កោះកុងៈ មន្ទីរសុខាភិបាលនៃរដ្ឋបាលខេត្តកោះកុងនៅថ្ងៃទី ១៨ ខែមិថុនានេះ បានប្រកាសបើកយុទ្ធនាការចាក់វ៉ាក់សាំងកូវីដ ១៩ ជូនចំពោះប្រជាពលរដ្ឋទូទៅ (អាយុចាប់ពី ១៨ ឆ្នាំឡើងទៅ) នៅក្នុងក្រុងខេមរភូមិន្ទ និងស្រុកស្រែអំបិល ដោយចាប់ផ្ដើមអនុវត្ដចាប់ពីថ្ងៃទី ២០ ខែមិថុនា ឆ្នាំ ២០២១ តទៅ។
មន្ទីរសុខាភិបាលបានឱ្យដឹងថា ទីតាំងដែលនឹងត្រូវចាក់វ៉ាក់សាំងដល់ប្រជាពលរដ្ឋរួមមាន ទី១ សម្រាប់ពលរដ្ឋរស់នៅក្រុងខេមរភូមិន្ទមានទីតាំងចាក់វ៉ាក់សាំងចំនួន ២ កន្លែង គឺនៅទីតាំង សាខាកាកបាទក្រហមខេត្តកោះកុង ស្ថិតនៅភូមិ ១ សង្កាត់ស្មាច់មានជ័យ ក្រុងខេមរភូមិន្ទ។ ទីតាំងទី២ គឺស្ថិតនៅមជ្ឈមណ្ឌល ស៊ូន នឹងស្ថិតនៅផ្លូវឆ្មាបាត់ ភូមិស្ទឹងវែង សង្កាត់ស្ទឹងវែង ក្រុងខេមរភូមិន្ទ។
មន្ទីរសុខាភិបាលបានបញ្ជាក់ថា៖ «យោងតាមផែនការ យើងនឹងបើកចាក់ជូនប្រជាពលរដ្ឋឱ្យបានរួចរាល់ក្នុងរយៈពេល ៣ ថ្ងៃ។ ក្នុងករណីមានការប្រែប្រួល យើងនឹងជូនដំណឹងជាថ្មីនៅពេលក្រោយ»។
ចំណែកយុទ្ធនាការចាក់វ៉ាក់សាំងកូវីដ ១៩ ដល់ពលរដ្ឋនៅក្នុងស្រុកស្រែអំបិល មានទីតាំងចាក់វ៉ាក់សាំងចំនួន ៣ កន្លែង គឺ ១ សាលាបឋមសិក្សាស្រែអំបិល ស្ថិតនៅភូមិស្រែអំបិល ឃុំស្រែអំបិល ស្រុកស្រែអំបិល។ សាលាបឋមសិក្សាជីខលើ ស្ថិតនៅ ភូមិជីខ ឃុំជីខលើ ស្រុកស្រែអំបិល និង ទី៣ ស្ថិតនៅសាលាបឋមសិក្សាបឹងព្រា ស្ថិតនៅ ភូមិបឹងព្រាវ ឃុំបឹងព្រាវ ស្រុកស្រែអំបិល។
មន្ទីរសុខាភិបាលបានណែនាំដល់សាធារណជនទាំងអស់ដែលមិនទាន់បានចាក់វ៉ាក់សាំងកូវីដ ១៩ ក្នុងភូមិសាស្ដ្រខាងលើអញ្ជើញមកចាក់វ៉ាក់សាំងនៅទីតាំង និងកាលបរិច្ឆេទដែលបានកំនត់ដូចខាងលើកុំបីខាន ដោយភ្ជាប់មកជាមួយនូវអត្តសញ្ញាណប័ណ្ណ ឬលិខិតឆ្លងដែន ឬសំបុត្រកំណើត ឬសៀវភៅស្នាក់នៅ ឬឆាយា (សម្រាប់ព្រះសង្ឃ) ។
បើប្រជាពលរដ្ឋមានចម្ងល់ទាក់ទងនឹងការចាក់វ៉ាក់សាំងនេះ មន្ទីរសុខាភិបាល បានណែនាំឱ្យទាក់ទងព័ត៌មានបន្ថែមទៅកាន់លោកស្រី ឆេង ចិន្តា លេខទូរស័ព្ទ ០១៦ ៥៣៥ ៣៧៣, លោកស្រី ធឿន ចន្ទី លេខទូរស័ព្ទ ០១៧ ៩៨៩ ៨៦១, និងលោក ច័ន្ទ គាណារិទ្ធ លេខទូរស័ព្ទ ០៨៦ ៤៤៥ ៨៦៦។
នៅព្រឹកថ្ងៃទី ១៨ ខែមិថុនានេះ លោក ឈេង សុវណ្ណដា អភិបាលក្រុងខេមរភូមិន្ទបានដឹកនាំកិច្ចប្រជុំជាមួយលោក លោកស្រីអភិបាលរងក្រុង នាយករដ្ឋបាល ចៅសង្កាត់ មេប៉ុស្តិ៍រដ្ឋបាលមេភូមិផ្សព្វផ្សាយ ដើម្បីរៀបចំផែនការចាក់វ៉ាក់សាំងការពារជំងឺកូវីដ ១៩ ទូទាំងក្រុងខេមរភូមិន្ទនាថ្ងៃទី ២០ ខែមិថុនា ២០២១ ខាងមុខនេះផងដែរ៕