កំពង់ស្ពឺៈ ​មន្ត្រី​បរិស្ថាន​ខេត្តកំពង់ស្ពឺ​កំពុង​ស្រាវជ្រាវ​រក​អ្នក​នៅ​ពី​ក្រោយខ្នង​ការញុះញង់​ឱ្យ​ពលរដ្ឋ​ចូលទៅ​កាប់​រានទន្ទ្រាន​ដីព្រៃ​របស់​រដ្ឋ​នៅ​តំបន់​ក្បាលអូរខ្សៀ ឃុំ​ត្រពាំងជោរ ស្រុក​ឱរ៉ាល់ ដើម្បី​យកមក​ដោះស្រាយ​តាមផ្លូវ​ច្បាប់​។ ​ប៉ុន្តែ​​ពលរដ្ឋ​នៅ​ទីនោះ​បាន​អះអាងថា ពួកគាត់​​បាន​អាស្រ័យផល​ជិត​ ១០ ​ឆ្នាំ​ហើយ​។

លោក ឱម ម៉ាក់ធារី ប្រធាន​មន្ទីរបរិស្ថាន​ខេត្តកំពង់ស្ពឺ​បាន​ថ្លែង​ពី​ថ្ងៃ​ទី​ ១៦ មិថុនា​ថា ពលរដ្ឋ​បាននាំគ្នា​ចូលទៅ​​កាប់​រានទន្ទ្រាន​ដី​សម្បទាន​ដែល​រដ្ឋ​ប្រគល់​ឱ្យទៅ​ក្រុមហ៊ុន HLH Agriculture ដោយមាន​អ្នក​នៅ​ពីក្រោយ​ខ្នង​ចាំ​ជួយឧបត្ថម្ភ​ក្នុង​ដំណើរការ​កាប់​រាន​ដីព្រៃ​ទីនោះ​ ទោះបី​អាជ្ញាធរ​ជូនដំណឹង​ជាច្រើន​ដង​នៅតែ​មិន​ព្រម​រុះរើ​ចេញ​។ ​

មិន​តែប៉ុណ្ណោះ​ពួកគេ​ថែមទាំង​បាន​នាំគ្នា​​ស្រែក​បង្ហោះ​ផ្សព្វផ្សាយ​តាម​បណ្តាញ​​សង្គម​ថា មាន​គេ​ធ្វើបាប​ពួកគាត់​ថែម​ទៀតផង ប៉ុន្តែ​តាមពិត​ពួកគាត់​ទៅ​កាប់​ព្រៃ​សម្រាប់តែ​លក់​ឱ្យ​ឈ្មួញ​នៅ​ពី​​ក្រោយ​តែប៉ុណ្ណោះ​។

លោក​ថ្លែងថា​៖ «​អ្នក​នៅ​ពី​ក្រោយខ្នង​ហ្នឹង​បាន​ញុះញង់​ឱ្យ​ប្រជាពលរដ្ឋ​ទៅ​កាប់​ព្រៃ​យក​ដី​លក់​ឱ្យ​គាត់ ដល់​ពេល​កាប់​អត់​បាន លក់​អត់​បាន ពលរដ្ឋ​ក៏​នាំគ្នា​ធ្វើបាតុកម្ម​ដេញ​កាប់​ពួកយើង​កុំ​ឱ្យ​ឆាឆៅ​គាត់ ងាយស្រួល​ពួកគាត់​កាប់​បាន ហើយ​យក​ទៅ​លក់​ឱ្យ​អ្នក​នៅ​ពី​ក្រោយខ្នង​នោះ​។ អ៊ីចឹង​ឥឡូវ​យើង​កំពុង​ស្រាវជ្រាវ​រក​អ្នក​នៅ​ពីក្រោយ​ខ្នង ដែល​ផ្តល់​លុយ ផ្តល់​គ្រឿង​ឧបភោគបរិភោគ អី​ផ្សេងៗ​ក្នុង​ដំណើរការ​កាប់​ព្រៃ​ហ្នឹង​»​។

លោក ឱម ម៉ាក់ធារី បាន​ឱ្យដឹង​ទៀតថា កាលពី​ថ្ងៃទី​ ១១ ខែ​មិថុនា មន្ត្រី​បរិស្ថាន​បាន​ចុះ​អនុវត្ត​ច្បាប់ និង​សម្របសម្រួល បន្ទាប់ពី​តំណាង​ក្រុមហ៊ុន HLH បាន​ប្តឹង​ឱ្យជួយ​អន្តរាគមន៍​រឿង​ពលរដ្ឋ​រំលោភ​លើ​ក្រុមហ៊ុន ហើយ​បង្ក​វិវាទ​ពេល​សន្តិសុខ​ក្រុមហ៊ុន​ចុះទៅ​រុះរើ​ខ្ទម​ចេញ​។

លោក​ថ្លែងថា​៖ «​ពលរដ្ឋ​នាំគ្នា​ទៅ​រំលោភ​យក​ដីព្រៃ​ហើយ​ទៅ​ស្រែកថា គេ​ធ្វើបាប​គាត់ ប៉ុន្តែ​គេ​សុទ្ធតែ​ជូនដំណឹង​មុន​ ១ ​ខែ​ឯណោះ ឱ្យ​គាត់​រើរុះ តែ​គាត់​មិន​ព្រម​រើរុះ​ទេ គិតតែ​ពី​ប្រមូលគ្នា​ហើយ​ផ្សាយ​បង្ហោះ​ផ្តេសផ្តាស​។ ​ការពិត​មាន​ក្រុម​ការងារ​គេ​ចុះមក​ស្រាវជ្រាវ​តើ​មាន​តាំងពី​ក្រសួង តាំងពី​អី​គេ​មក​មើលឃើញ​ជាក់ស្តែង​វា​អ៊ីចឹង​មែន​»​។

បើតាម​លោក ម៉ាក់ធារី ពលរដ្ឋ​បាន​​ប្រមូលផ្តុំ​គ្នា​មករា​រាំង​មិន​ឱ្យ​កម្លាំង​បរិស្ថាន​ចុះ​អនុវត្ត​ច្បាប់ ដោយ​មាន​ទាំង​យក​ពូថៅ និង​កាំបិត​ដេញ​កាប់​មន្ត្រី​បរិស្ថាន​ទៀតផង​។ យ៉ាងណា​លោក​បាន​បញ្ជា​ឱ្យ​មន្ត្រី​ជំនាញ​ដកថយ​វិញ ដើម្បី​កុំឱ្យ​មាន​បញ្ហា​ជាមួយ​ពលរដ្ឋ​។

លោក​ថ្លែងថា​៖ «​យើង​សុខចិត្ត​ឱ្យ​ដក​កម្លាំង​ចេញ​សិន​ទៅ ហើយ​ចាំ​យើង​ធ្វើការ​តាម​នីតិវិធី​ពេល​ក្រោយ​ទៀត​។ កន្លែង​ណា​ខុសច្បាប់​ខ្ញុំ​ឱ្យ​មន្ត្រី​ចុះ​សិក្សា​មើលថា​តើ​ដី​ណា​ដែល​មាន​បទបញ្ជា​ ០១ ​របស់​រាជរដ្ឋាភិបាល​ឱ្យ​កាត់ចេញ​យើង​កាត់ចេញ​ឱ្យ​គាត់​ទៅ ហើយ​ដី​ណា​មិន​​ទាន់​មាន​បទបញ្ជា​ហ្នឹង​ ប៉ុន្តែ​មាន​ដំណាំ​​យើង​សិក្សា​មើល​ហើយ​សុំ​ទៅ​ថ្នាក់លើ​កាត់​ឆ្វៀល​ឱ្យ​គាត់​។ មួយទៀត​រឿង​កាប់រាន​ដីព្រៃ​ថ្មីៗ ហើយ​គាត់​ស្រែកថា​ដី​អាស្រ័យផល​ដែរ​...» ។

អ្នកស្រី​ ឈឿន សុខា អាយុ​ ៣៨ ​ឆ្នាំ​ ជា​ពលរដ្ឋ​ម្នាក់​បាន​អះអាង​ថា អ្នកស្រី​បាន​​ទៅ​រស់នៅ​អាស្រ័យផល​នៅ​ទីនោះ​តាំងពី​ឆ្នាំ​ ២០១៣ ​មក​ម្ល៉េះ ប៉ុន្តែ​ត្រូវបាន​មន្ត្រី​បរិស្ថាន​ចុះទៅ​ហាមឃាត់​ និង​ដក​ដំណាំ​ជា​បន្តបន្ទាប់​។ ​កន្លងមក​មិនដែល​មាន​​ការចុះទៅ​រុះរើ​ និង​ដុតចោល​បែបនេះ​ទេ គ្រាន់តែ​ជជែក ឈ្លោះ​គ្នា និង​ចរចា​ហើយ​ក៏​បាន​ត្រឡប់​ទៅវិញ​។

បើតាម​អ្នកស្រី ពលរដ្ឋ​មិនបាន​បង្ក​​រឿង​ទាញ​កាំបិត​ពូថៅ​បង្ក​ហិង្សា​នោះទេ ប៉ុន្តែ​ ដោយសារ​តែ​ខាង​សន្តិសុខ​ក្រុមហ៊ុន​បាន​រុះរើ​ផ្ទះ រោង និង​ខ្ទម​របស់​ពលរដ្ឋ​ដោយ​មិន​បាន​បញ្ជាក់ប្រាប់​ពី​ដំណោះស្រាយ​ និង​សំណង​ទើប​ពលរដ្ឋ​ឡើងមក​តវ៉ា​។ នៅ​ទីនោះ​មាន​ពលរដ្ឋ​ជាង​ ១០០ ​គ្រួសារ​រស់នៅ ហើយ​ផ្ទះ​ និង​ខ្ទម​ទាំងអស់​ ២៧ ​ដែល​ត្រូវបាន​បំផ្លាញ​ក្នុង​នោះ​ដុត​ផ្ទះ​អស់​ ១០ ​ខ្នង និង​រុះរើ​ខ្ទម​អស់​ ១៧ ។

អ្នកស្រី​ថ្លែងថា​៖ «​ពេល​ចុះទៅ​គេ​អត់​មាននិយាយ​មានអី​ផង ស្រាប់តែ​ឃាំង​ពួកខ្ញុំ​មិន​ឱ្យ​ចូល ហើយ​ចាក់​សាំង​ដុត​ខ្ទម ដុត​ផ្ទះ​ពួកខ្ញុំ ហើយ​អ្នកខ្លះ​ដែល​ទើប​សង់​បាន​តិចតួច​មិនទាន់​មាន​ដំបូល​គេ​បាន​រុះរើ​ចោល​អស់​។ ​ចំណែក​ដំណាំ​ស្វាយចន្ទី​រាប់រយ​ដើម​របស់ខ្ញុំ​ក៏ត្រូវ​បាន​គេ​កាប់​កម្ទេចចោល​ដែរ​»​។

លោក រ័ត្ន ថាវី អ្នកសម្របសម្រួល​សមាគម​អាដហុក​ប្រចាំខេត្ត​កំពង់ស្ពឺ​បាន​ថ្លែងថា សកម្មភាព​ចុះទៅ​រុះរើ​ខ្ទម​របស់​ពលរដ្ឋ​នៅ​ទីនោះ​មាន​លក្ខណៈ​ជា​ការអនុវត្ត​ច្បាប់​មិនសូវ​បាន​ត្រឹមត្រូវ​។ លោក​ថា ករណីនេះ​គួរតែ​ជូនដំណឹង​ឱ្យ​ពលរដ្ឋ​បានដឹង មុននឹង​អនុវត្ត​​វិធានការ​ក្តៅ​បែបនេះ​។

លោក​ថ្លែងថា​៖ «​ដី​ហ្នឹង​វា​អាចជា​ដី​រដ្ឋ មិនមែន​ដី​ក្រុមហ៊ុន​ទេ ព្រោះ​ដី​ហ្នឹង​វា​នៅក្រៅ​បរិវេណ​របស់​ក្រុមហ៊ុន ចំណែក​ក្រុមហ៊ុន​គេ​មាន​ធ្វើ​ផ្លូវ​បាំង ព្រំប្រទល់​របស់គេ​ព័ទ្ធជុំវិញ​។ អ៊ីចឹង ដី​ហ្នឹង​អាច​​ជា​ដី​សាធារណៈ​របស់​រដ្ឋ​ដែល​អត់​ទាន់​ប្រគល់​ឱ្យទៅ​បុគ្គល​ណា​ម្នាក់​ទេ​»៕