ភ្នំពេញៈ ក្រសួងសុខាភិបាលនៅព្រឹកថ្ងៃទី ១៩ ខែមិថុនានេះបានប្រកាសរកឃើញវីរុសកូវីដ ១៩ បម្លែងថ្មីប្រភេទ B.1.617-2 (Delta) ចំនួន ៧ ករណី លើអ្នកដំណើរចូលមកកម្ពុជា តាមច្រកព្រំដែនកម្ពុជា-ថៃ ហើយបានចូលទៅកាន់ខេត្ដចំនួន ។ នេះបើតាមសេចក្ដីប្រកាសព័ត៌មាន។
ក្រសួងសុខាភិបាលបានឱ្យដឹងថា ការរកឃើញវីរុសប្រភេទថ្មីប្រភេទ B.1.617-2 (Delta) ចំនួន ៧ ករណីនេះតាមរយៈលទ្ធផលនៃការធ្វើវិភាគដោយវិទ្យាស្ថានប៉ាស្ទ័រកម្ពុជា លើអ្នកដំណើរវិលត្រឡប់មកពីប្រទេសថៃ តាមច្រកព្រំដែនកម្ពុជា-ថៃកាលពីថ្ងៃទី ១៨ ខែមិថុនា ឆ្នាំ ២០២១។ បុគ្គលវិជ្ជមានកូវីដ ១៩ ប្រភេទថ្មីទាំងនេះ ក៏បានធ្វើដំណើរចូលទៅកាន់ខេត្ដចំនួន ៥ ទៀតផងដែរ។
ក្នុងនោះរួមមាន ខេត្តបន្ទាយមានជ័យ (ចំនួន ១ នាក់) ស្ត្រីជនជាតិខ្មែរ អាយុ ២៦ ឆ្នាំ មានទីលំនៅ នៅភូមិក្របៅ ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ។ ស្ត្រីរូបនេះជាពលករមកពីប្រទេសថៃ (ខេត្តឈុនបូរី) មុខរបរជាកម្មករសំណង់ (រយៈពេល ១ ឆ្នាំ) ត្រឡប់ចូលកម្ពុជាតាមច្រកព្រំដែនអូរបីជាន់កាលពីថ្ងៃទី ៧ ខែមិថុនា ឆ្នាំ២០២១។ បច្ចុប្បន្នស្ដ្រីរូបនេះ កំពុងសម្រាកព្យាបាលនៅមណ្ឌលសុខភាពប៉ោយប៉ែត១ ដោយដាក់ឲ្យនៅដាច់ដោយឡែកតែម្នាក់ឯង។
ខេត្តឧត្តរមានជ័យ (ចំនួន ២ នាក់) ក្នុងនោះរួមមានបុរសជនជាតិខ្មែរ អាយុ ៣៨ ឆ្នាំមានស្រុកកំណើតនៅភូមិមិម ឃុំដា ស្រុកចិត្របូរី ខេត្តក្រចេះ។ មុខរបរ ជាកម្មករសំណង់នៅក្រុមហ៊ុនមួយនៅក្រុងថេប (ប្រហែលជា ៧ ខែមកហើយ) ដែលតំបន់នោះមានអ្នកកើតជំងឺកូវីដ ១៩ ច្រើន។ បុរសរូបនេះ បានចូលមកកម្ពុជាតាមច្រកអូរស្មាច់នៅថ្ងៃទី ៨ ខែមិថុនា ឆ្នាំ ២០២១។ បច្ចុប្បន្នបុរសរូបនេះ កំពុងសម្រាកព្យាបាលនៅមន្ទីរពេទ្យបង្អែកខេត្តឧត្តរមានជ័យ។ ១ ករណីទៀតគឺបុរសជនជាតិខ្មែរ អាយុ ៣៨ ឆ្នាំមានស្រុកកំណើតនៅភូមិសង្កែ ឃុំស្នួល ស្រុកក្រឡាញ់ ខេត្តសៀមរាប។ មុខរបរជាកម្មករសំណង់ នៅក្រុមហ៊ុន នៅក្រុងថេប (ប្រហែលជា ៩ ខែមកហើយ) ដែលទីនោះមានអ្នកឆ្លងវីរុសកូវីដ ១៩ ច្រើន ហើយបានចូលមកកម្ពុជាកាលពីថ្ងៃទី ៦ ខែមិថុនា ឆ្នាំ ២០២១ តាមច្រកអូរស្មាច់។ បច្ចុប្បន្នបុរសរូបនេះកំពុងសម្រាកព្យាបាលនៅមន្ទីរពេទ្យបង្អែកខេត្តឧត្តរមានជ័យ។
ខេត្តសៀមរាប (ចំនួន ២ នាក់) ស្ត្រីជនជាតិខ្មែរ អាយុ ៤០ ឆ្នាំមានអាសយដ្ឋាននៅភូមិបុស្សធំ ឃុំរោងគោ ស្រុកក្រឡាញ់ ខេត្តសៀមរាប ជាពលករបានវិលត្រឡប់មកពីប្រទេសថៃ (ឈុនបូរី) តាមច្រកព្រំដែនកម្ពុជា-ថៃ មកដល់កម្ពុជានាថ្ងៃទី ៧ ខែមិថុនា ឆ្នាំ ២០២១ និង ស្ត្រីជនជាតិខ្មែរអាយុ ៣១ ឆ្នាំមានទីលំនៅនៅភូមិតាយិក ឃុំស្នូល ស្រុកក្រឡាញ់ ខេត្តសៀមរាបជាពលករ (នៅទីក្រុងបាងកក) បានវិលត្រឡប់ចូលមកកម្ពុជានៅថ្ងៃទី ៦ ខែមិថុនាឆ្នាំ ២០២១ តាមច្រកព្រំដែនកម្ពុជា-ថៃ។ ក្រសួងបញ្ជាក់ថា បច្ចុប្បន្នអ្នកជំងឺទាំង ២ នាក់ខាងលើកំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប។
ខេត្តកំពង់ចាម (ចំនួន ១ នាក់) បុរសជនជាតិខ្មែរ អាយុ ៤៧ ឆ្នាំមានអាសយដ្ឋាននៅភូមិរលាក ឃុំស្រុក ស្រុកកំពង់សៀមខេត្តកំពង់ចាម។ បុរសរូបនេះជាកម្មករសំណង់នៅក្រុងថេប ប្រទេសថៃបានចូលមកប្រទេសកម្ពុជា តាមច្រកអូរស្មាច់នៃខេត្តឧត្តមានជ័យកាលពីថ្ងៃទី ៥ ខែមិថុនា ឆ្នាំ ២០២១។ បច្ចុប្បន្នកំពុងសម្រាកព្យាបាលនៅមន្ទីរពេទ្យខេត្តកំពង់ចាម។
កំពត (ចំនួន ១ នាក់) ស្ត្រីជនជាតិខ្មែរ អាយុ ១៩ ឆ្នាំ មានទីលំនៅនៅក្រុងកំពត ខេត្តកំពត មកពីឈុនបូរី ប្រទេសថៃ ឆ្លងចូលមកកម្ពុជានៅថ្ងៃទី ៨ ខែមិថុនា ឆ្នាំ ២០២១ តាមច្រកព្រំដែនកម្ពុជា-ថៃ។ បច្ចុប្បន្នកំពុងសម្រាកព្យាបាលនៅក្នុងមន្ទីរពេទ្យបង្អែកខេត្តកំពតតាំងពីថ្ងៃទី ៩ ខែមិថុនាឆ្នាំ ២០២១។
ក្រសួងសុខាភិបាលបញ្ជាក់ថា៖ «យោងតាមលទ្ធផលខាងលើនេះសូមបងប្អូនប្រជាពលរដ្ឋទាំងអស់បន្តប្រុងប្រយ័ត្នខ្ពស់ និងអនុវត្តឱ្យបានខ្ជាប់ខ្ជួននូវវិធានការ ៣ការពារ និង ៣កុំ»។
«រីឯបុគ្គលដែលតម្រូវឱ្យធ្វើចត្តាឡីស័កត្រូវតែគោរពតាមគោលការណ៍ការធ្វើចត្តាឡីស័កឱ្យគ្រប់ចំនួន ១៤ ថ្ងៃ ដើម្បីទប់ស្កាត់ការចម្លងបន្តគ្នានៅក្នុងសហគមន៍ក្នុងទ្រង់ទ្រាយធំ។ មិនត្រូវមានការជួបជុំគ្នា ដើម្បីស៊ីផឹក ឬបង្កឱ្យមានការជួបជុំគ្នាច្រើនកុះករដូចជាពិធីភ្ជាប់ពាក្យ ឬពិធីបុណ្យទានអ្វីមួយ មិនត្រូវទៅកន្លែងដែលបិទជិតៗ ប្រើម៉ាស៊ីនត្រជាក់ច្រើនពេក បន្ទប់គ្មានខ្យល់ចេញចូល និងត្រូវកាត់បន្ថយការធ្វើដំណើរចល័ត ឬនៅផ្ទះ ប្រសិនបើមិនមានភារកិច្ចចាំបាច់ត្រូវចេញក្រៅ»។
ក្រសួងបន្តអំពាវនាវដល់ប្រជាពលរដ្ឋទាំងអស់ដែលមានអាយុចាប់ពី ១៨ ឆ្នាំឡើង នៅពេលដែលដល់វេនសូមចូលរួមចាក់វ៉ាក់សាំងការពារជំងឺកូវីដ ១៩ ឱ្យបានគ្រប់ៗគ្នា៕
វីដេអូ៖