ភ្នំពេញៈ លោក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិ បានថ្លែងនៅថ្ងៃទី១៨ ខែមិថុនានេះថា មានមូលហេតុ ៣ យ៉ាងដែលតម្រូវឱ្យសមត្ថកិច្ចចាប់ខ្លួន សកម្មជនចលនាមាតាធម្មជាតិ ៣ នាក់ ដោយសារតែពួកគេមានអង្គការចាត់តាំងខុសច្បាប់ និងប្រើប្រាស់ហិញ្ញប្បទានភេរវកម្ម។
លោក ឆាយ គឹមខឿន បានបញ្ជាក់បែបនេះ បន្ទាប់ពីសមត្ថកិច្ចបានចាប់ខ្លួនសកម្មជនចលនាមាតាធម្មជាតិ ៣ នាក់កាលពីថ្ងៃទី១៦ ខែមិថុនា ឆ្នាំ២០២១។
សកម្មជនទាំង ៣ នាក់នោះ រួមមាន ១ ឈ្មោះ ស៊ុន រដ្ឋា ភេទស្រី តួនាទីគណនី នៃបណ្ដាញមាតាធម្មជាតិ ទី២ ឈ្មោះ លី ចាន់ដារ៉ាវុត ភេទប្រុស តួនាទី អ្នកស្រាវជ្រាវ និង Media Team និងទី៣ ឈ្មោះ យឹម លាងហ៊ី ភេទប្រុស តួនាទីសម្របសម្រួលការងារសកម្មជន។
លោក ឆាយ គឹមខឿន បានបញ្ជាក់ថា៖«តាមឯកសារសំណុំរឿង និងភ័ស្តុតាងផ្សេងៗទៀត បង្ហាញថា ពួកក្រុមនេះធ្វើសកម្មភាព ដោយមានអង្គការចាត់តាំងច្បាស់លាស់ ដែលមានជនបរទេសជាអ្នកគូសវាសផែនទី ឱ្យធ្វើសកម្មភាព និងប្រតិកម្ម។ ការចាប់ខ្លួននេះ បានធ្វើឡើងបន្ទាប់ពីសមត្ថកិច្ចបានស្រាវជ្រាវ និងរកឃើញភ័ស្តុតាង ៣ ចំណុច»។
លោកអះអាងថា ភ័ស្ថុតាងទាំង ៣ចំណុចនោះរួមមាន ១ក្រុមនេះ ជាក្រុមដែលមានអង្គការចាត់តាំងខុសច្បាប់ និងមានការបញ្ជាពីក្រោយដោយជនបរទេសឈ្មោះ អាឡិចសង់ដ្រូ ហ្គន់ស្សាឡេស ឌីវិសុន ( Alejandro Gonzalez Davidson) ជាជនជាតិអេស្ប៉ាញ។
លោកបន្តថា ទី២ គ្រប់សកម្មភាពរបស់ពួកគេ គឺយកឈ្មោះ និងជ្រកក្រោមស្លាកបរិស្ថាន ប៉ុន្តែដើម្បីបន្លំធ្វើសកម្មភាពប្រមូលយកព័ត៌មាន បញ្ហាផ្សេងៗពាក់ព័ន្ធនឹងបរិស្ថាននេះ ធ្វើជាលេសឈ្នាន់ ឬមូលហេតុញុះញង់ដល់ប្រជាពលរដ្ឋ សាធារណជន ក្នុងគោលដៅប្រឆាំង និងផ្តួលរំលំរាជរដ្ឋាភិបាល និងទី៣ ក្រុមនេះធ្វើសកម្មភាពបានដោយសារតែ ការផ្តល់ហិរញ្ញប្បទានពីខាងក្រៅ ដែលពាក់ព័ន្ធនឹងហិរញ្ញប្បទានភេរវកម្ម ផ្គត់ផ្គង់ដោយមេរបស់ពួកគេដោយជនបរទេស។
លោក ឆាយ គឹមខឿន បញ្ជាក់ថា៖ «ការធ្វើសកម្មភាពរបស់ក្រុមនេះកន្លងមក គឺសុទ្ធតែមានផែនការ និងការចង្អុលបង្ហាញរបស់មេពួកគេដែលជាជនបរទេសនៅខាងក្រៅប្រទេស»។
អង្គការមាតាធម្មជាតិ ដែលទីស្នាក់ការកណ្តាលតាំងនៅវត្តចំការឈូក ភូមិពោធិ៍មាស ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ដែលបង្កើតឡើង និងដឹកនាំដោយ លោក Alejandro Gonzalez Davidson ត្រូវបានក្រសួងមហាផ្ទៃ ចេញសេចក្តីប្រកាស សម្រេចលុបចោល កាលពីថ្ងៃទី១៥ ខែកញ្ញា ឆ្នាំ ២០១៧ បន្ទាប់ពីបានបណ្តេញ លោកអាឡិច ចេញពីប្រទេសកម្ពុជា។
លោក អាឡិចសង់ដ្រូ ប្រធានអង្គការមាតាធម្មជាតិ ត្រូវបានក្រសួងមហាផ្ទៃ បណ្តេញចេញកាលពីអំឡុងខែកុម្ភៈ ឆ្នាំ ២០១៥ បន្ទាប់ពីបានធ្វើសកម្មភាពពាក់ព័ន្ធនឹងធនធានធម្មជាតិ នៅតំបន់អារ៉ែង ក្នុងនោះក៏មានការប្រឆាំងនឹងការបូមខ្សាច់នៅក្នុងខេត្តកោះកុងផងដែរ ដែលសកម្មភាពរបស់ជនបរទេសរូបនេះ ត្រូវបានអាជ្ញាធរកម្ពុជាអះអាងថា ល្មើសនឹងច្បាប់នៅកម្ពុជា៕