.jpg)
វ៉ាក់សាំងការពារជំងឺកូវីដ ១៩ ស៊ីណូវ៉ាក់ ដែលជាការបញ្ជាទិញរបស់រាជរដ្ឋាភិបាលពីប្រទេសចិនចំនួន ១ លានដូសទៀត បានដឹកមកដល់កម្ពុជាហើយនៅព្រឹកនេះ។ ហេង ជីវ័ន
ភ្នំពេញៈ វ៉ាក់សាំងការពារជំងឺកូវីដ ១៩ ស៊ីណូវ៉ាក់ ដែលជាការបញ្ជាទិញរបស់រាជរដ្ឋាភិបាលពីប្រទេសចិនចំនួន ១ លានដូសទៀត បានដឹកមកដល់កម្ពុជាហើយនៅព្រឹកនេះ ខណៈវ៉ាក់សាំង ២ លានដូសទៀតនឹងមកដល់នាចុងខែមិថុនានេះ។ នេះបើតាម លោកស្រី យក់ សម្បត្តិ រដ្ឋលេខាធិការក្រសួងសុខាភិបាល។
លោកស្រី យក់ សម្បត្តិ បានថ្លែងប្រាប់អ្នកសារព័ត៌មានពេលទទួលវ៉ាក់សាំងកូវីដ ១៩ ស៊ីណូវ៉ាក់ ចំនួន ១ លានដូសដែលរាជរដ្ឋាភិបាលបញ្ជាទិញពីប្រទេសចិននាព្រឹកនេះនៅព្រលានយន្តហោះអន្តរជាតិភ្នំពេញថា ក្នុងខែមិថុនា ឆ្នាំ ២០២១ នេះរាជរដ្ឋាភិបាលនឹងទទួលវ៉ាក់សាំងពីក្រុមហ៊ុន ស៊ីណូវ៉ាក់ ចំនួន ២ លានដូសទៀត ដែលវ៉ាក់សាំងនេះនឹងមកដល់កម្ពុជានៅសប្ដាហ៍ចុងក្រោយនៃខែមិថុនានេះ។
លោកស្រីថ្លែងថា៖ «យើងនឹងទទួលវ៉ាក់សាំងចំនួន ៣ លានដូសទៀតនៅក្នុងខែកក្កដាខាងមុខ។ សម្ដេចតេជោប្រមុខរាជរាជរដ្ឋាភិបាលបានអនុញ្ញាតឱ្យគណៈកម្មការលទ្ធកម្ម ទិញវ៉ាក់សាំងចំនួន ៣ លានដូសទៀតនេះ ដែលយើងនឹងចុះហត្ថលេខាក្នុងពេលឆាប់ៗជាមួយក្រុមហ៊ុនស៊ីណូវ៉ាក់»។
លោកស្រី យក់ សម្បត្តិ អះអាងថា ទោះបីជាយ៉ាងណា រាជរដ្ឋាភិបាលនឹងសម្រេចឱ្យបានតាមគោលដៅចាក់វ៉ាក់សាំងដល់ប្រជាពលរដ្ឋដែលមានអាយុចាប់ពី ១៨ ឆ្នាំឡើងទៅតាមផែនការដែលគ្រោងទុកទូទាំងប្រទេស ព្រោះរាជរដ្ឋាភិបាលកំពុងធ្វើការផ្គត់ផ្គង់វ៉ាក់សាំងមកកម្ពុជាជាបន្តបន្ទាប់។
លោកស្រីបន្តអំពាវនាវដល់ប្រជាពលរដ្ឋនៅទូទាំងប្រទេស ដែលមានអាយុចាប់ពី ១៨ ឆ្នាំឡើងទៅ សូមទៅចាក់វ៉ាក់សាំងឱ្យបានគ្រប់ៗគ្នា ដើម្បីការពារ និងកាត់ផ្ដាច់ការឆ្លងរីករាលដាលជំងឺកូវីដ ១៩ នៅកម្ពុជា។
សរុបទាំងវ៉ាក់សាំង ១ លានដូសនេះទៀត កម្ពុជាទទួលបានវ៉ាក់សាំងជាង ៩ លានដូសហើយ សម្រាប់ចាក់ជូនប្រជាពលរដ្ឋនៅក្នុងប្រទេស។ វ៉ាក់សាំងកូវីដ ១៩ ដែលរដ្ឋាភិបាលទទួលបាននិងកំពុងចាក់ជូនប្រជាពលរដ្ឋនេះ គឺភាគច្រើនបំផុតជាវ៉ាក់សាំងជំនួយ និងការបញ្ជាទិញរបស់រដ្ឋាភិបាលពីប្រទេសចិន។
តាមការបញ្ជាក់របស់ក្រសួងសុខាភិបាល គិតត្រឹមយប់ថ្ងៃទី ១៨ ខែមិថុនានេះ ក្រសួងសុខាភិបាល និងក្រសួងការពារជាតិបានចាក់វ៉ាក់សាំងការពារកូវីដ ១៩ ជូនមន្ត្រីរាជការប្រជាពលរដ្ឋ និងកងកម្លាំងប្រដាប់អាវុធនៅទូទាំងប្រទេសសរុបចំនួន ៣ ២៥៧ ៨៥៧ នាក់ ជាលទ្ធផលចាក់វ៉ាក់សាំងគោលដៅ ១០ លាននាក់ គឺសម្រេចបាន ៣២,៥៨%៕
វីដេអូ៖
