ភ្នំពេញៈ ក្រសួងទេសចរណ៍នៅថ្ងៃទី ១៧ ខែមិថុនា បានប្រកាសបញ្ឈប់ការចេញអាជ្ញាបណ្ណទេសចរណ៍ដល់អាជីវកម្មដឹកជញ្ជូនទេសចរណ៍តាមផ្លូវគោក និងផ្លូវទឹកចាប់ពីថ្ងៃទី ១ ខែកក្កដាឆ្នាំ ២០២១ តទៅ។ នេះបើតាមសេចក្ដីជូនដំណឹង។
សេចក្តីជូនដំណឹងស្តីពីការបញ្ឈប់ការចេញអាជ្ញាបណ្ណទេសចរណ៍ ដល់អាជីវកម្មដឹកជញ្ជូនទេសចរណ៍តាមផ្លូវគោក និងផ្លូវទឹករបស់ក្រសួងទេសចរណ៍ គឺយោងតាមសេចក្តីជូនដំណឹងរបស់រាជរដ្ឋាភិបាលលេខ ៣៦ ចុះថ្ងៃទី ២១ ខែមករាឆ្នាំ ២០២១។
ក្រសួងទេសចរណ៍បានជូនដំណឹងដល់សមាគមដឹកជញ្ជូនទេសចរណ៍ និងលោក-លោកស្រីជាម្ចាស់អាជីវកម្មដឹកជញ្ជូនទេសចរណ៍តាមផ្លូវគោក និងផ្លូវទឹកទាំងអស់មេត្តាជ្រាប៖ «ក្រសួងទេសចរណ៍នឹងបញ្ឈប់ការចេញអាជ្ញាបណ្ណទេសចរណ៍ដល់អាជីវកម្មដឹកជញ្ជូនទេសចរណ៍តាមផ្លូវគោក និងផ្លូវទឹកចាប់ពីថ្ងៃទី ១ ខែកក្កដាឆ្នាំ ២០២១ តទៅ។ អាជ្ញាបណ្ណទេសចរណ៍សម្រាប់អាជីវកម្មដឹកជញ្ជូន ទេសចរណ៍ តាមផ្លូវគោក និងផ្លូវទឹក ចេញដោយក្រសួងទេសចរណ៍កន្លងមកដែលនៅមានសុពលភាពអាចបន្តអនុវត្តរហូតដល់អស់សុពលភាព»។
ក្រសួងបញ្ជាក់ថា ចំពោះលោក-លោកស្រីជាម្ចាស់អាជីវកម្មដឹកជញ្ជួនទេសចរណ៍តាមផ្លូវគោក និងផ្លូវទឹក ដែលមានលិខិតអនុញ្ញាតឱ្យធ្វើអាជីវកម្មដឹកជញ្ជូនអ្នកដំណើរផ្ដល់ដោយក្រសួងសាធារណការ និងដឹកជញ្ជូនមានលក្ខណសម្បត្តិគ្រប់គ្រាន់សម្រាប់ប្រកបអាជីវកម្មដឹកជញ្ជូនទេសចរណ៍ដោយពុំបាច់តម្រូវឱ្យស្នើសុំអាជ្ញាបណ្ណទេសចរណ៍ពីក្រសួងទេសចរណ៍ថែមទៀតទេ។
ដោយឡែកម្ចាស់អាជីវកម្មដឹកជញ្ជូនទេសចរណ៍តាមផ្លូវគោក និងផ្លូវទឹក នៅតែអាចស្នើសុំចូលរួមវគ្គបណ្តុះបណ្តាល ពង្រឹងគុណភាពសេវាកម្ម ឬដាក់ពាក្យចូលរួមការប្រឡងប្រណាំងផ្សេងៗ កម្រិតថ្នាក់ជាតិ ឬថ្នាក់តំបន់ តាមរយៈក្រសួងទេសចរណ៍បាន។ នេះបើតាមការបញ្ជាក់របស់ក្រសួងទេសចរណ៍។
ក្រសួងបានណែនាំចំពោះព័ត៌មានបន្ថែមទាក់ទងនឹងរឿងនេះ ឱ្យទំនាក់ទំនងទៅកាន់លេខទូរស័ព្ទ ០៩២ ៧៧៩ ៨៣៣/០១២ ២៩៨ ៩៥៤/០១៥ ៧៧៧ ៨០៨៕
វីដេអូ៖