បាត់ដំបងៈ មន្ត្រី​អន្តរក្រសួង​បាន​ចុះទៅ​បង្ហាញ​ពី​ផលប៉ះពាល់ កំហុសឆ្គង និង​កង្វះខាត​របស់​ក្រុមហ៊ុន ហ្វីនិក អ៊ិនដាស្ទ្រៀល (Phoenix Industrial) នៅ​ស្រុក​រតនមណ្ឌល ខេត្ត​បាត់ដំបង ឲ្យ​ក្រុមហ៊ុន​ទទួលស្គាល់ ដើម្បី​ឲ្យ​កែលម្អ មុន​ឈានទៅ​ពិន័យ​ និង​ចាត់ការ​តាមផ្លូវ​ច្បាប់​។

ប្រធាន​មន្ទីរ​បរិស្ថាន​ខេត្ត​បាត់ដំបង លោក កត បូរ៉ាន ប្រាប់​ភ្នំពេញ​ប៉ុស្តិ៍​នៅ​ព្រឹក​នេះ​ថា កាលពី​ម្សិលមិញ តំណាង​អន្តរក្រសួង​ និង​មន្ទីរ​ពាក់ព័ន្ធ​មាន​បរិស្ថាន កសិកម្ម ធនធានទឹក សង្គមកិច្ច​និង អតីតយុទ្ធជន និង ឧស្សាហកម្ម​វិទ្យាសាស្ត្រ និង​នវានុវត្តន៍​បាន​ចុះ​វាយតម្លៃ​ផលប៉ះពាល់ និង ចង្អុលបង្ហាញ​នូវ​កំហុសឆ្គង និង កង្វះខាត​របស់​ក្រុមហ៊ុន​អឺកាងខេមបូឌៀគ្រុប មាន​ទីតាំង​នៅ​ស្រុក​រតនមណ្ឌល ខេត្ត​បាត់ដំបង ដែល​បាន​ធ្លាយ​សារធាតុ​កខ្វក់​ចូល​ស្ទឹងសង្កែ​នាពេល​កន្លងមក​។

លោក​ថ្លែងថា​៖ «​ដើម្បី​យើង​ឈាន​ទៅ​ដល់​ការពិន័យ​យើង​ត្រូវ​ប្រឹក្សា​គ្នា​អំពី​កំហុស​ក្រុមហ៊ុន ដើម្បី​ឲ្យ​ខាង​ក្រុមហ៊ុន​លោក​ទទួលស្គាល់​នូវ​អ្វីដែល​ខ្លួន​មាន​ការធ្វេសប្រហែស និង​កំហុសឆ្គង ដែល​ធ្វើឲ្យ​មាន​លេចធ្លាយ​កាកសំណល់ ធ្វើ​ខុស​បច្ចេកទេស​អី​ផ្សេងៗ​ហ្នឹង​»​។

លោក​ប្រធាន​មន្ទីរ​បញ្ជាក់ថា ចំពោះ​ការពិន័យ​កម្រិតណា​នោះ​នៅ​មិនទាន់​ដឹង​នៅឡើយ ព្រោះ​នៅ​មាន​ការប្រជុំ​ ដើម្បី​កំណត់​ទំហំ​នៃ​ការខុសឆ្គង​របស់​ក្រុមហ៊ុន​ថែមទៀត​។ លោក​ថ្លែងថា​៖ «​បើ​យើង​ពិន័យ​គេ​ទាល់តែ​គេ​ហ្នឹង​ទទួល​កំហុស​ដែរ ក្រុមហ៊ុន​គេ​មាន​មេធាវី​មានអី​គ្រប់យ៉ាង​ទាំងអស់ ទាល់តែ​គេ​ទទួល​ស្គាល់ថា​គេ​ខុស​ទើប​យើង​ស្រួល​តាមផ្លូវ​ច្បាប់ ប៉ុន្តែ​ក៏មាន​ពេលខ្លះ យើង​ចាប់បង្ខំ​អំពី​ការខុសឆ្គង​របស់​គេ​ដែរ ក្នុង​លក្ខណៈ​ធ្ងន់ធ្ងរ ឬ​រកឃើញ​កំហុស​អ្វី​បន្ថែមទៀត​»​។

បើតាម​លោក​ប្រធាន​មន្ទីរ ក្រុមហ៊ុន ហ្វីនិក អ៊ិនដាស្ទ្រៀល​កំពុង​ធ្វើការ​ពិចារណា​ ដើម្បី​ឆ្លើយតប​មក​ខាង​មន្ត្រី​ជំនាញ​វិញ ខណៈ​ខាង​មន្ត្រី​ជំនាញ​កំពុង​ធ្វើ​កំណត់ហេតុ​រួមមួយ​ ដើម្បី​ឲ្យ​ក្រុមហ៊ុន​ទទួលយក​ផងដែរ​។ យ៉ាងណា​ក្រុមហ៊ុន​បាន​ទទួលយក​កំហុស​របស់ខ្លួន​មួយចំនួន​ហើយ​ក្នុង​កិច្ចប្រជុំ​នៅ​ស្នាក់ការ​ក្រុមហ៊ុន​នៅ​ថ្ងៃទី ១៧ ខែ​មិថុនា​នេះ​។

សូមបញ្ជាក់ថា ក្រុមហ៊ុន​ ហ្វីនិក អ៊ិនដាស្ទ្រៀល (Phoenix Industrial) មាន​ទីតាំង​នៅ​ស្រុក​រតនមណ្ឌល ដែល​ផលិត​សារធាតុ​រក្សា​ពណ៌ និង​ផលិតផល​ផ្សេងៗ​បាន​ធ្លាយ​សារធាតុពុល ចូលក្នុង​ទឹកស្ទឹង​សង្កែ​ប៉ែក​ខាងលើ​បណ្តាល​ឲ្យ​ត្រីងាប់​កាលពី​ថ្ងៃទី​ ២៦ ខែឧសភា ឆ្នាំ​ ២០២១​។

តាម​ការពិសោធន៍​របស់​ក្រសួងបរិស្ថាន​បង្ហាញ​ថា ជាតិពុល​ដែល​បណ្តាល​ឲ្យ​ត្រីងាប់​ក្នុង​ស្ទឹងសង្កែ ប៉ែក​ខាងលើ​នោះ គឺ​ដោយសារ​មាន​សារធាតុ​អាស៊ីត ហើយ​ភ្លាមៗ​អាជ្ញាធរ​ និង​ស្ថាប័ន​ពាក់ព័ន្ធ​បាន​ចុះ​ឲ្យ​ក្រុមហ៊ុន​បិទខ្ទប់​កន្លែង​លេច​ធ្លាយ​ និង​ធ្វើការ​បន្សាប​ជាតិ​អាស៊ីត​ក្នុង​ទឹកស្ទឹង​សង្កែ​។ នៅ​ថ្ងៃទី​ ៣០ ខែ​ឧសភា មន្ត្រី​ជំនាញ​នៃ​ក្រសួងបរិស្ថាន និង​អាជ្ញាធរខេត្ត​បាន​ទប់ស្កាត់​ និង​គ្រប់គ្រង​បាន​ទាំងស្រុង​នូវ​ផលប៉ះពាល់​នោះ ចំណែក​ទឹក​ស្ទឹងសង្កែ​បាន​ប្រែ​ក្លាយ​មក​ជា​ធម្មតា​វិញ​៕

វីដេអូ៖