ប៉ៃលិនៈ លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) បានឱ្យដឹងថា គម្រោងសមាហរណកម្មកិច្ចបោសសម្អាតមីន និងជួយសង្គ្រោះជនពិការ ដោយសារគ្រាប់មីនបានជួយដល់គ្រួសារជនពិការ ដោយសារមីនចំនួន ២៤០ គ្រួសារនៅខេត្តប៉ៃលិនតាំងពីដើមឆ្នាំ ២០២១ នេះមក។
គម្រោងសមាហរណកម្មកិច្ចបោសសម្អាតមីន និងជួយសង្គ្រោះជនពិការ ដោយសារគ្រាប់មីនគឺមានការគាំទ្រដោយប្រជាជន និងរដ្ឋាភិបាលជប៉ុន ដែលបានផ្តល់ជំនួយជូនរាជរដ្ឋាភិបាលកម្ពុជា ដើម្បីគាំទ្រសកម្មភាពអង្គភាពស៊ីម៉ាក់ក្នុងការអនុវត្តគម្រោងនេះ។
លោក ហេង រតនា បានសរសេរនៅលើទំព័រហ្វេសប៊ុករបស់លោកកាលពីម្សិលមិញថា គម្រោងនេះគឺជួយជនពិការ ដោយសារគ្រាប់មីន តាមរយ:ការអភិវឌ្ឍសហគមន៍ទាំងហេដ្ឋារចនាសម្ព័ន្ធ និងចំណេះដឹងមុខរបរកសិកម្មបឋម។
លោកបានបន្តថា កម្មវិធីសមាហរណកម្មនេះបានអនុវត្តព្រមៗគ្នារួមមាន ទី១ គឺការបោសសម្អាតតំបន់គ្រាប់មីន ដែលមានការគំរាមកំហែងដល់សុខសុវត្ថិភាពប្រជាជនក្នុងសហគមន៍ ទី២ គឺការជួយកសាងផ្លូវ ប្រព័ន្ធប្រឡាយទឹកជនបទ និងទី៣ គឺការហ្វឹកហ្វឺនចំណេះដឹងបឋមសម្រាប់មុខរបរកសិកម្ម។
លោកបញ្ជាក់ថា៖ «គោលដៅសំខាន់គឺជួយជំរុញលើកស្ទួយសេដ្ឋកិច្ចគ្រួសារជនពិការ និងសហគមន៍ឱ្យមានឱកាសរីកចម្រើនខាងជីវភាពរស់នៅកាន់តែល្អប្រសើរស្របតាមគោលនយោបាយ និងផែនការយុទ្ធសាស្ត្រអភិវឌ្ឍន៍សេដ្ឋកិច្ចរបស់រាជរដ្ឋាភិបាល»។
ក្នុងអំឡុងពេលអនុវត្តគម្រោងនៅខេត្តប៉ៃលិននៅក្នុងឆ្នាំនេះ លោក ហេង រតនា បានអះអាងថា មានគ្រួសារជនពិការ ដោយសារមីនចំនួន ២៤០ គ្រួសារ ត្រូវបានជួយសង្គ្រោះ ដោយការកសាងផ្លូវលំជនបទចំនួន ២ ខ្សែមានប្រវែងជិត ១៥ ០០០ ម៉ែត្រ និងប្រពន្ធ័ប្រឡាយ លូរំដោះទឹកមួយចំនួនផងដែរ។
លោក ឈួន បូរ៉ា មន្ត្រីបច្ចេកទេសផ្នែកបោសសម្អាតមីននៃអង្គការ CSHD បានលើកឡើងថា បញ្ហាជនរងគ្រោះ ដោយសារគ្រាប់មីនក្នុងពេលបច្ចុប្បន្នគឺច្រើនតែកើតឡើងចំពោះពលរដ្ឋដែលទៅធ្វើការឈូសឆាយលើដីថ្មី។
លោកបន្តថា ហើយដីព្រៃទាំងនោះ គឺភាគច្រើនមានបន្សល់ទុកនូវគ្រាប់យុទ្ធភណ្ឌមិនទាន់ផ្ទុះដែលសល់ពីសម័យសង្គ្រាម។ ដូច្នេះលោករំពឹងថា ប្រជាពលរដ្ឋគួរតែបង្កើតការប្រុងប្រយ័ត្នចំពោះបញ្ហាទាំងអស់នេះ ដើម្បីបញ្ចៀសឱ្យបាននូវហានិភ័យដែលអាចកើតមានឡើងដល់អាយុជីវិត និងធ្វើឱ្យមានពិការភាព។
លោកបានបញ្ជាក់ថា៖ «ការជួយដល់ជនមានពិការភាពពីគ្រាប់មិនទាន់ផ្ទុះគឺមានច្រើន ព្រោះអាជ្ញាធរមីនកម្ពុជាយើងបានផ្តល់ការអប់រំ និងការគាំទ្រជុំវិញជីវភាពជាច្រើនទៀត។
តែយើងឃើញថា ការរងគ្រោះដោយសារមីន ឬគ្រាប់មិនទាន់ផ្ទុះគឺធ្វើឱ្យជនរងគ្រោះទទួលរងស្មើនឹងស្លាប់ ព្រោះតែមានការពិការភាពអីជាដើម»។
យោងតាមមជ្ឈមណ្ឌលសកម្មភាពកំចាត់មីនកម្ពុជាឱ្យដឹងថា គិតចាប់ពីឆ្នាំ ១៩៩២ ដល់ដំណាច់ខែវិច្ឆិកា ឆ្នាំ ២០១៨ ជនរងគ្រោះដោយសារមីន និងសំណល់ជាតិផ្ទុះពីសង្គ្រាមមានជិត ៣ ម៉ឺននាក់ក្នុងនោះមានជនរងគ្រោះ ដោយសារមីនចំនួនជិត ២ ម៉ឺននាក់ ជនរងគ្រោះដោយសារសំណល់ជាតិផ្ទុះពីសង្គ្រាមមានជិត ១ ម៉ឺននាក់ ហើយមានអ្នកស្លាប់ជាង ៦ ០០០ នាក់។
ចំណែកក្នុងពេលបច្ចុប្បន្នផ្ទៃដីដែលនៅសេសសល់យុទ្ធភណ្ឌមិនទាន់ផ្ទុះ ដែលមិនទាន់ត្រូវបានរំដោះគ្រាប់ទាំងនេះចេញ គឺមានទំហំជាង ៨០០ គីឡូម៉ែត្រការ៉េ។ នេះបើយោងតាមមជ្ឈមណ្ឌលសកម្មភាពកំចាត់មីនកម្ពុជា៕