ព្រះសីហនុៈ នគរបាលក្រុង-ខេត្តព្រះសីហនុនឹងបញ្ជូនបុរសសង្ស័យម្នាក់ ទៅសាលាដំបូងខេត្ត នៅថ្ងៃទី ១៧ មិថុនានេះ បន្ទាប់ពីចាប់ឃាត់ខ្លួនពាក់ព័ន្ធនឹងការស្លៀកពាក់ឯកសណ្ឋាននគរបាល ហើយដើរទារលុយពីអ្នកលក់ដូរ នៅតាមដងផ្លូវប្រព្រឹត្តនៅក្រុមទី ១២ ភូមិ ២ សង្កាត់លេខ ២ ក្រុង-ខេត្ត ព្រះសីហនុកាលពីថ្ងៃទី ១៤ ខែមិថុនា។
លោក តី វិសាល អធិការនគរបាលក្រុងព្រះសីហនុប្រាប់ ភ្នំពេញ ប៉ុស្តិ៍ នៅថ្ងៃទី ១៦ មិថុនាថា ជនសង្ស័យឈ្មោះ ភាង កុសល ភេទប្រុស អាយុ ៤០ ឆ្នាំ ធ្វើជាសន្តិសុខនៅក្នុងក្រុមហ៊ុនសន្តិសុខឯកជនមួយ និងស្នាក់នៅបណ្តោះអាសន្ន ក្នុងក្រុមហ៊ុនសន្តិសុខ។
នៅថ្ងៃទី ១៦ ខែមិថុនា សមត្ថកិច្ចនៅកំពុងសាកសួរជនសង្ស័យម្នាក់នេះនៅអធិការដ្ឋាននគរបាលក្រុងព្រះសីហនុ ដើម្បីកសាងសំណុំរឿងបញ្ជូនជននេះ ទៅសាលាដំបូងខេត្តព្រះសីហនុ។
លោកបន្តថា បើទោះបីជាជនសង្ស័យម្នាក់នេះប្រព្រឹត្តបទល្មើស ហើយនិងមានសំណុំរឿងក្នុងបទល្មើសរួចស្រេចទៅហើយក្តី តែដោយទទួលបទបញ្ជាពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ អំពីចំណាត់ការវិធានសុខាភិបាលផងនោះ ដូច្នេះសមត្ថកិច្ចត្រូវតែអនុវត្តតាមវិធានក្រសួងសុខាភិបាលពាក់ព័ន្ធនឹងជំងឺកូវីដ ១៩។
ហេតុនេះហើយ ទើបនៅថ្ងៃទី ១៦ ខែមិថុនា សមត្ថកិច្ចបានអញ្ជើញក្រុមគ្រូពេទ្យ ដើម្បីមកយកសំណាកពីជនសង្ស័យទៅពិនិត្យមើលទៀត ដើម្បីរកមេរោគកូវីដ ១៩។
លោកវិសាលបញ្ជាក់ថា៖ «ឥឡូវនេះជនសង្ស័យ យើងកំពុងធ្វើនីតិវិធីនៅកន្លែងយើងព្រោះយើងត្រូវយកសំណាកពីជនសង្ស័យ ដើម្បីរកមេរោគកូវីដ ១៩។ បើគ្រូពេទ្យពិនិត្យសំណាកអត់ឃើញទេ យើងបញ្ជូនគាត់ទៅតុលាការ បើគ្រូពេទ្យរកឃើញមេរោគ យើងយកគាត់ទៅធ្វើចត្តាឡីស័ក»។
លោកបានរៀបរាប់ថា ពេលសមត្ថកិច្ចកំពុងចុះរៀបចំសណ្តាប់ធ្នាប់អ្នកលក់ដូរនៅតាមផ្លូវ ស្រាប់តែអ្នកលក់ដូរទាំងនោះប្រាប់ថា ពួកគាត់បានបង់លុយឱ្យនគរបាលរួចហើយ តែមិនដឹងសមត្ថកិច្ចខាងណាទេ ដែលបុរសនោះមានពាក់ឯកសណ្ឋាននគរបាល ចុះហេតុអ្វីបានជាសមត្ថកិច្ចមកបង្គាប់ឱ្យគាត់រើចេញពីកន្លែងដែលគាត់ឱ្យលុយរួចហើយនោះទៀត។
លោកបានបន្តថា ដោយសារបញ្ហានេះហើយទើបធ្វើឱ្យកម្លាំងសមត្ថកិច្ចរបស់លោក ចាប់ផ្តើមសង្ស័យហើយក៏ធ្វើការស្រាវជ្រាវ ទើបស្វែងរកឃាត់ខ្លួនជនសង្ស័យបាននៅថ្ងៃទី ១៤ ខែមិថុនា។ ក្រោយឃាត់ខ្លួនជនសង្ស័យបានឆ្លើយថា រូបគាត់ពិតជាបានដើរយកលុយពីអ្នកលក់ដូរនៅតាមផ្លូវពិតប្រាកដមែន គឺយកក្នុង ១ ថ្ងៃពី ១៥ ០០០ ទៅ ២ ម៉ឺនរៀល និងបានយកតែពី ៦ ទៅ ៧ កន្លែងប៉ុណ្ណោះ។
នេះមិនមែនជាលើកទី១ នោះទេដែលជនសង្ស័យរូបនេះបានក្លែងខ្លួនធ្វើជានគរបាល ដើរយកលុយពីអ្នកលក់ដូរ។ កាលពីថ្ងៃទី ២៥ ខែ ឧសភា ឆ្នាំ ២០២១ ជនម្នាក់នេះបានស្លៀកពាក់ឯកសណ្ឋានបន្លំធ្វើជានគរបាល ដើរយកលុយភាស៊ីនៅផ្សារពាណិជ្ជកម្ម។
ប៉ុន្តែត្រូវបានកម្លាំងគណៈបញ្ជាការឯកភាពក្រុងព្រះសីហនុ ឃាត់ខ្លួននាំយកមកកាន់អធិការដ្ឋាននគរបាលក្រុង ដើម្បីធ្វើការអប់រំ និងចុះកិច្ចសន្យាឱ្យបញ្ឈប់សកម្មភាពបន្លំធ្វើជានគរបាលម្តងរួចមកហើយ តែនៅតែមិនព្រមរាងចាល ដូច្នេះពេលនេះទើបត្រូវសមត្ថកិច្ចកសាងសំណុំរឿងបញ្ជូនទៅតុលាការតែម្តង៕