ភ្នំពេញៈ ក្រសួងអប់រំ យុវជន និង កីឡានៅថ្ងៃទី ១៧ ខែមិថុនានេះ បានចេញសេចក្ដីណែនាំបន្ថែមស្ដីពីការរៀបចំ និងការប្រព្រឹត្តទៅនៃការប្រឡងសញ្ញាបត្រមធ្យមសិក្សាបឋមភូមិ (ថ្នាក់ទី ៩) និងសញ្ញាបត្រមធ្យមសិក្សាទុតិយភូមិ (បាក់ឌុប) នៅតាមគ្រឹះស្ថានសិក្សារដ្ឋ និង ឯកជន សម្រាប់ឆ្នាំសិក្សា ២០២០-២០២១។
យោងតាមសេចក្ដីណែនាំរបស់ក្រសួង អប់រំ បានឱ្យដឹងថា កន្លងមក ក្រសួងធ្លាប់បានចេញសេចក្ដីណែនាំស្តីពីការរៀបចំ និង ការប្រព្រឹត្តទៅនៃការប្រឡងសញ្ញាបត្រ មធ្យមសិក្សាបឋមភូមិ និងទុតិយភូមិ នៅតាមគ្រឹះស្ថានសិក្សារដ្ឋ និងឯកជនរួចហើយ។ ក្នុងនោះក្រសួងក៏បានអនុញ្ញាតឱ្យគ្រឹះស្ថានសិក្សាឯកជនរៀបចំការប្រឡងសញ្ញាបត្រមធ្យមសិក្សា បឋមភូមិ និង ទុតិយភូមិ នៅតាមគ្រឹះស្ថានសិក្សារៀងៗខ្លួនផងដែរ។
ក្រសួងបញ្ជាក់ថា ដើម្បីឱ្យការរៀបចំ និង ការប្រព្រឹត្តទៅនៃការប្រឡងនៅតាមគ្រឹះស្ថានសិក្សារដ្ឋ និងឯកជនសម្រាប់ឆ្នាំសិក្សា ២០២០-២០២១ ប្រព្រឹត្តទៅដោយរលូន និងធានាបាននូវស្តង់ដាគុណភាពនៃការប្រឡង ក្រសួងចេញសេចក្ដីណែនាំបន្ថែមស្ដីពីការប្រឡងនេះ។
យោងតាមសេចក្ដីណែនាំ ក្រសួងអប់រំ បានកំណត់កាលបរិច្ឆេទនៃការប្រឡងថ្នាក់ជាតិចំពោះសាលារដ្ឋសម្រាប់ ការប្រឡង សញ្ញាបត្រ បឋមភូមិ បានកំណត់យកថ្ងៃទី ១៥ ខែវិច្ឆិកា ឆ្នាំ ២០២១។ ចំណែកការប្រឡងសញ្ញាបត្រ ទុតិយភូមិ កំណត់យកថ្ងៃទី ៦ ខែធ្នូ ឆ្នាំ ២០២១។ រីឯ គ្រឹះស្ថានសិក្សាឯកជន ក្រសួងអប់រំ បានអនុញ្ញាតឱ្យរៀបចំការប្រឡងនៅតាមគ្រឹះស្ថានសិក្សារៀងៗខ្លួន តាមកាលបរិច្ឆេទដែលក្រសួងបានកំណត់ ក្នុងនោះរួមមានសម្រាប់ការប្រឡង ឌីប្លូម ត្រូវកំណត់យកថ្ងៃទី ១១ ខែ តុលា ឆ្នាំ ២០២១។ ចំណែកការប្រឡងបាក់ឌុប គឺកំណត់យកថ្ងៃទី ២៥ ខែតុលា ឆ្នាំ ២០២១។
ចំពោះការដាក់ពាក្យស្នើសុំរៀបចំការប្រឡងរបស់គ្រឹះស្ថានសិក្សាឯកជនក្រសួងអប់រំ បានណែនាំឱ្យដាក់ពាក្យស្នើសុំរៀបចំការប្រឡង សញ្ញាបត្រមធ្យមសិក្សាបឋមភូមិ និង ទុតិយភូមិ ដោយភ្ជាប់បញ្ជីរាយនាមបេក្ខជន ដែលត្រូវប្រឡងមកក្រសួងតាមរយៈមន្ទីរអប់រំ រាជធានី-ខេត្ត ឱ្យបានមុនដំណាច់ ខែសីហា ឆ្នាំ ២០២១ ជាកំហិតដើម្បីពិនិត្យនិងទទួលស្គាល់។
ក្រសួងបញ្ជាក់ថា៖ «ក្នុងករណី គ្រឹះស្ថានសិក្សាឯកជនណា ដែលមិនមានលទ្ធភាពរៀបចំការប្រឡងដោយខ្លួនឯង ត្រូវរង់ចាំចូលរួមប្រឡងជាមួយសិស្សនៃគ្រឹះស្ថានសិក្សាសាធារណៈនៅពេលក្រោយ តាមការជូនដំណឹងរបស់ក្រសួង»៕
វីដេអូ៖