ភ្នំពេញៈ អាជ្ញាធរខណ្ឌពោធិ៍សែនជ័យសម្រេចផ្អាកដំណើរការជាបណ្ដោះអាសន្ន ចំពោះផ្សារមិនរៀបរយ គឺផ្សារត្រពាំងល្វា ស្ថិតនៅភូមិត្រពាំងល្វា១ សង្កាត់កាកាបទី១ រាជធានីភ្នំពេញ រយៈពេល ១៤ ថ្ងៃ ដោយគិតចាប់ពីម៉ោងសូន្យ នាទី ថ្ងៃទី ១៧ ខែមិថុនា រហូតដល់ ថ្ងៃទី ៣០ ខែ មិថុនា ឆ្នាំ ២០២១ បន្ទាប់ពីមានអាជីវករ និងប្រជាពលរដ្ឋមួយចំនួនបានឆ្លងជំងឺកូវីដ ១៩។
សេចក្តីជូនដំណឹងរបស់រដ្ឋបាលខណ្ឌនៅថ្ងៃទី ១៧ ខែមិថុនា នេះ បញ្ជាក់ថា អាស្រ័យស្ថានភាពនៃការរីករាលដាលនៃជំងឺកូវីដ ១៩ ក្នុងរយៈពេលប៉ុន្មានថ្ងៃចុងក្រោយនេះ មានបងប្អូនអាជីវករ និងប្រជាពលរដ្ឋ បានឆ្លងវីរុសកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ ២០២១។ ស្ថានភាពនេះ បានឆ្លងរាលដាលយ៉ាងឆាប់រហ័ស គួរឲ្យព្រួយបារម្ភ និងចាំបាច់ត្រូវមានវិធានការសុខាភិបាលដើម្បីទប់ស្កាត់ជាបន្ទាន់។
សេចក្តីជូនដំណឹងបន្តថា ចំពោះមុខ រដ្ឋបាលខណ្ឌពោធិ៍សែនជ័យ សូមផ្អាកដំណើរការ ជាបណ្តោះអាសន្ន ផ្សារមិនរៀបរយ (ផ្សារត្រពាំងល្វា) ស្ថិតនៅភូមិត្រពាំងល្វា ១ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ រយៈពេល ១៤ ថ្ងៃ ដោយគិតចាប់ពីម៉ោងសូន្យនាទី ថ្ងៃទី ១៧ ខែមិថុនា រហូតដល់ ថ្ងៃទី ៣០ ខែ មិថុនា ឆ្នាំ២០២១ ដើម្បីបង្ការ និងទប់ស្កាត់ការឆ្លងរីករាលដាលវីរុសកូវីដ ១៩ ទៅដល់បងប្អូនអាជីវករ អតិថិជន ក៏ដូចជាប្រជាពលរដ្ឋដែលចេញ-ចូលក្នុងទីតាំងផ្សារខាងលើ។
រដ្ឋបាលខណ្ឌពោធិ៍សែនជ័យ មានក្តីសង្ឃឹមជឿជាក់ថា បងប្អូនប្រជាពលរដ្ឋ និងសាធារណជន ជាពិសេសអាជីវករទាំងអស់ ដែលកំពុងប្រកបអាជីវកម្មនៅផ្សារមិនរៀបរយ (ផ្សារត្រពាំងល្វា) មានការយោគយល់ អធ្យាស្រ័យ និងចូលរួមអនុវត្តសេចក្តីជូនដំណឹងនេះឲ្យមានប្រសិទ្ធភាពខ្ពស់៕