ភ្នំពេញៈ ក្រសួងមហាផ្ទៃបង្កើតក្រុមការងាររៀបចំប្រព័ន្ធ ដើម្បីបម្រើឱ្យរដ្ឋាភិបាលឌីជីថល ដោយប្រើប្រាស់ប្រព័ន្ធបច្ចេកវិទ្យាព័ត៌មាន ក្នុងគោលបំណង ដើម្បីពន្លឿនរបៀបរបបធ្វើការងារ របស់ក្រសួងនេះ ឱ្យបានលឿននិងកាន់តែមានប្រសិទ្ធភាពជាងមុន។
ក្រុមការងារនេះ មានសមាសភាព ១៥ នាក់ ដែលមានលោក សក់ សេដ្ឋា រដ្ឋលេខាធិការប្រចាំការក្រសួងមហាផ្ទៃជាប្រធាន និងមានលេខាធិការដ្ឋានមួយ ជាជំនួយការ ដែលដឹកនាំដោយនាយកដ្ឋានព័ត៌មានវិទ្យា នៃអគ្គលេខាធិការដ្ឋាន ក្រសួងមហាផ្ទៃ។
លោក សក់ សេដ្ឋា ប្រាប់ ភ្នំពេញ ប៉ុស្តិ៍ នៅថ្ងៃទី ១៧ ខែមិថុនាថា វាមានផ្នែកច្រើន ដែលពាក់ព័ន្ធគ្នាក្នុងក្របខណ្ឌក្រសួងមហាផ្ទៃ។ អ៊ីចឹង ក្រុមការងារត្រូវរៀបចំជាប្រព័ន្ធមួយ ដើម្បីធ្វើយ៉ាងណា បម្រើឱ្យរដ្ឋាភិបាលឌីជីថល។
លោកបញ្ជាក់ថា៖ «កន្លងមក យើងធ្វើតាមរបៀបក្រដាសស្នាម។ អ៊ីចឹង វាទាមទារឱ្យមានក្រុមការងារ នៅក្នុងផ្ទៃក្នុងក្រសួង ដើម្បីរៀបចំនូវផែនការយុទ្ធសាស្ត្រ ផែនការសកម្មភាព ដើម្បីឈានទៅដល់គោលដៅហ្នឹង។ មានន័យថា ចុងក្រោយ យើងរៀបចំប្រព័ន្ធការងាររបស់យើង ឱ្យវាទំនើបជឿនលឿនតាមរបៀបជាអេឡិចត្រូនិក»។
លោក សក់ សេដ្ឋា ថ្លែងថា សព្វថ្ងៃការប្រើប្រាស់ក្រដាសស្នាម មានទំហំការងារច្រើន ហើយវាអាចមានការយឺតយ៉ាវ ហើយការមានរដ្ឋាភិបាលឌីជីថល មិនមែនមានន័យថា ការប្រើប្រាស់ក្រដាសស្នាមត្រូវបានបោះបង់ចោលនោះទេ។
ក្រដាសស្នាមនៅតែមាន ដោយសារការងារលើក្រដាសស្នាម និងតាមបច្ចេកវិទ្យានេះ មានទំនាក់ទំនងនឹងគ្នា ហើយការទំនាក់ទំនងរបៀបរបបធ្វើការរបស់រដ្ឋាភិបាល នឹងធ្វើឱ្យមានភាពជឿនលឿន នៅពេលមានការប្រើប្រាស់ប្រព័ន្ធឌីជីថលនេះ។
លោកថ្លែងថា៖ «យើងមានជាបណ្តើរៗ ហើយ (ប្រព័ន្ធអេឡិចត្រូនិក) ប៉ុន្តែយើងចង់ឱ្យមានជាប្រព័ន្ធមួយ ដែលកាន់តែមានភាពងាយស្រួល កាន់តែមានប្រសិទ្ធភាព ឧទាហរណ៍ដូចជា ការបង្កើតឱ្យមានវេបសាយ ឬក៏ការឆ្លើយតបលើបញ្ហាផ្សេងៗរបស់ប្រជាពលរដ្ឋតាមប្រព័ន្ធអេឡិចត្រូនិក»។
លោកបន្តថា ប្រព័ន្ធអេឡិចត្រូនិកនេះ នឹងជួយឱ្យការងាររក្រសួងរបស់លោក បានលឿន និងមានភាពប្រាកដប្រជា ឧទាហរណ៍ ការចុះបញ្ជីប្រជាជន កាលពីមុនត្រូវបានធ្វើដោយក្រដាសស្នាម ហើយក្រោយមកការចុះបញ្ជីនេះត្រូវបានធ្វើដោយប្រព័ន្ធអេឡិចត្រូនិក។
លោក សក់ សេដ្ឋា បញ្ជាក់ថា៖«អ៊ីចឹងហើយ មនុស្សម្នាក់អាចមានទិន្នន័យមួយជាក់លាក់។ វាអត់អាចកែ អត់អាចដោះដូរបានអ៊ីចឹង»។
យោងតាមសម្រេចស្តីពីការបង្កើតក្រុមការងាររដ្ឋាភិបាលឌីជីថល បច្ចេកវិទ្យាគមនាគមន៍ និងព័ត៌មាន របស់ក្រសួងមហាផ្ទៃ ដែលបានផ្សព្វផ្សាយកាលពីថ្ងៃទី ១៦ ខែមិថុនា បានឱ្យដឹងថា ក្រុមការងារនេះ មានតួនាទីគ្រប់គ្រងគម្រោងបច្ចេកវិទ្យាគមនាគមន៍ និងព័ត៌មាន នៅតាមបណ្ដាអគ្គនាយកដ្ឋាន និងអង្គភាពចំណុះក្រសួងរៀបចំកសាងផែនការមេ បច្ចេកវិទ្យាគមនាគមន៍ និងព័ត៌មាន និងការបណ្ដុះបណ្ដាលលើកកម្ពស់សមត្ថភាពធនធានមនុស្ស។
ក្រុមការងារនេះ មានគ្រប់គ្រងការធ្វើសមាហរណកម្មតភ្ជាប់រវាង ប្រព័ន្ធបច្ចេកវិទ្យាគមនាគន៍ និងព័ត៌មាន របស់ក្រសួងមហាផ្ទៃ ជាមួយប្រព័ន្ធបច្ចេកវិទ្យាគមនាគមន៍ និងព័ត៌មាន នៃបណ្ដាក្រសួង-ស្ថាប័នពាក់ព័ន្ធរបស់រាជរដ្ឋាភិបាល។
ក្រុមការងារនេះ ក៏មានភារកិច្ចគ្រប់គ្រងការធ្វើបច្ចុប្បន្នភាព វាយតម្លៃគុណភាពប្រព័ន្ធ និងសម្ភារបច្ចេកទេស បច្ចេកវិទ្យាគមនាគមន៍ និងព័ត៌មាន ឲ្យសមស្របតាមស្ថានភាពរីកចម្រើន នៃបច្ចេកវិទ្យាពិភពលោក បម្រើដល់ការងារជំនាញ និងការងារផ្ដល់សេវាសាធារណៈ ឲ្យកាន់តែមានប្រសិទ្ធភាព។
ក្រុមការងារនេះ ក៏ត្រូវរៀបចំគោលនយោបាយ និងលិខិតបទដ្ឋានគតិយុត្ត ពាក់ព័ន្ធនានា ដើម្បីធានាដល់ការងារអនុវត្តប្រព័ន្ធបច្ចេកវិទ្យាគមនាគមន៍ និងព័ត៌មាន ការងាររដ្ឋាភិបាលឌីជីថល ពលរដ្ឋឌីជីថល និងធុរកិច្ចឌីជីថល ក្របខ័ណ្ឌក្រសួងមហាផ្ទៃផងដែរ៕