.jpg)
លោក វេង សាខុន រដ្ឋមន្ដ្រី ក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី ១៩ ខែមិថុនានេះបានឆ្លើយតបទៅមតិយោបល់ពីអ្នកវិភាគ និងសាធារណជនមួយចំនួន ចំពោះការរិះគន់លើវិស័យវារីវប្បកម្មរបស់កម្ពុជា។ រូបថត សហការី
ភ្នំពេញៈ លោក វេង សាខុន រដ្ឋមន្ដ្រី ក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី ១៩ ខែមិថុនានេះបានឆ្លើយតបទៅមតិយោបល់ពីអ្នកវិភាគ និងសាធារណជនមួយចំនួន ចំពោះការរិះគន់លើវិស័យវារីវប្បកម្មរបស់កម្ពុជាថា បកស្រាយខុសពីការពិត និងបានណែនាំឱ្យធ្វើការស្រាវជ្រាវពីរបត់នយោបាយ និងការធ្វើកំណែទម្រង់របស់រាជរដ្ឋាភិបាលលើអនុវិស័យជលផលកន្លងមកវិញ។
ការឆ្លើយតបរបស់លោក វេង សាខុន នេះក្រោយពីក្រសួងបានចេញសេចក្តីប្រកាសព័ត៌មានឆ្លើយតបនឹងចម្ងល់មួយចំនួនពាក់ព័ន្ធនឹងតម្រូវការ និងការផ្គត់ផ្គង់ត្រីនៅកម្ពុជាកាលពីថ្ងៃទី ១៤ ខែមិថុនា ដោយបានបង្ហាញពីបញ្ហាប្រឈមនឹងការខ្វះខាតក្នុងការផ្គត់ផ្គង់ និងតម្រូវការសម្រាប់ទីផ្សារកម្ពុជា។ ប៉ុន្ដែត្រូវបានអ្នកវិភាគ និងសាធារណជនមួយចំនួនបន្តការរិះគន់ចំពោះការលើកឡើងពីបញ្ហាកង្វះខាតត្រីនៅក្នុងទីផ្សារកម្ពុជានេះ។
លោក វេង សាខុន បានសរសេរលើហ្វេសប៊ុកថា ក្រោយពីក្រសួងកសិកម្ម បានចេញសេចក្តីប្រកាសព័ត៌មានកាលពីថ្ងៃទី ១៤ ខែមិថុនាឆ្នាំ ២០២១ រួចមក «ក្រសួងបានទទួលមតិយោបល់ពីអ្នកវិភាគ និងសាធារណជនមួយចំនួន ដោយបានបកស្រាយខុសពីការពិត ប្រាសចាកពីអ្វីដែលរាជរដ្ឋាភិបាលបាននិងកំពុងដាក់ចេញនូវនយោបាយកំណែទម្រង់ និងជំរុញអភិវឌ្ឍន៍វិស័យកសិកម្ម ដើម្បីធានាបានសន្តិសុខស្បៀង និងការនាំចេញក្នុងដំណាក់កាលដ៏លំបាកបណ្តាលមកពីការរីករាលដាលជំងឺកូវីដ១៩។
លោករដ្ឋមន្ដ្រីថ្លែងថា៖ «ក្នុងបរិការនេះខ្ញុំចង់ទាញអារម្មណ៍អ្នកវិភាគ និងសាធារណជន សូមមេត្តាស្រាវជ្រាវនូវអ្វីដែលជារបត់នយោបាយក្នុងការធ្វើកំណែទម្រង់របស់រាជរដ្ឋាភិបាលលើអនុវិស័យជលផលកន្លងមក ដែលបានចាប់ផ្តើមពីការអនុវត្តវិមជ្ឈការមុនឆ្នាំ ២០០៦ មកអនុវត្តការគ្រប់គ្រងវិស័យនេះ តាមបែបមជ្ឈការវិញក្រោយឆ្នាំ ២០០៦»។
លោកបានបន្តថា ដោយពិនិត្យឃើញនូវភាពចាំបាច់ប្រមុខរាជរដ្ឋាភិបាល បានសម្រេចធ្វើកំណែទម្រង់សាជាថ្មីម្តងទៀតក្នុងការធ្វើវិមជ្ឈការក្រោយឆ្នាំ ២០១៦ ដោយត្រូវប្រគល់សិទ្ធិអំណាចទៅថ្នាក់ក្រោមជាតិ ជាពិសេសប្រគល់សិទ្ធិអំណាចជូនទៅអភិបាលនៃគណៈអភិបាលរាជធានី-ខេត្តជាអ្នកគ្រប់គ្រង និងដឹកនាំបង្ក្រាបបទល្មើសជលផល និងព្រៃឈើដែលស្ថិតនៅក្នុងដែនដីរបស់ខ្លួន។ ការណ៍នេះទាមទារពេលវេលាក្នុងការកសាង និងពង្រឹងសមត្ថភាពបន្ថែមទៀតដែលក្នុងករណីនេះ គឺក្រសួងអាចអន្តរាគមន៍ លុះត្រាតែមានសំណូមពរចាំបាច់តែប៉ុណ្ណោះ។
លោក វេង សាខុន បានបន្តថា ការបាត់បង់ធនធានធម្មជាតិកន្លងមកមានហេតុផលជាច្រើន ដែលជាលក្ខណៈសត្យានុមត្តិ មិនមែនក្រសួងមិនបានធ្វើ និងដោះស្រាយនោះទេ។ លោកថា អ្វីៗបានផ្តើមចេញពីដំណើរនៃការរីកលូតលាស់នៃវិស័យសេដ្ឋកិច្ចជាតិ សង្គម កំណើនទីក្រុង និងប្រជាជន រួមនឹងការកកស្ទះដីល្បាប់តាមបណ្តាផ្លូវទឹក និងបណ្តាព្រែកនានា នៅតាមដងទន្លេជាដើម។
លោកបានលើកឡើងទាក់ទងនឹងការធ្វើវារីវប្បកម្មរបស់កម្ពុជានាពេលបច្ចុប្បន្ន គឺស្ថិតនៅរាយប៉ាយ ខ្វះទុន ខ្វះប្រភពទឹក។ ហើយការចិញ្ចឹម មិនបានដាក់ចេញនូវការចិញ្ចឹមជាលក្ខណៈបណ្តាក់តគ្នាបានល្អនោះទេ។ ការប្រមូលផលជួបការលំបាកត្រូវប្រើពេលយូរចេញពីខេត្តមួយទៅខេត្តមួយដែលត្រូវការពេលវេលាច្រើន ដើម្បីប្រមូលធ្វើការផ្គត់ផ្គង់ទីផ្សារ និងការដឹកជញ្ជូនមកកាន់ទីផ្សារចែកចាយ។
លោករដ្ឋមន្ដ្រីបញ្ជាក់ថា៖ «នៅមានបញ្ហាប្រឈមជាច្រើនទៀតដែលយើងបាន និងកំពុងពិនិត្យ និងដោះស្រាយជាលក្ខណៈអន្តរក្រសួងជាបណ្តើរ»។
លោកបានឱ្យដឹងថា ក្នុងនេះមានក្រសួង និងស្ថាបន ចំនួន ៧ ដែលមានការជាប់ទាក់ទងទៅនឹង ទី ១ គោលនយោបាយនៃការត្រួតពិនិត្យ និងការបង់ពន្ធនៃការនាំចូល។ ទី ២ ការគ្រប់គ្រងទីផ្សារ និងការធ្វើពាណិជ្ជកម្មក្នុង និងក្រៅស្រុក។ ទី ៣ ការគ្រប់គ្រងធនធានទឹក រួមទាំងព្រែក ស្ទឹង បឹងបួរ និងបឹងទន្លេសាប ហើយនឹងផ្គត់ផ្គង់ទឹកក្នុងការធ្វើវារីវប្បកម្ម។ ទី ៤ ការជួយគាំទ្រ និងការលើកទឹកចិត្តក្នុងការកែច្នៃផលិតផលជលផល និងចំណី ប្រកបដោយការប្រកួតប្រជែងជាមួយប្រទេសជិតខាង ទី ៥ ការផ្តល់ឥណទាន និងទី ៦ ការជួយគាំទ្រពីអាជ្ញាធរដែនដីដល់ការជួយគាំទ្រសកម្មភាពនានានៅនឹងមូលដ្ឋានផងដែរ។
បើតាមលោក វេង សាខុន បើទោះបីកម្ពុជាជួបបញ្ហាប្រឈមមួយចំនួនដែលនៅសេសសល់ទាក់ទងទៅនឹងការធ្វើវារីវប្បកម្ម និងបញ្ហាទីផ្សារយ៉ាងណាក៏ដោយ ក៏ការធ្វើវារីវប្បកម្មនៅកម្ពុជាក្នុងរយៈពេល ៥ ឆ្នាំចុងក្រោយនេះ (២០១៥-២០២០) បានប្រព្រឹត្តទៅទទួលបានវឌ្ឍនភាព ដោយមានសន្ទុះគួរឱ្យកត់សម្គាល់។
លោករដ្ឋមន្ដ្រីបានបង្ហាញទិន្នផលវារីវប្បកម្មប្រមូលប្រចាំឆ្នាំចាប់ពីឆ្នាំ ២០១៥ ទទួលបាន ១៤៣ ១៤១ តោន, ២០១៦ ទទួលបាន ១៧២ ៥០០ តោន, ២០១៧ ទទួលបាន ២០៧ ៤៤៣ តោន, ២០១៨ ទទួលបាន ២៥៤ ០៤៨ តោន, ២០១៩ ទទួលបាន ៣០៧ ៤០៨ តោន, (មានកំណើនទិន្នផលវារីវប្បកម្មប្រចាំឆ្នាំជាមធ្យម ២០,៦% ចាប់ពីឆ្នាំ ២០១៥-២០១៩) និងនៅឆ្នាំ ២០២០ កើនឡើងដល់ ៤០០ ៤០០ តោន មានកំណើន ៣០% ធៀបទៅនឹងឆ្នាំ ២០១៩។
លោករដ្ឋមន្ដ្រីបញ្ជាក់ថា៖ «កំណើនឡើងជាលំដាប់នៃទិន្នផលវារីវប្បកម្មនេះ ដោយសារតែមានការចាប់អារម្មណ៍ និងចូលរួមយ៉ាងសកម្មពីសំណាក់ក្រសួងពាក់ព័ន្ធ និងបងប្អូនវារីវប្បករកម្ពុជាយើង។ គួបផ្សំនឹងការជួយឧបត្ថម្ភគាំទ្រពីសំណាក់រាជរដ្ឋាភិបាលកម្ពុជា ទាំងបច្ចេកទេស និងទុនជាប្រាក់កម្ចី និងថវិកាពីដៃគូអភិវឌ្ឍន៍អន្តរជាតិនានាផងដែរចំពោះសកម្មភាពអភិវឌ្ឍន៍វារីវប្បកម្មនៅកម្ពុជា»។
លោកបន្ថែមថា ក្រសួងកសិកម្ម រុក្ខាប្រមាញ់ និងនេសាទបានរៀបចំនូវវិធានការគោលនយោបាយជំរុញវារីវប្បកម្មឆ្នាំ ២០២១-២០២៣ ក្នុងគោលបំណងបងើ្កនផលិតភាពវារីវប្បកម្មឱ្យមានការប្រកួតប្រជែង បរិយាប័ន្ន និងនិរន្តរភាព៕
វីដេអូ៖
