.jpg)
ក្រសួងប្រកាសប្រឡងជ្រើសបេក្ខជនចូលក្របខ័ណ្ឌ បម្រើការក្នុងវិស័យសង្គមកិច្ចចំនួន ១៣៩ នាក់។ រូបថត ក្រសួងមុខងារសាធារណៈ
ភ្នំពេញ៖ តបតាមសំណើរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា គណៈកម្មការរៀបចំការប្រឡងនៃក្រសួងមុខងារសាធារណៈបានប្រកាសការប្រឡងជ្រើសរើស សិស្ស និស្សិត និងមន្ត្រីរាជការឱ្យចូលបម្រើការងារក្នុងក្របខ័ណ្ឌមន្រ្ដីក្រសួងសង្គមកិច្ចចំនួន ១៣៩ នាក់ សម្រាប់ឆ្នាំ ២០២១។
យោងតាមសេចក្ដីជូនដំណឹងរបស់ក្រសួងមុខងារសាធារណៈកាលពីថ្ងៃទី ១៦ ខែមិថុនានេះ បានឱ្យដឹងថា ការរៀបចំការប្រឡងដោយក្រសួងមុខងារសាធារណៈនេះ គឺតាមរយៈសំណើសុំបញ្ចូលការប្រឡងជ្រើសរើសក្របខ័ណ្ឌថ្មីឆ្នាំ ២០២១ របស់ក្រសួងសង្គមកិច្ច។
ក្រសួងមុខងារសាធារណៈបានឱ្យដឹងថា ការប្រឡងជ្រើសរើសសិស្ស និស្សិត និងមន្ត្រីរាជការចំនួន ១៣៩ នាក់ សម្រាប់ក្របខ័ណ្ឌក្រសួងសង្គមកិច្ចនេះ គឺប្រភេទក្របខ័ណ្ឌ ក, ខ,និង គ នៅតាមអង្គភាពមួយចំនួនដូចជា មជ្ឈមណ្ឌលយុវនីតិសម្បទា និងមជ្ឈមណ្ឌលថែទាំ និងស្ដារនីតិសម្បទាជនមានវិបល្លាសស្មារតី នៅស្រុកកណ្ដាលស្ទឹង ខេត្ដកណ្ដាល ៨១ នាក់។ មជ្ឈមណ្ឌលជាតិគាំពារមនុស្សចាស់នៅរាជធានីភ្នំពេញចំនួន ១៥ នាក់ និងមជ្ឈមណ្ឌលជាតិព្យាបាល និងស្ដារនីតិសម្បទាអ្នកញៀនគ្រឿងញៀនដោយស្ម័គ្រចិត្ដ និងផ្អែកលើសហគមន៍ ស្ថិតនៅស្រុកព្រៃនប់ ខេត្ដព្រះសីហនុចំនួន ៤៣ នាក់។
បើតាមសេចក្ដីជូនដំណឹង កាលបរិច្ឆេទទទួលពាក្យចាប់ពីថ្ងៃទី ២១ ខែ មិថុនា ឆ្នាំ ២០២១ និងកាលបរិច្ឆេទឈប់ទទួលពាក្យនៅថ្ងៃទី ២៨ ខែ កក្កដា ឆ្នាំ ២០២១ ជាកាលបរិច្ឆេទចុងក្រោយ។
ចំណែកទីកន្លែងទទួលពាក្យ និងដាក់ពាក្យសុំសិទ្ធិប្រឡង គឺដើម្បីចូលរួមទប់ស្កាត់ការរីករាលដាលនៃជំងឺកូវីដ ១៩ បេក្ខជនអាចទាញយកពាក្យសុំសិទ្ធិប្រឡងតាមរយៈគេហទំព័ររបស់ក្រសួងមុខងារសាធារណៈអាសយដ្ឋាន www.rmcs.gov.kh ឬតាមបណ្តាញសង្គមហ្វេសប៊ុករបស់ក្រសួងផ្ទាល់៕
