.jpg)
ជនសង្ស័យ និងវត្ថុតាង ក្រោយពេលសមត្ថកិច្ចឃាត់ខ្លួន។ រូបថត កងរាជអាវុធហត្ថខេត្តក្រចេះ
ក្រចេះ: សមត្ថកិច្ចអាវុធហត្ថខេត្តក្រចេះគ្រោងបញ្ជូនបុរសម្នាក់ទៅសាលាដំបូងខេត្តនៅថ្ងៃទី ១៨ មិថុនានេះ ក្រោយពីចាប់ខ្លួនករណីប្រើប្រាស់ និងច្នៃអាវុធខុសច្បាប់ ៤ ដើម នៅភូមិថ្នល់ ឃុំស្វាយជ្រះ ស្រុកស្នួល ខេត្តក្រចេះ ។
លោក ម៉ៅ រ៉ានី មេបញ្ជាការរងកងរាជអាវុធហត្ថខេត្តក្រចេះឱ្យដឹងពីម្សិលមិញថា ជនសង្ស័យឈ្មោះ ហ៊ន បូរិន អាយុ ៤០ ឆ្នាំ ជាកសិករ រស់នៅភូមិ-ឃុំ កើតហេតុ។ គាត់ត្រូវបានសមត្ថកិច្ចអាវុធហត្ថឃាត់ខ្លួនពាក់ព័ន្ធបទល្មើសកែច្នៃកាំភ្លើងខ្យល់ខុសច្បាប់។
លោកថា៖ «រឿងនេះកម្លាំងសមត្ថកិច្ចយើងកំពុងធ្វើការតាមនីតិវិធីច្បាប់ក្រោមការសម្របសម្រួលរបស់ព្រះរាជអាជ្ញា ខេត្តក្រចេះ។ ពេលយើងអនុវត្តនីតិវិធីចប់នឹងបញ្ជូនជនសង្ស័យទៅតុលាការនៅថ្ងៃស្អែកហើយ»។
លោកបានឱ្យដឹងថា ឃាត់ខ្លួនគឺសមត្ថកិច្ចបានទទួលព័ត៌មានពីពលរដ្ឋក្នុងភូមិថ្នល់ ថាមានករណីបុរសម្នាក់កែច្នៃកាំភ្លើង។ បន្ទាប់ពីបានទទួលព័ត៌មាននេះកម្លាំងស្នាក់ការសន្តិសុខលេខ ៧០៧ ដឹកនាំដោយលោកវរសេនីយ៍ត្រី ឃុន សុយាន ជាមេបញ្ជាការស្នាក់ការ សហការជាមួយអាវុធហត្ថស្រុកស្នួល និងមានការសម្របសម្រួលពីព្រះរាជអាជ្ញាខេត្តក្រចេះបានចុះដល់ភូមិជនសង្ស័យរស់នៅតែម្តង។
បើតាមលោក ម៉ៅ រ៉ានី ការឆែកឆេរផ្ទះគាត់រឹបអូសបានកាំភ្លើងច្នៃ ៤ ដើម គ្រាប់កាំភ្លើង AK47 ចំនួន ២ គ្រាប់ គ្រាប់វ៉ាន់ណាឡុងចំនួន ២ គ្រាប់ គ្រាប់ផាវផ្ទុះចំនួន ១ ថង់ និងសម្ភារសម្រាប់កែច្នៃអាវុធ ១ ចំនួនទៀត។ បន្ទាប់មក អាវុធហត្ថស្រុកស្នួលបានបញ្ជូនបន្តមកបញ្ជាការដ្ឋានអាវុធហត្ថខេត្តក្រចេះ ដើម្បីចាត់ការតាមនីតិវិធីច្បាប់។
ដោយឡែក លោក ទីវ វុធធេន អនុប្រធានលេខាធិការដ្ឋានសាលាដំបូងខេត្តក្រចេះ និងជាអ្នកនាំពាក្យបានឱ្យដឹងដែរថា សំណុំរឿងជនសង្ស័យ កំពុងស្ថិតក្នុងដៃព្រះរាជអាជ្ញាហើយ។
លោកថ្លែងថា៖ «យើងកំពុងចាត់ចែងតាមនីតិវិធីនឹងបន្តធ្វើកិច្ចការនេះហើយ»៕
