.jpg)
សមត្ថកិច្ចនគរបាលខេត្តបន្ទាយមានជ័យបានបញ្ជូនជនសង្ស័យ ៨ នាក់ពាក់ព័ន្ធករណីជួញដូរគ្រឿងញៀនដែលរឹបអូសបានរហូតដល់ ៣៣ គីឡូក្រាមទៅតុលាការនៅរសៀលថ្ងៃទី ១៨ ខែមិថុនានេះ។
បន្ទាយមានជ័យៈ សមត្ថកិច្ចនគរបាលខេត្តបន្ទាយមានជ័យបានបញ្ជូនជនសង្ស័យ ៨ នាក់ពាក់ព័ន្ធករណីជួញដូរគ្រឿងញៀនដែលរឹបអូសបានរហូតដល់ ៣៣ គីឡូក្រាមទៅតុលាការនៅរសៀលថ្ងៃទី ១៨ ខែមិថុនានេះ បន្ទាប់ពីឃាត់ខ្លួនបានជាបន្តបន្ទាប់តាំងពីថ្ងៃទី ១៦ ខែមិថុនា។
លោក ធិន ស៊ិនដេត ស្នងការរងទទួលការងារប្រឆាំងគ្រឿងញៀន ខេត្តបន្ទាយមានជ័យថ្លែងថា បន្ទាប់ពីបានសាកសួរជនសង្ស័យរួចមក កម្លាំងជំនាញនៃស្នងការនគរបាលខេត្តបន្ទាយមានជ័យបានបញ្ជូនពួកគេទៅតុលាការអស់ហើយនៅរសៀលថ្ងៃទី ១៨ ខែមិថុនានេះ។
លោក ស៊ិនដេត បានឲ្យដឹងថា ជនសង្ស័យ ៨ នាក់ត្រូវបាននគរបាល ខេត្តបន្ទាយមានជ័យ និងនគរបាលខេត្តបាត់ដំបងសហការគ្នាឆ្មក់បង្ក្រាបឃាត់ខ្លួនបានជាបន្តបន្ទាប់ និង ដកហូតបានថ្នាំញៀនជាង ៣៣ គីឡូក្រាម ខណៈពួកគេកំពុងធ្វើសកម្មភាពជួញដូរគ្រឿងញៀនទ្រង់ទ្រាយធំ នៅក្រុងប៉ោយប៉ែត-ស្រុកម៉ាឡៃជាតំបន់ជាប់ព្រំដែនកម្ពុជាថៃ។
លោកថ្លែងថា៖ «ប្រតិបត្តិការនេះ មុនដំបូងសមត្ថកិច្ចយើងបានចុះបង្ក្រាបជនសង្ស័យបាន ៤ នាក់ និងដកហូតបានថ្នាំញៀន ៣៣ គីឡូក្រាមនៅក្នុងផ្ទះល្វែងមួយកន្លែង ផ្លូវទៅវត្តគោកស្បែង ស្ថិតក្នុងភូមិគីឡូម៉ែត្រលេខ ៤ សង្កាត់ផ្សារកណ្តាល ក្រុងប៉ោយប៉ែត»។
បើតាមលោក ស៊ិនដេត ក្រៅពីនេះសមត្ថកិច្ចដកហូតបានជញ្ជីងថ្លឹងថ្នាំញៀនចំនួន ២ គ្រឿង និងសម្ភារកែច្នៃសម្រាប់ប្រើប្រាស់គ្រឿងញៀនមួយចំនួន និងរថយន្ត ១ គ្រឿង ម៉ាកហាយលែនឌឺ ពណ៌ទឹកប្រាក់ ពាក់ស្លាកលេខ បន្ទាយមានជ័យ 2C-3186។
លោក សិទ្ធិ ឡោះ ស្នងការនគរបាលខេត្តបន្ទាយមានជ័យបានថ្លែងថា ជំហានដំបូងសមត្ថកិច្ចឃាត់ខ្លួនឈ្មោះ រ៉ុង យ៉ីហាក់ ភេទប្រុសអាយុ ៣៦ ឆ្នាំ និងឈ្មោះ រ៉ុង គីមហ៊ាង ភេទប្រុសអាយុ ៣៩ ឆ្នាំ។
ជនសង្ស័យទាំង ២ នាក់រស់នៅភូមិគីឡូម៉ែត្រលេខ ៤ សង្កាត់ ក្រុងប៉ោយប៉ែត។ រីឯ ២ នាក់ទៀតម្នាក់ ឈ្មោះ សុខ សេថា ភេទប្រុសអាយុ ២៣ ឆ្នាំ និងឈ្មោះ វ៉ាន់ ឈីដា ភេទស្រីអាយុ ២៨ ឆ្នាំ (ជនជាតិថៃ)។
លោកបន្តថា យោងចម្លើយសារភាពជនសង្ស័យទាំង ៤ នាក់បានឲ្យដឹងថា ថ្នាំញៀនទាំងនេះពួកគេទិញពីឈ្មោះ ឡេង គឹមឡាយ មានផ្ទះនៅស្រុកម៉ាឡៃ ហើយភ្លាមៗនោះលោកក៏បានដឹកនាំកម្លាំងចុះទៅឡោមព័ទ្ធផ្ទះជនសង្ស័យ ហើយក៏ឃាត់ខ្លួនបានមនុស្សប្រុសស្រី ៤ នាក់បន្ថែមទៀត។
ជនសង្ស័យ ៤ នាក់ទៀតនោះ ទី ១ ឈ្មោះ គួន ស្រីឡាន់ ភេទស្រីអាយុ ៣៣ ឆ្នាំ ទី ២ ឈ្មោះ សេង ស្រីនិ ភេទស្រីអាយុ ២៣ ឆ្នាំ ទី ៣ ឈ្មោះ ឡុង សំរិទ្ធ ភេទប្រុសអាយុ ៣០ ឆ្នាំ និងទី ៤ ឈ្មោះ ហែម វ៉ាន់លី ភេទប្រុសដោយដកហូតបានថ្នាំញៀនរួមជាមួយវត្ថុតាងមួយចំនួន។
ចំណែកជនសង្ស័យម្នាក់ទៀតឈ្មោះ ឡេង គឹមឡាយ បានរត់គេចខ្លួនបាត់។
លោកស្នងការបញ្ជាក់ថា ប្រតិបត្តិការបង្ក្រាបនេះមុនដំបូងនគរបាលខេត្តបន្ទាយមានជ័យ និងនគរបាលខេត្តបាត់ដំបង សហការណ៍គ្នាចុះស្រាវជ្រាវចាប់ជនសង្ស័យក្នុងករណីគ្រោះថ្នាក់ចរាចរណ៍បើករថយន្តបុកគេស្លាប់ នៅខេត្តបាត់ដំបង បន្ទាប់មកជនបង្កមកលាក់ខ្លួននៅប៉ោយប៉ែត បែរជាស៊ើបប៉ះចំក្រុមឧក្រិដ្ឋជនជួញដូរគ្រឿងញៀនទ្រង់ទ្រាយធំនេះ៕
