភាពអាស៊ាន និងធានានិរន្តភាពនូវកិច្ចសហប្រតិបត្តិការជាក់ស្តែង។
លោកបានបញ្ជាក់ថា៖ «កម្ពុជាយល់ឃើញថាកិច្ចខិតខំប្រឹងប្រែងរួមរវាងកងកម្លាំងការពារជាតិអាស៊ាន ក្នុងការឆ្លើយតបទៅនឹងជំងឺរាតត្បាតឆ្លងព្រំដែន គឺជាវិធានការសន្តិសុខចាំបាច់មួយក្នុងចំណោមវិធានការជាច្រើនទៀត។ កម្ពុជាក៏ពិចារណាលើសំណើរឱ្យមានការគាំទ្រយន្តការលើកកម្ពស់ស្ត្រីអាស៊ានចូលរួមក្នុងប្រតិបត្តិការរក្សាសន្តិភាពអង្គការសហប្រជាជាតិ។កម្ពុជាស្នើសុំការពិចារណានិងស្វែងរកការគាំទ្រពីរដ្ឋសមាជិកអាស៊ានផ្សេងទៀតលើគំនិតផ្ដួចផ្ដើមទាំងអស់នេះ»៕