បន្ទាយមានជ័យៈ ស្រាថ្នាំ ឈ្មោះ តាំងគួយ ប្រមាណ ២៧ ៧៥៦ ដប ដែលមានសារធាតុគីមីមេតាណុល ត្រូវបានមន្រ្ដីសាខា អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និង បង្រ្កាបការក្លែងបន្លំ «ក.ប.ប» ខេត្ត បន្ទាយមានជ័យ ធ្វើការបំផ្លាញចោល កាលពីថ្ងៃទី១៧ ខែមិថុនា ក្នុងសង្កាត់ ប៉ោយប៉ែត ក្រុងប៉ោយប៉ែត ក្រោយពីអ្នកផឹកស្រានេះ ៧ នាក់បានពុលស្លាប់។
អគ្គនាយកដ្ឋាន ក.ប.ប. នៅថ្ងៃទី ១៧ ខែមិថុនា ឆ្នាំ ២០២១ មន្ត្រីសាខា ក.ប.ប ខេត្តបន្ទាយមានជ័យ បានធ្វើការបំផ្លាញស្រាថ្នាំ តាំងគួយ ចំនួន ២ ៣១៣ យួរស្មើ ២៧ ៧៥៦ដប ស្ថិតក្នុងសង្កាត់ប៉ោយប៉ែត ក្រុងប៉ោយប៉ែត ក្រោមអធិបតីភាព លោកស្រី រស់ សុផានី អភិបាលរងនៃគណៈអភិបាលខេត្តបន្ទាយមានជ័យ ព្រមទាំងមានការចូលរួមពីព្រះរាជអាជ្ញារងអមសាលាដំបូងខេត្ត មន្ត្រីមន្ទីរពាណិជ្ជកម្មខេត្ត និងមន្ត្រីសាខា ក.ប.ប ខេត្ត បន្ទាយមានជ័យ។
អគ្គនាយកដ្ឋាន ក.ប.ប បានឱ្យដឹងថា ស្រាថ្នាំ តាំង គួយ បានបណ្តាលឱ្យមនុស្សពុលស្លាប់ចំនួន ៧ នាក់ ក្នុងនោះមានជនជាតិថៃ ចំនួន ១នាក់។
ក្នុងស្រាថ្នាំនេះមានសារធាតុ មេតាណុល កម្រិតខ្ពស់ដល់ ១៤ ភាគរយ បើតាមរបាយការណ៍របស់មន្ទីរសុខាភិបាលខេត្ដ។
អគ្គនាយកដ្ឋាន ក.ប.ប បញ្ជាក់ថា ផលិតផលស្រាថ្នាំ តាំង គួយ នេះ គឺបានចរាចរលើទីផ្សារ ល្មើសនឹងច្បាប់ស្តីពីការគ្រប់គ្រងគុណភាពសុវត្ថិភាព លើផលិតផលទំនិញនិងសេវា ត្រង់មាត្រា ១៨ ជំពូកទី ៤។
មាត្រា១៨ ជំពូកទី៤ នៃច្បាប់នេះ បានចែងថា ត្រូវហាមឃាត់ការធ្វើពាណិជ្ជកម្ម នូវផលិតផលម្ហូបអាហារ ដែលមានសភាពប្រែប្រួលខូចគុណភាពឬមានជាតិពុល ឬផលិតផលនោះមិនស្របនឹងលក្ខណៈវិនិច្ឆ័យគុណភាព ផ្នែកអតិសុខុម ជីវសាស្រ្ត ឬ អនាម័យ ដែលកំណត់តាមបទប្បញ្ញត្តិនៃក្រសួងពាក់ព័ន្ធ។
បទល្មើសចរាចរស្រាមានសារធាតុគីមី មេតាណុល ល្មើសនឹងច្បាប់បែបនេះ ក៏ត្រូវផ្ដន្ទាទោស តាមមាត្រា ៦៣ នៃច្បាប់ស្តីពីការគ្រប់គ្រងគុណភាពសុវត្ថិភាពលើផលិតផលទំនិញនិងសេវានេះដែរ ដែលបានចែងថា ជនណាដែលប្រព្រឹត្តល្មើសនឹងមាត្រា ១៦ ១៧ ១៨ និង ២១ នៃច្បាប់នេះត្រូវផ្តន្ទាទោសដាក់ពន្ធនាគារពី ១ខែ ដល់ ១ឆ្នាំ និងពិន័យជាប្រាក់ពី ៥ លានរៀល ដល់ ១០ លានរៀល ឬទោសណាមួយនៃទោសទាំងនេះ៕
វីដេអូ៖