កំពង់ចាម៖ រដ្ឋបាលខេត្តកំពង់ចាម កំពុងស្រាវជ្រាវស្វែងរកអ្នកប៉ះពាល់ដោយផ្ទាល់ និងប្រយោលជាមួយអ្នកជំងឺកូវីដ ១៩ បន្ទាប់ពីរកឃើញអ្នកជំងឺកូវីដ ១៩ ចំនួន ៤៣ នាក់បន្ថែមទៀត ខណៈអ្នកជាសះស្បើយមានចំនួន ៧៩ នាក់ កាលពីម្សិលមិញ។
សេចក្តីប្រកាសព័ត៌មានរបស់រដ្ឋបាលខេត្តកំពង់ចាមនៅថ្ងៃទី ១៩ ខែមិថុនានេះ បានជម្រាបជូនដំណឹងប្រជាពលរដ្ឋរស់នៅក្រុងកំពង់ចាម ស្រុកកោះសូទិន ស្រុកស្ទឹងត្រង់ ស្រុកចំការលើ បងប្អូនកម្មករ-កម្មការិនីរោងចក្រនៅស្រុកបាធាយ ស្រុកកងមាស ស្រុកជើងព្រៃ ស្រុកព្រៃឈរ។ បងប្អូនប្រជាពលរដ្ឋរស់នៅក្នុងខេត្តកំពង់ចាម និងសាធារណជនទាំងអស់ អំពីការរកឃើញវិជ្ជមានកូវីដ ១៩ ចំនួន ៤៣ នាក់។
ក្នុងសេចក្តីប្រកាសសរសេរថា៖ «ករណីវិជ្ជមានកូវីដ ១៩ ចំនួន ៤៣ នាក់ ក្នុងនោះស្រុកបាធាយ ២ នាក់ ស្រុកកងមាស ១ នាក់ ស្រុកស្រីសន្ធរ ១ នាក់ ស្រុកកោះសូទិន ១ នាក់ ស្រុកស្ទឹងត្រង់ ១ នាក់ ក្រុងកំពង់ចាម ៦ នាក់ ស្រុកចំការលើ ៤ នាក់ ស្រុកជើងព្រៃ ៧ នាក់ ស្រុកព្រៃឈរ ១៦ នាក់ មកពីខេត្តកំពង់ធំ ១ នាក់ ខេត្តត្បូងឃ្មុំ ៣ នាក់»។
នៅថ្ងៃទី ១៨ ខែ មិថុនា ឆ្នាំ ២០២១ រដ្ឋបាលខេត្តកំពង់ចាម បានចាត់មន្ទីរសុខាភិបាលនៃរដ្ឋបាលខេត្តយកសំណាកលើកម្មករ-កម្មការិនី ពលករចំណាកស្រុក និងអ្នកសង្ស័យចំនួន ៥៩ នាក់ ទទួលបានលទ្ធផលតេស្តរហ័សវិជ្ជមានកូវីដ ១៩ ចំនួន ៤៣ នាក់។
មន្ទីរសុខាភិបាលនៃរដ្ឋបាលខេត្តបញ្ជូនអ្នកជំងឺទាំងនោះ មកសម្រាកព្យាបាលនៅមន្ទីរពេទ្យមេគង្គកំពង់ចាម និងកន្លែងព្យាបាលកម្រិតស្រាល នៅវិទ្យាល័យព្រះសីហនុ និងកំពុងបន្តស្រាវជ្រាវអ្នកប៉ះពាល់ដោយផ្ទាល់ និងប្រយោល ជាមួយនឹងអ្នកជំងឺកូវីដ ១៩ ទាំង ៤៣ នាក់នោះ។
តាមរយៈសេចក្តីប្រកាសព័ត៌មាន រដ្ឋបាលខេត្តកំពង់ចាម បានអំពាវនាវអ្នកពាក់ព័ន្ធ និងធ្លាប់ប្រាស្រ័យទំនាក់ទំនង និងអ្នកជំងឺខាងលើ សូមទៅពិនិត្យសុខភាព និងយកសំណាកនៅមន្ទីរពេទ្យបង្អែក ដែលស្ថិតនៅជិតផ្ទះ ឬត្រូវរាយការណ៍ជូនអាជ្ញាធរមូលដ្ឋានជាបន្ទាន់ តាមរយៈលេខទូរស័ព្ទ ០៧០ ៨២៨ ៧៨៨ និង ០១២ ៧៣៦ ៧៥៥ ក្នុងករណីមានបញ្ហាសុខភាពដូចជា ក្អកមានស្លេស ក្តៅខ្លួនលើស ៣៧ អង្សារពិបាកដកដង្ហើម និងឈឺកតិចតួច។
ដោយឡែក ករណីជាសះស្បើយក្នុងថ្ងៃទី ១៨ ខែមិថុនា មានចំនួន ៧៩ នាក់ (បូកយោងចំនួន ៩៧៧ នាក់) អ្នកកំពុងសម្រាកព្យាបាលចំនួន ៥០ នាក់។ អ្នកជំងឺទាំង ៧៩ នាក់ ត្រូវបានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានកូវីដ ១៩ ចំនួន ២ លើក និងត្រូវបានអនុញ្ញាតឲ្យចេញពីមន្ទីរពេទ្យមេគង្គកំពង់ចាម និងកន្លែងព្យាបាលកម្រិតស្រាលនៅវិទ្យាល័យព្រះសីហនុ។
ក្នុងសេចក្តីប្រកាសព័ត៌មានសរសេរថា «សូមពលរដ្ឋរស់នៅក្នុងខេត្តកំពង់ចាម ត្រូវអនុវត្តឲ្យបានខ្ជាប់ខ្ជួននូវវិធានការ ៣ កុំ ៣ ការពារ និងត្រូវកែប្រែទម្លាប់នៃការរស់នៅសម្របតាមបរិបទនៃជំងឺកូវីដ ១៩ ដោយត្រូវអនុវត្តយ៉ាងម៉ឺងម៉ាត់ នូវវិធានការអនាម័យ តាមការណែនាំរបស់ក្រសួងសុខាភិបាលប្រកបដោយស្មារតីទទួលខុសត្រូវខ្ពស់ ដើម្បីការពារក្រុមគ្រួសារ និងសមាគមន៍ចៀសផុតពីជំងឺមហាប្រល័យនេះ»៕