The Phnom Penh Post Search

Search form




Logo of Phnom Penh Post newspaper Phnom Penh Post - ពល​រដ្ឋ​ជាង​ ៨០ គ្រួសារ ស្នើ​សុំ​ទៅ​ព្រឹទ្ធ​សភា សូម​ឱ្យ​ជួយ​អន្តរាគមន៍​បញ្ឈប់​ការ​ជីក​អាច​ម៍​ដី​និង​ការដ្ឋាន​វាយ​ថ្មរបស់​ក្រុម​ហ៊ុន​មួយ​

ពល​រដ្ឋ​ជាង​ ៨០ គ្រួសារ ស្នើ​សុំ​ទៅ​ព្រឹទ្ធ​សភា សូម​ឱ្យ​ជួយ​អន្តរាគមន៍​បញ្ឈប់​ការ​ជីក​អាច​ម៍​ដី​និង​ការដ្ឋាន​វាយ​ថ្មរបស់​ក្រុម​ហ៊ុន​មួយ​

Content image - Phnom Penh Post
អ្នក​ភូមិ​ប្រមូល​ផ្តុំ​គ្នា​តវ៉ា នៅ​ទីតាំង​ជីក​អាច​ម៍​ដី​កាលពី​ថ្ងៃ​ទី​ ២៦ ​ខែ​ ឧសភា ​ឆ្នាំ ​២០២១។ រូប​ថត សហការី

ពល​រដ្ឋ​ជាង​ ៨០ គ្រួសារ ស្នើ​សុំ​ទៅ​ព្រឹទ្ធ​សភា សូម​ឱ្យ​ជួយ​អន្តរាគមន៍​បញ្ឈប់​ការ​ជីក​អាច​ម៍​ដី​និង​ការដ្ឋាន​វាយ​ថ្មរបស់​ក្រុម​ហ៊ុន​មួយ​

កណ្តាលៈ ប្រជាពលរដ្ឋ ៨៧ គ្រួសារ ដែល​កំពុង​អាស្រ័យ​ផល ក្នុង​អាងទឹក​ព្រែក​រាំង ស្ថិតនៅ​ក្នុងភូមិ​ព្រែក​រាំង និង​ភូមិ​ទួល​ខ្មួញ ឃុំ​ទឹក​វិល ស្រុក​ស្អាង បានដាក់​ពាក្យស្នើសុំ​ទៅ លោក សាយ ឈុំ ប្រធានព្រឹទ្ធសភា សូមឱ្យ​ជួយ​អន្តរាគមន៍ និរាករណ៍ អាជ្ញាប័ណ្ណ ជីក​អាចម៍​ដី​ និង​ការដ្ឋាន​វាយ​ថ្ម លេខ ០០៥៦ ដែល​ចេញ​ដោយ​​​ក្រសួង​រ៉ែ និង​ថាមពល ព្រោះ​បានធ្វើ​ឱ​ប៉ះពាល់​​ដល់​ដី​អាស្រ័យ​ផល​របស់​ពួកគាត់ ។

អ្នកស្រី ឆុំ សុធី តំណាង​ប្រជាពលរដ្ឋ នៅ​ភូមិ​ទួល​ឃ្មួញ ឃុំ​ទឹក​វិល ស្រុក​ស្អាង​ថ្លែង​នៅ​ថ្ងៃទី ១៧ ខែមិថុនា​ថា ក្រុមហ៊ុន​អ្នកស្រី កែវ សុជាតា កំពុង​ជីក​យក​អាច​ដី​អាងទឹក​ព្រែក​រាំង ហើយ​បាន​រាលដាល​ដល់​ដីស្រែ​ពលរដ្ឋ ដែល​ធ្លាប់​អាស្រ័យ​ផល​រាល់​ឆ្នាំ​មក​ហើយ​។

ដោយ​បារម្ភ​ខ្លាច គ្មាន​ស្រែ​ធ្វើ​បន្តទៀត ពលរដ្ឋ​បាន​ស្រុះស្រួល​គ្នា ដាក់​ពាក្យសុំ​អន្តរាគមន៍​ទៅកាន់ ក្រសួង​រ៉ែ និង​ថាមពល ដើម្បី​ស្នើ​សូម​និរាករណ៍​អាជ្ញា​បណ្ណ​ដែល​ក្រសួង​ បានចេញ​ហើយ​នោះ​ ប៉ុន្តែ មិនទាន់មាន​លទ្ធផល ទើប​ពលរដ្ឋ​បាន​យកពាក្យ​ទៅកាន់​ព្រឹទ្ធ​សភា​បន្ថែមទៀត កាលពី​ថ្ងៃទី ១៦ ខែមិថុនា។

អ្នកស្រី​ថ្លែងថា៖ «ក្រុមហ៊ុន​បាន​ចូល​ជីក​យក​អាចម៍ដី​ ប៉ះចំ​ដីស្រែ​ពលរដ្ឋ​អស់​ប្រមាណ៣ហិក​តា​ ហើយបើសិន​មិនមាន​ថ្នាក់លើ​ចុះ​អន្តរាគមន៍​ជួយ​ទេ ក្រុម​ហ៊ុ​ននឹង​នៅតែ​បន្តធ្វើ​ទៀត។ ឥឡូវ​ដី​ប៉ះពាល់​ហ្នឹង គឺ​នៅខាងមុខ​អាង ខាងជើង​អាង ខាងត្បូង និង​ខាងលិច​អាង គឺ​ចល័ត​ជុំវិញ​អាង​ហ្នឹង​ហ្មង» ។

លោក រឿង សា​រ៉ុ​ម តំណាង​ពលរដ្ឋ​នៅ​ភូមិ​ព្រែក​រាំង ឃុំ​ទឹក​វិល ថ្លែងថា ពលរដ្ឋ​បានធ្វើការ​ស្នើសុំ​អាជ្ញា​ធរមាន​សមត្ថកិច្ច ជាច្រើន​ដង​តាម​វេទិកាសាធារណៈ​ ដែលមាន​ការចូលរួម​ពី​អាជ្ញាធរ​គ្រប់លំដាប់​ថ្នាក់ ប៉ុន្តែ​មិនមាន​ការចុះ​អន្តរាគមន៍​ឆ្លើយតប ឡើយ។

លោក​ថ្លែងថា៖ «ពួក​ខ្ញុំ​សុំ​តាម​ផ្លូវការ​ផង ក្រៅផ្លូវការ​ផង តែ​អត់​បាន​ផល។ ពេល​មាន​វេទិកា​សាធារណៈ​នៅ​វត្ត​ព្រែក​រាំង ពួក​ខ្ញុំ​តែងតែ​សំណូមពរ អាជ្ញាធរ មាន​ទាំង​ខេត្ត និង​ស្រុក ឲ្យ​ចុះមក​ពិនិត្យមើល​ជាក់ស្តែង ដោយ​អាជ្ញាធរ​តែ​ងតែ​ថា​ នឹង​ចុះមក​មើល ប៉ុន្តែ​បាន​តែ​​ថា មិនដែល​ឃើញ​ចុះមក​ជួយ​អន្តរាគមន៍​ឡើយ» ។

បើតាម​លោក សា​រ៉ុ​ម នៅ​ថ្ងៃទី ២៤ ខែ ឧសភា ឆ្នាំ ២០២១ មានការ​ប្រជុំ​នៅក្នុង​បរិវេណ​វត្ត​ព្រែក​រាំង ដើ​ម្បិ​ផ្សព្វផ្សាយ​អាជ្ញា​បណ្ណ​អណ្តូងរ៉ែ​បើក និង​ការដ្ឋាន​វាយ​ថ្ម​លេខ ០០៥៦ ចុះ​ថ្ងៃទី ១៥ ខែមីនា ឆ្នាំ ២០២០ ដែល​​ក្រសួង​រ៉ែ និង​ថាមពល បាន​​អនុញ្ញាត​ឲ្យ​អ្នកស្រី កែវ សុជាតា​ អាច​ជីក​យក​អាចម៍ដី ទំហំ ១០ ហិក​​តា នៅក្នុង​អាង​ស្តុក​ទឹក​ព្រែក​រាំង។

ដោយឡែក​នៅ​ថ្ងៃទី ២៥ ខែ ឧសភា ឆ្នាំ២០២១ ពលរដ្ឋ​ក៏បាន​ដាក់ពាក្យ​ស្នើសុំ​ទៅ​រដ្ឋមន្ត្រីក្រសួង​រ៉ែ​ និង​ថាមពល ដើម្បី​សុំ​និរាករណ៍​អាជ្ញា​បណ្ណ​ខាងលើ តែ​មកដល់​ថ្ងៃទី ១៧ ខែ​មិន​ថុ​នា មិនទាន់​ឃើញ​មាន​លទ្ធផល​អ្វី​ទេ។

លោក ម៉ម ប៊ុននាង អ្នកនាំពាក្យ​ព្រឹទ្ធសភា ថ្លែងថា លោក​នៅ​មិនទាន់​ទទួលបាន​ពាក្យស្នើសុំ​ ដែល​ពលរដ្ឋ​បាន​យកទៅដាក់​នៅ​ព្រឹទ្ធ​សភា​នៅឡើយ នៅ​ថ្ងៃទី ១៧ ខែមិថុនា​។

លោក​ថ្លែងថា៖ «ខ្ញុំ​មិនទាន់​ឃើញ​ពាក្យស្នើសុំ​ របស់​ពលរដ្ឋ​ដែល​ដាក់​មក​នោះទេ មូលហេតុ​អាច​បណ្តាលមកពី ការងារ​នៅ​ស្ថាន​ប័ន​នានា មាន​អ្នកធ្វើការ​តិចតួច ព្រោះ​ការពារ​ការឆ្លង​កូ​វីដ​បាន​កាត់បន្ថយ​បុ​គ្ក​លិ​កមក​ធ្វើការ​នៅសល់​តិច អ៊ីចឹង​ឯកសារ​បញ្ជូន​អី​មានការ​យឺត​បន្តិច ដល់ពេល​ទទួលបាន​ឯកសារ​ហ្នឹង​ចាំ​ខ្ញុំ​ជម្រាបជូន​ទៅវិញ» ។

លោក យស មុនី​រ៉ាត់ អគ្គនាយក នៃ​អគ្គនាយកដ្ឋាន​ធនធាន​រ៉ែ ថ្លែងថា ជុំវិញ​រឿងនេះ​ ប្រជាពលរដ្ឋ​គួរតែ​ធ្វើ​ការស្នើ​ដោះស្រាយ​ជាមួយ​អាជ្ញាធរ ដើម្បី​ឲ្យ​អាជ្ញាធរ​ធ្វើសំណើរ​សុំ​ផ្អាក​អាជ្ញា​បណ្ណ​នោះ​វិញ។

ប៉ុន្តែ​បើ​អាជ្ញាធរ​ មិនមាន​សំណើរ​មក​ក្រសួង​ឲ្យ​ផ្អាក​ទេ ក្រសួង​មិនអាច​ផ្អាក​បានឡើយ។

លោ​កថ្លែងថា៖«ថ្មីៗនេះ ក្រុមការងារ​យើង ​បាន​ចុះទៅ​ដោះស្រាយ​ជាមួយ​អាជ្ញាធរ​មូលដ្ឋាន​ និងបាន​ជួប​ជាមួយ​ប្រជាពលរដ្ឋ​មាន​របាយការណ៍​ត្រឡប់មក​ក្រសួង​វិញ​ថា ពលរដ្ឋ​ទាំងអស់​នោះ គេ​សាទរ ការជីក​ស្តា​អាងទឹក​ហ្នឹង​សម្រាប់​ប្រើប្រាស់​រួម» ។

លោក គ្រុយ ម៉ា​ឡែ​ន នាយក​រដ្ឋបាល​ខេត្តកណ្តាល​ថ្លែងថា រឿងនេះ​សំខាន់បំផុត​ គឺ​សួរ​ទៅ​អាជ្ញាធរ​ស្រុក ព្រោះ​បញ្ហា​នៅ​មូលដ្ឋាន រដ្ឋបាលខេត្ត ​ក៏ត្រូវ​រង់ចាំ​មើល​របាយ​ការណ៍​ពី​អាជ្ញាធរ​ស្រុក​ផងដែរ។

លោក ប៉ែន ប៊ុណ្ណា​រ៍ មន្ត្រីជាន់ខ្ពស់​ នៃ​សមាគម​អាដហុក ថ្លែងថា ការដែល​ប្រជាពលរដ្ឋ​ដាក់ពាក្យ​ទៅកាន់​ស្ថាប័ន​កំពូល​របស់​ជាតិ ជា​រឿង​មួយ​ត្រឹមត្រូវ ដើម្បី​បង្ហាញ​ពី​ភាពត្រឹមត្រូវ​របស់ខ្លួន​ ក្នុង​ការចូលទៅ​អាស្រ័យ​ផល​លើដី​រដ្ឋ។

លោក​ថ្លែងថា៖«រឿង​មន្ត្រី​ជំនាញ​ផ្តល់​ការអនុញ្ញាត​កាយ​ដី ឬ​ធ្វើ​អ្វី​មួយ​ត្រូវ​សិក្សា​ពី​ផលប៉ះពាល់​ ចំពោះ​​ជីវភាព​របស់​ប្រជាពលរដ្ឋ​» ។

ប៉ុន្តែ​ លោក យស មុនី​រ៉ាត់ ​បញ្ជាក់​ថា ក្រសួង​តែង​ចាត់​មន្ត្រី​ឲ្យ​ទៅពិនិត្យ​ជាក់ស្តែង ​ពី​ផលប៉ះពាល់ បន្ទាប់ពី​មាន​មាន​អាជីវករ​ស្នើសុំ​អាជ្ញា​បណ្ណ។ លោក​ថ្លែងថា៖«ពេលដែល​ចេញ​អាជ្ញា​បណ្ណ​ហើយ ក៏​ត្រូវ​ឲ្យ​អាជីវករ​ហ្នឹង​ បោះគោល​កំណត់​ដែន​ច្បាស់លាស់​មិន​ឲ្យ​ជីក​លើស​ក្រៅ​ដែន​អាជ្ញា​បណ្ណ​នោះទេ» ៕

អត្ថបទគួរចាប់អារម្មណ៍