ព្រះសីហនុៈ រដ្ឋបាលខេត្តព្រះសីហនុ ត្រៀមបើកយុទ្ធនាការចាក់វ៉ាក់សាំងបង្ការជំងឹកូវីដ ១៩ លក្ខណៈទ្រង់ទ្រាយធំ ជូនប្រជាពលរដ្ឋដែលមានអាយុចាប់ពី ១៨ ឆ្នាំឡើងទៅ នៅទូទាំងខេត្តចាប់ពីថ្ងៃទី ២១ ខែមិថុនា ខាងមុខនេះតទៅ។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ ប្រាប់ ភ្នំពេញ ប៉ុស្តិ៍ នៅថ្ងៃទី ១៧ ខែមិថុនាថា យុទ្ធនាការចាក់វ៉ាក់សាំងបង្ការកូវីដ ១៩ ទ្រង់ទ្រាយធំនឹងចាប់ផ្តើមពីថ្ងៃទី ២១ ខែមិថុនា។ ប៉ុន្តែ សម្រាប់ទីតាំងមួយចំនួនត្រូវបានរៀបចំរួចរាល់ ជាពិសេសនៅក្នុងក្រុងព្រះសីហនុ ដែលមានទីតាំងស្រាប់បានចាប់ផ្តើមដំណើរការចាក់វាក់សំាងបង្ការកូវីដ ១៩ ជូនប្រជាពលរដ្ឋបណ្តើរៗ ចាប់ពីថ្ងៃទី ១៧ ខែមិថុនានេះតទៅ។
លោកបន្តថា ដំណើរការនៃការចាក់វ៉ាក់សំាងជូនប្រជាពលរដ្ឋនៅខេត្តព្រះសីហនុ ចាប់ពីពេលនេះទៅ គឺប្រព្រឹត្តទៅដោយរលូន។ ជាមួយគ្នានេះ ប្រជាពលរដ្ឋដែលបានមកចូលរួមចាក់វ៉ាក់សាំង មានសណ្តាប់ធ្លាប់រៀបរយល្អ ព្រោះដោយសារមានការសម្របសម្រួល ពីអាជ្ញធរពាក់ព័ន្ធ ដែលមានភាពងាយស្រួលដល់មន្ត្រីពេទ្យ និងការពារពីការចម្លងថ្មីនៃជំងឺកូវីដ ១៩ ផងដែរ។
លោក ភារម្ យថ្លែងថា៖ «យុទ្ធនាការចាក់វ៉ាក់សាំងទ្រង់ទ្រាយធំសម្រាប់ខេត្តព្រះសីហនុនេះ គឺនឹងចាក់ជូនប្រជាពលរដ្ឋក្នុងព្រះសីហនុ ដែលមានអាយុចាប់ពី ១៨ ឆ្នាំឡើង។ ចាក់ជូនកម្មករ កម្មរិកនីរោងចក្រ និងចាក់ជូនជនបរទេស ដែលកំពុងបម្រើការងារនៅក្នុងខេត្តព្រះសីហនុទាំងអស់»។
បើតាម លោក ឃាង ភារម្យ ព្រឹត្តិការណ៍សហគមន៍ ២០ កុម្ភៈ បានធ្វើឱ្យប្រជាពលរដ្ឋនៅក្នុងខេត្តព្រះសីហនុមានអ្នកឆ្លងជំងឺកូវីដ ១៩ ជាង ៤ ពាន់នាក់ និងអ្នកដែលស្លាប់មានចំនួន ២២ នាក់។
បើតាមសេចក្តីជូនដំណឹងរបស់រដ្ឋបាលខេត្តព្រះសីហនុដែលចុះហត្ថលេខា ដោយលោក គួច ចំរើន អភិបាលខេត្តព្រះសីហនុ កាលពីថ្ងៃទី ១៦ ខែមិថុនា រដ្ឋបាលក្រុងព្រះសីហនុ បានរៀបចំទីតាំងសម្រាប់ចាក់វ៉ាក់សាំងបង្ការជំងឺកូវីដ ១៩ ជូនដល់បងប្អូនប្រជាពលរដ្ឋដែលមិនទាន់ បានចាក់វ៉ាក់សាំងនៅទូទាំងក្រុងព្រះសីហនុ មានចំនួន ៥ ទីតាំង ចាប់ពីថ្ងៃទី ១៧ ខែមិថុនា ឆ្នាំ ២០២១ តទៅ។
តាមសេចក្តីជូនដំណឹង ផ្អែកតាមផែនការការចាក់វ៉ាក់សាំងបង្ការជំងឺកូវីដ ១៩ នឹងត្រូវចាក់ជូនប្រជាពលរដ្ឋទាំងអស់គ្នាដែលរស់នៅ ក្នុងក្រុងព្រះសីហនុដែលមានអាយុចាប់ពី ១៨ ឆ្នាំឡើង។ ប៉ុន្តែដើម្បីរក្សានូវសណ្តាប់ធ្នាប់របៀបរៀបរយ និងដើម្បីបង្ការ ហានិភ័យនៃការឆ្លងជំងឺកូវីដ ១៩ រដ្ឋបាលក្រុងព្រះសីហនុ បានកំណត់ចំនួនប្រជាពលរដ្ឋជាក់លាក់ដែលត្រូវអញ្ជើញមកចាក់វ៉ាក់សាំងប្រចាំថ្ងៃតាមទីតាំងទាំង ៥ ខាងលើ។
វីដេអូ៖
លោក គួច ចំរើន ថ្លែងថា មានតែការចាក់វ៉ាក់សាំងទេ ដែលអាចជួយកាត់បន្ថយការចម្លងជំងឺកូវីដ ១៩ បាន។ ពលរដ្ឋដែលគ្រប់អាយុអាចចាក់វ៉ាក់សាំងកំពុងរស់នៅ និងធ្វើការងារនៅខេត្តព្រះសីហនុ រួមទាំងជនបរទេសនឹងទទួលបានវ៉ាក់សាំងការពារជំងឺកូវីដ ១៩ ពីរដ្ឋាភិបាលកម្ពុជា។
បើតាមលោក គួច ចំរើន នៅខេត្តព្រះសីហនុ ប្រជាជនដែលមានអាយុ ១៨ ឆ្នាំឡើង មានជាង ២០ ម៉ឺននាក់ ហើយមួយចំនួនបានចាក់វ៉ាក់សាំងរួចហើយ។ តែបច្ចុប្បន្ននៅសល់ប្រមាណ ១៩ ម៉ឺននាក់ទៀតប៉ុណ្ណោះ ដែលនឹងទទួលបានក្នុងយុទ្ធនាការចាក់វ៉ាក់សាំងដែលនឹងចាប់ផ្តើមនៅថ្ងៃទី ២១ ខែ មិថុនា ឆ្នាំ ២០២១។
លោក គួច ចំរើន បញ្ជាក់ថា៖ «ដើម្បីចៀសវាងការប្រមូលផ្តុំគ្នា ការមកចាក់វ៉ាក់សាំងនេះ រដ្ឋបាលខេត្តព្រះសីហនុ បានកំណត់គោលដៅចំនួន ១៩ ទីតាំងផ្សេងគ្នា សម្រាប់រៀបចំជាកន្លែងចាក់វ៉ាក់សាំងជូនពលរដ្ឋនៅទូទាំងខេត្ត។ នៅក្រុងព្រះសីហនុ ៥ ទីតាំង ស្រុកព្រៃនប់ ៥ ទីតាំង កំពង់សីលា ៤ ទីតាំង ក្រុងកោះរ៉ុង ២ ទីតាំង និងស្រុកស្ទឹងហាវ ១ ទីតាំង និងមាននៅតំបន់សេដ្ឋកិច្ចពិសេសក្រុងព្រះសីហនុ និងតំបន់សេដ្ឋកិច្ចចឺជាង ក្នុងស្រុកព្រៃនប់ផងដែរ»។
បើតាមលោក គួច ចំរើន យុទ្ធនាការនេះ មានសមាសភាពបុគ្គលិកពេទ្យចម្រុះមកពីមន្ទីរសុខាភិបាលខេត្ត កងទ័ពជើងទឹកមូលដ្ឋានសមុទ្ររាម កងពលតូចលេខ ៧០។
ពាក់ព័ន្ធនឹងយុទ្ធនាការប្រយុទ្ធប្រឆាំងជំងឺកូវីដ ១៩ នៅកម្ពុជា លោក គិត ម៉េង អគ្គនាយកក្រុមហ៊ុន Royal Group នៅថ្ងៃទី ១៧ ខែមិថុនា បានប្រកាសបរិច្ចាគថវិកាចំនួន ៣ លានដុល្លារ ជូនលោក ហ៊ុន សែន នាយករដ្ឋមន្រ្តីនៃកម្ពុជា សម្រាប់ការទិញឧបករណ៍តេស្តរហ័សរកមេរោគកូវីដ ១៩។
ជាមួយនឹងការឧបត្ថម្ភនេះ លោក គិត ម៉េង ថ្លែងថា ប្រទេសកម្ពុជា ធ្វើបានល្អក្នុងការគ្រប់គ្រងជំងឺរាតត្បាតនេះ និងជាប្រទេសឈានមុខគេមួយក្នុងការចាក់វ៉ាក់សាំង។ ឧបករណ៍តេស្តរហ័សរកមេរោគកូវីដ ១៩ នឹងជួយដល់ការវាយតម្លៃយ៉ាងរហ័សនៃការប្រថុយនឹងហានិភ័យ និងជួយបន្ថែមទៀតដល់ការបង្ការការរីករាលដាលជំងឺនេះ៕