The Phnom Penh Post Search

Search form




Logo of Phnom Penh Post newspaper Phnom Penh Post - អាជ្ញាធរ​ខេត្ត​ពោធិ៍សាត់ ​​ស្នើសុំ​ឱ្យ​ថ្នាក់ជាតិ​ជួយ​​ទប់ស្កាត់​ការកាប់​ទន្ទ្រាន​ដីព្រៃ​ឧទ្យាន​ជាតិ​ជួរ​ភ្នំក្រវាញ

អាជ្ញាធរ​ខេត្ត​ពោធិ៍សាត់ ​​ស្នើសុំ​ឱ្យ​ថ្នាក់ជាតិ​ជួយ​​ទប់ស្កាត់​ការកាប់​ទន្ទ្រាន​ដីព្រៃ​ឧទ្យាន​ជាតិ​ជួរ​ភ្នំក្រវាញ

Content image - Phnom Penh Post
អាជ្ញាធរស្រុកវាលវែងចុះដាំកូនឈើ កាលពីថ្ងៃទី ១៥ មិថុនា។ រូបថត ហ្វេសប៊ុក

អាជ្ញាធរ​ខេត្ត​ពោធិ៍សាត់ ​​ស្នើសុំ​ឱ្យ​ថ្នាក់ជាតិ​ជួយ​​ទប់ស្កាត់​ការកាប់​ទន្ទ្រាន​ដីព្រៃ​ឧទ្យាន​ជាតិ​ជួរ​ភ្នំក្រវាញ

ពោធិ៍សាត់ៈ អាជ្ញាធរខេត្ត​ពោធិ៍សាត់​កំពុង​រៀបចំ​របាយការណ៍ ដើម្បី​ដាក់ជូន​ថ្នាក់ជាតិ​ស្នើសុំ​ជួយ​អន្តរាគមន៍​ដោះស្រាយ​បញ្ហា​កាប់​ទន្ទ្រាន​ដីព្រៃ​ឧទ្យានជាតិ​ជួរ​ភ្នំក្រវាញ​កណ្តាល​មាន​រាប់រយ​ទីតាំង​ ដែល​អាជ្ញាធរ​ខេត្ត​មិន​មាន​លទ្ធភាព​អាច​ទ្រទ្រង់ និង​បង្ក្រាបបាន​។ មន្ត្រី​អង្គការ​សង្គម​ស៊ីវិល​គាំទ្រ​ចំពោះ​ទង្វើ​នេះ ហើយ​សង្ឃឹម​ថា ថ្នាក់ជាតិ​អាច​វែកមុខ​អ្នក​នៅ​ពីក្រោយ​ខ្នង​បាន​។

លោក​ ខូយ រីដា អភិបាលរង​ខេត្ត​ពោធិ៍សាត់​ថ្លែង​ពី​ម្សិលមិញ​ថា​ ការកាប់​រានទន្ទ្រាន​ក្នុង​ឧទ្យានជាតិ​ជួរ​ភ្នំក្រវាញ​មាន​រាប់រយ​គោលដៅ ដែល​កម្លាំង​អាជ្ញាធរ​ថ្នាក់ក្រោម​ជាតិ​មិនអាច​ទប់ទល់​ឈ្នះ ហេតុនេះ​ទើប​លោក​ធ្វើ​របាយការណ៍​ដាក់ជូន​ទៅ​ថ្នាក់ជាតិ​ ដើម្បី​សុំ​ការអន្តរាគមន៍​។

លោក​ថ្លែងថា​៖ «​យើង​ត្រូវការ​កម្លាំង ប្រើ​សម្ភារ​មធ្យោបាយ ថវិកា គ្រប់​ជ្រុងជ្រោយ​។ កញ្ចប់​ថវិកា​របស់​រដ្ឋបាល​ខេត្ត​មិនអាច​ទ្រទ្រង់​បាន​ទេ បើ​រវល់​យកមក​ធ្វើ​អាហ្នឹង ចុះ​ចរន្ត​ការងារ​រដ្ឋបាល​សាលាខេត្ត​បាន​អី​? អ៊ីចឹង​បាន​វា​ហួស​សមត្ថភាព​របស់​ថ្នាក់ក្រោម​ជាតិ ទើប​យើង​ត្រូវធ្វើ​របាយការណ៍​ជូនទៅ​ថ្នាក់ជាតិ​ ដើម្បី​លោក​ពិចារណា​ផ្តល់​អនុសាសន៍ ឬក៏​ត្រូវធ្វើ​យ៉ាងម៉េច​បន្តទៀត​»​។

លោក​អភិបាលរង​ខេត្ត​ថ្លែងថា ថ្នាក់ក្រោម​ជាតិ​កំពុង​ធ្វើការងារ​ជា​បន្តបន្ទាប់ ក្នុង​ការចុះ​អប់រំ​ណែនាំ​ផ្សព្វផ្សាយ​ឱ្យ​ពលរដ្ឋ​មាន​ការយល់ដឹង និង​ចូលរួម​ក្នុង​កិច្ចការពារ​តំបន់​អភិរក្ស​ធនធាន​ធម្មជាតិ​ជួរ​ភ្នំក្រវាញ​កណ្តាល​។ ក្នុងនោះ​ក៏បាន​ធ្វើការ​ដកហូត​ដីព្រៃ​ត្រឡប់​មក​វិញ ព្រមទាំង​នាំយក​ដើមឈើ​ទៅ​ដាំ​លើ​ខ្នងភ្នំ​ ដើម្បី​ស្តារឡើងវិញ​ផងដែរ​។

លោក​ថ្លែងថា​៖ «​យើង​គ្រោង​ដាំ​ជាង​ ១ ​ម៉ឺន​ដើម ប៉ុន្តែ​ទើបតែ​ដាំ​បាន​ជាង​ ១ ​ពាន់​ដើម​ទេ ដោយសារ​បញ្ហា​អាកាសធាតុ​ភ្លៀង​ផង ក្តៅ​ផង​មាន​ការពិបាក​ក្នុង​ការឡើង​ភ្នំ​ទៅ​ដាំ​។ នៅលើ​ខ្នងភ្នំ​យើង ដាំ​ដើម​ក្ងោក ដើម្បី​ឱ្យ​អនាគត​មើលទៅ​ឃើញ​ពណ៌​ស្រស់ស្អាត ហើយ​នៅ​ជុំវិញ​ហ្នឹង​យើង​ដាំ​ដើម​គ្រញូង និង​ធ្នង់ ព្រោះ​តំបន់​នោះ​សម្បូរ​ដើមឈើ​ទាំង​ហ្នឹង​»​។

បើតាម​លោក​ ខូយ រីដា នៅ​ថ្ងៃទី​ ១៦ មិថុនា ក្រុមការងារ​បាន​ចុះទៅ​បន្តទៀត ដោយ​បែងចែក​ជា​ ២ ​ក្រុម ១ ​ក្រុម​ចុះ​អប់រំ​ផ្សព្វផ្សាយ​នៅតាម​ខ្នង​ផ្ទះ​កុំឱ្យ​ពលរដ្ឋ​ឡើង​កាប់​វាតទី​បន្ថែម​ទៀត​។ ចំណែក​ ១ ​ក្រុម​ទៀត​ទៅ​ឆ្វៀល​ដកហូត​ដី ដែល​ពលរដ្ឋ​ទន្ទ្រាន​យក​ដោយ​ខុសច្បាប់​មួយចំនួន​មក​ទុកជា​ដី​បម្រុង​របស់​រដ្ឋ​។

លោក​ រីដា បន្តថា តាម​ការសង្កេត​ជាក់ស្តែង ប្រជាពលរដ្ឋ​ដែល​ទៅ​កាប់​ព្រៃ​ចាប់ដី​បាន​ហើយ​នោះ​ក្នុង​ ១ ​គ្រួសារ​មាន​ខ្លះ​ ៣ ​ទៅ​ ៥ ​ហិកតា និង​ខ្លះទៀត​មាន​ដី​ ៦ ទៅ​ ៧ ​ហិកតា​។ ប៉ុន្តែ​ពួកគាត់​មាន​មហិច្ឆតា​បន្ត​កាប់​បន្ថែម​ឡើងទៅ​លើ​ភ្នំ​ទាំងអស់​ដែល​នៅ​ក្បែរ​នោះ​ក្នុង​គោលបំណង​លក់ដូរ​។

លោក​ថ្លែងថា​៖ «​ផែន​គាត់​គឺ​ទៅ​តែ​អាហ្នឹង គ្មាន​អី​ជា​កសិកម្ម​ពិតប្រាកដ​ទេ​។ បើ​ធ្វើ​ពិតប្រាកដ​មកដល់​ពេល​នេះ មិន​ខ្វះ​ទេ​ដី​សម្រាប់ធ្វើ​កសិកម្ម​នោះ​។ ប៉ុន្តែ​គោលបំណង​គាត់ គឺ​ដាំ​ដំណាំ​ចេញ​រូបរាង​បាន​ហើយ គាត់​រក​ម៉ូយ​ដាក់​ហើយ​គាត់​ទៅ​កន្លែង​ផ្សេងទៀត​»​។

លោក​ថា មិនមែន​អាជ្ញាធរ​មិន​អនុវត្ត​ច្បាប់​ទេ ប៉ុន្តែ​អ្នកខ្លះ​ឃាត់​មក​ធ្វើការ​អប់រំ​ហើយ​ដោះលែង​វិញ​។ រីឯ​ខ្លះទៀត​ហួសហេតុ​ពេក បាន​បញ្ជូន​ទៅ​តុលាការ​ដោះស្រាយ​តាមច្បាប់​តាម​សភាព​ជាក់ស្តែង​។

លោក​ថ្លែងថា​៖ «​ពេល​ចុះទៅ​យើង​មិន​ធ្វើបាប​ប្រជាជន​ទេ គឺ​យើង​ញែក​ដាច់​រវាង​ប្រជាជន និង​ជនល្មើស មិនមែន​ចេះតែ​ធ្វើ​ផ្តេសផ្តាស​ទេ​។ ក្រុម​ជនល្មើស​បាន​រត់គេចខ្លួន​បាត់​អស់ហើយ យើង​ក៏​កំពុង​ស្រាវជ្រាវ​ចាប់​យកមក​ដោះស្រាយ​តាមច្បាប់​ដែរ​»​។

លោក​ សំ ចាន់គា អ្នក​សម្របសម្រួល​សមាគម​អាដហុក​ប្រចាំខេត្ត​ពោធិ៍សាត់​ថ្លែង​ពី​ម្សិលមិញ​ថា ការធ្វើ​របស់​អាជ្ញាធរ​ជា​រឿង​ត្រឹមត្រូវ​។ បើសិនជា​អ្នក​ដែល​ទៅ​ទន្ទ្រាន​នោះ​ជា​អ្នក​ដែលមាន​អំណាច​ខ្លាំង​ជាង​អាជ្ញាធរ អាជ្ញាធរខេត្ត​គួរតែ​ធ្វើ​របាយការណ៍​ដាក់​ទៅ ថ្នាក់ជាតិ មិនគួរណា​បិទបាំង​ទេ​។

លោក​ថ្លែងថា​៖ «​បើ​អាជ្ញាធរ​ខេត្តពោធិ៍សាត់​លោក​ហ៊ាន​ធ្វើ​របាយការណ៍ ហ៊ាន​សុំ​ការអន្តរាគមន៍​បែប​ហ្នឹង ខ្ញុំ​យល់ថា អាជ្ញាធរ​ថ្នាក់ជាតិ​លោក​នឹងមាន​វិធានការ​ទប់ស្កាត់​ជាមិនខាន​ឡើយ​»​។

ក្នុងនាម​អង្គការ​សង្គម​ស៊ីវិល លោក​ សំ ចាន់គា ស្នើសុំ​ឱ្យមាន​ការស្រាវជ្រាវ​អ្នក​ដែល​នៅ​ពី​ក្រោយខ្នង​នៃ​ឧក្រិដ្ឋកម្ម​ព្រៃឈើ​ហើយ​ឃាត់ខ្លួន​ពួកគេ​មក​ផ្តន្ទាទោស​តាមច្បាប់​។ បើ​មិន​ដូច្នោះ​ទេ​នឹង​ចាប់​បានតែ​ប្រជាជន​ដែល​ជា​អ្នកស៊ីឈ្នួល​កាប់ ហើយ​ការចាប់ បែប​នោះ​គឺ​ចាប់​មិន​អស់​ទេ​។

លោក​ថា​៖ «​ទាល់តែ​ចាប់​អ្នកណា​ដែល​នៅ​ពី​ក្រោយខ្នង ដែល​ជា​អ្នក​ញុះញង់​ឱ្យ​ពលរដ្ឋ​ទៅ​កាប់​ព្រៃ​ចាប់យក​ដី​ហ្នឹង​ឱ្យបាន ហើយ​វែកមុខ​អាជ្ញាធរ ឬ​មន្ត្រី​ជំនាញ​ខិលខូច​មួយចំនួន​ជួយ​សម្រួល​ឱ្យ​មាន​ការចូល​កាប់បំផ្លាញ​ដីព្រៃ​ទាំងអស់​ហ្នឹង នាំមក​ផ្តន្ទាទោស​ទើប​យើង​ទប់ស្កាត់​បាន​»៕

អត្ថបទគួរចាប់អារម្មណ៍