រតនគិរី៖ រដ្ឋបាលខេត្ដរតនគិរីកំពុងរឹតបន្តឹងការអនុវត្ដវិធានការសុខាភិបាលនៅភូមិសាស្រ្ដក្រុងបានលុង បន្ទាប់ពីមានករណីនាំចូលជំងឺកូវីដ ១៩ ជាង ៣០ ករណី ហើយបន្តឆ្លងរីករាលដាលនៅក្នុងសហគមន៍ចាប់ថ្ងៃទី ១៨-១៩ ខែមិថុនានេះ ចំនួន ៦១ ករណីបន្ថែមទៀត។ នេះបើតាមលោក ញ៉ែម សំអឿន អភិបាលរង និងជាអ្នកនាំពាក្យរដ្ឋបាលខេត្ដ។
លោក ញ៉ែម សំអឿន បានថ្លែងប្រាប់ ភ្នំពេញ ប៉ុស្ដិ៍ នៅថ្ងៃនេះថា ចាប់តាំងពីផ្ទុះការឆ្លងរីករាលដាលជំងឺកូវីដ ១៩ រហូតមក ខេត្ដរតនគិរី រកឃើញករណីឆ្លងចំនួន ៣៣ នាក់សុទ្ធជាករណីនាំចូលពីខេត្ដផ្សេងៗ និងពីប្រទេសថៃ។ ទើបរយៈពេល ២ ថ្ងៃ គឺនៅថ្ងៃទី ១៨-១៩ ខែមិថុនានេះ បានផ្ទុះករណីឆ្លងចូលដល់សហគមន៍ក្នុងភូមិសាស្រ្ដ ក្រុងបានលុង រកឃើញអ្នកឆ្លងសរុបចំនួន ៦១ ករណីហើយ។
លោកបានថ្លែងថា៖ «កន្លងមកយើងបានអនុវត្ដនូវវិធានការការពារទាក់ទងនឹងការទប់ស្កាត់ការឆ្លងរីករាលដាលជំងឺកូវីដ ១៩ តាមការណែនាំរបស់រាជរដ្ឋាភិបាល និងក្រសួងសុខាភិបាល។ ផ្លូវចូលខេត្ដសំខាន់ៗ គឺយើងបានដាក់ប៉ុស្ដិ៍ពិនិត្យសុខភាព។ ចំពោះអ្នកដែលបានធ្វើដំណើរពីខេត្ដផ្សេងចូលមក គឺយើងពិនិត្យសុខភាព វាស់កម្ដៅ និងសាកសួរព័ត៌មានពីពួកគាត់។ បើសិនជាពួកគាត់មកពីតំបន់ដែលប្រឈមហានិភ័យឆ្លងកូវីដ ១៩ ខ្លាំង យើងយកសំណាកពួកគាត់ទៅពិនិត្យ»។
លោក ញ៉ែម សំអឿន បានឱ្យដឹងថា ដើម្បីទប់ស្កាត់ឆ្លងរីករាលដាលនៅក្នុងសហគមន៍នៅថ្ងៃនេះ គណៈបញ្ជាការឯកភាពខេត្ដបានដឹកនាំកិច្ចប្រជុំ ដើម្បីរៀបចំផែនការទប់ស្កាត់ការឆ្លងរីករាលដាលបន្ត និងឈានទៅកំណត់តំបន់ដែលត្រូវបិទខ្ទប់ផងដែរ។
លោកបានឱ្យដឹងថា រដ្ឋបាលខេត្ដក៏ទទួលបានផែនការចាក់វ៉ាក់សាំងការពារជំងឺកូវីដ ១៩ ដល់ប្រជាពលរដ្ឋដែរ។ លោកបន្តថា នៅពេលរាជរដ្ឋាភិបាលទទួលបានវ៉ាក់សាំង និងផ្ដល់ដល់រដ្ឋបាលខេត្ដ ដើម្បីចាក់ជូនដល់ពលរដ្ឋក្នុងពេលឆាប់ៗ។
បើតាម លោក សំ អឿន រហូតដល់បច្ចុប្បន្ន ខេត្ដរតនគិរីទើបមានរកឃើញករណីឆ្លងសរុបទាំងករណីឆ្លងសហគមន៍ និងករណីនាំចូលសរុបជិត ១០០ ករណី និងមិនទាន់មានករណីស្លាប់ដោយសារជំងឺកូវីដ ១៩ ទេ៕
វីដេអូ៖