ភ្នំពេញ៖ រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ (គ.អ.ក.) លោក ម៉ម ប៊ុនហេង បានសម្រេចតែងតាំងលោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងលោក គឹម សន្ដិភាព រដ្ឋលេខាធិការក្រសួងយុត្តិធម៌ឲ្យធ្វើជាអ្នកនាំពាក្យ គ.អ.ក ដោយទទួលបន្ទុកលើការងារផ្សេងគ្នា។
យោងតាមសេចក្ដីសម្រេចដែលទើបចេញផ្សាយនៅថ្ងៃទី ១៩ ខែមិថុនានេះ លោក ម៉ម ប៊ុនហេង បានសម្រេចតែងតាំងលោកស្រី ឱ វណ្ណឌីន រដ្ឋលេខាធិការក្រសួងសុខាភិបាលឲ្យធ្វើជាអ្នកនាំពាក្យ គ.អ.ក ទទួលបន្ទុកព័ត៌មានពាក់ព័ន្ធនឹងវិស័យសុខាភិបាលក្នុងការប្រយុទ្ធនឹងជំងឺកូវីដ ១៩។
ចំណែក លោក គឹម សន្តិភាព រដ្ឋលេខាធិការក្រសួងយុត្តិធម៌វិញត្រូវបានលោក ម៉ម ប៊ុនហេង សម្រេចតែងតាំងឲ្យធ្វើជាអ្នកនាំពាក្យ គ.អ.ក. ទទួលបន្ទុកព័ត៌មានផ្សេងទៀត ដែលទាក់ទងនឹងការអនុវត្តវិធានការរដ្ឋបាល និងវិធានការច្បាប់ក្នុងការប្រយុទ្ធនឹងជំងឺកូវីដ ១៩ ព្រមទាំងព័ត៌មានទាក់ទងនឹងលទ្ធផលការងាររបស់គណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩។
គួរបញ្ជាក់ដែរថា ក្រៅពីតួនាទីថ្មីនេះ ទាំងលោក ស្រី ឱ វណ្ណឌីន ទាំងលោក គឹម សន្ដិភាព សុទ្ធតែមានតួនាទីផ្សេងនៅតាមក្រសួង និងស្ថាប័នរៀងៗខ្លួន ដោយលោកស្រី ឱ វណ្ណឌីន ក៏ជារដ្ឋលេខាធិការ និងជាអ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស ខណៈលោក គឹម សន្តិភាព ក៏ជារដ្ឋលេខាធិការ និងជាអ្នកនាំពាក្យក្រសួងយុត្តិធម៌ផងដែរ៕