ភ្នំពេញៈ ក្នុងថ្ងៃខួបគម្រប់៤៤ឆ្នាំ នៃដំណើរតស៊ូឆ្ពោះទៅរកការរំដោះជាតិនិងប្រជាជនកម្ពុជា ចេញពីការកាប់សម្លាប់របស់ខ្មែរក្រហម(២០ មិថុនា ១៩៧៧-២០ មិថុនា ២០២១) លោកនាយករដ្ឋមន្ត្រីហ៊ុន សែន ក្រៅពីរៀបរាប់ពីប្រវត្តិដ៏ឈឺចាប់ចំពោះការតស៊ូនេះ ក៏បានលើកឡើងនូវចម្ងល់ក្នុងចិត្តតាំងជាសំណួរជូនជនរួមជាតិដើម្បីជួយបកស្រាយ។
លោកនាយកដ្ឋមន្រ្ដីបានសរសេរនៅលើហ្វេសប៊ុករបស់លោកថាថ្ងៃទី២០ ខែមិថុនា គឺជាខួបលើកទី៤៤ឆ្នាំ នៃថ្ងៃដែលលោកបានសម្រេចចិត្ត ដោយការឈឺចាប់ យកជីវិតធ្វើដើមទុន ដើម្បីតស៊ូរំដោះប្រជាជនកម្ពុជាចេញពីរបបប្រល័យពូជសាសន៍ប៉ុល ពត។
លោកថ្លែងថា៖«ទោះបីពេលនេះខ្លួនខ្ញុំ និងប្រជាជនកម្ពុជាកំពុងទទួលបាននូវសេចក្តីសុខ តែខ្ញុំមិនដែលភ្លេចនូវទឹកភ្នែករាប់ម៉ឺន រាប់សែនដំណក់ នៅពេលដែលខ្ញុំឈានជើងចេញពីមាតុភូមិចោលប្រជាជនកម្ពុជា ដែលកំពុងរងគ្រោះ ពិសេសចាកចេញចោលភរិយាដ៏កម្សត់ដែលកំពុងមានផ្ទៃពោះ»។
លោកបានបន្តថា៖«ខ្ញុំអត់មានជម្រើសឲ្យល្អជាងនេះទេ ព្រោះយើងមិនអាចសុំការអាណិតពីពួក ប៉ុល ពត បានឡើយ។ ជម្រើសប្រកបដោយគ្រោះថ្នាក់និងទឹកភ្នែកនោះហើយដែលនាំមកនូវសេចក្តីសុខ និងការរីកចម្រើនរហូតសព្វថ្ងៃនេះ»។
លោកហ៊ុន សែន លើកឡើងថា លោកធ្លាប់បានរៀបរាប់ពីប្រវត្តិដ៏ឈឺចាប់នេះច្រើនដងហើយ តែមិនទាន់បានបញ្ចេញនូវចម្ងល់ក្នុងចិត្តទាក់ទងជាមួយប្រវត្តិនេះ។ លោកនាយករដ្ឋមន្ដ្រីបានតាំងជាសំណួរថា៖«ប្រសិនបើខ្ញុំមិនសម្រេចចិត្តដឹកនាំការតស៊ូដោយចាប់ផ្តើមពីថ្ងៃ២០ មិថុនា ១៩៧៧ទេ តើពេលនោះពួកប៉ុល ពត សម្លាប់ខ្ញុំនៅឯណា? ដោយវិធីណា?»។
សំណួរបន្ទាប់៖«តើមានអ្នកស្នេហាជាតិណាផ្សេងទៀតបង្កើតឡើងនូវកងកម្លាំងប្រដាប់អាវុធ សាមគ្គីសង្រ្គាះជាតិជំនួសខ្ញុំដែរឬទេ? តើដំណើរឆ្ពោះមករំដោះប្រទេសពីរបបប៉ុល ពត កើតមានឡើងបានដោយរបៀបណា? តើមានដំណោះស្រាយតាមរយៈការចរចា និងកិច្ចព្រមព្រៀងប៉ារីសឬទេ? និងចុងក្រោយតើមាននយោបាយ ឈ្នះ ឈ្នះ ដើម្បីបញ្ចប់សង្រ្គាមនាំមកនូវសន្តិភាព និងការអភិវឌ្ឍដូចសព្វថ្ងៃឬទេ»?
លោកហ៊ុន សែន បញ្ជាក់ថា៖«សំណួរសង្ខេបទាំងនេះ តែងបង្កប់ក្នុងខួរក្បាលខ្ញុំជានិច្ច ហើយខ្ញុំក៏មិនអាចឆ្លើយជាមួយសំណួរនេះដោយខ្លួនឯងបានដែរ ខ្ញុំទុកជូនបងប្អូនជនរួមជាតិមេត្តាជួយរកចម្លើយ»។
ថ្ងៃទី២០ ខែមិថុនា ឆ្នាំ២០២១នេះ គឺជាខួបគម្រប់៤៤ឆ្នាំ នៃដំណើរតស៊ូរបស់លោកហ៊ុន សែន និងយុទ្ធមិត្ត ដើម្បីរំដោះជាតិនិងប្រជាជនកម្ពុជាចេញពីការកាប់សម្លាប់របស់ខ្មែរក្រហម។
ថ្ងៃទី២០ ខែមិថុនា ឆ្នាំ២០២១នេះដែរ លោកទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជានិងលោកហ្វាន វ៉ាន់ហ្សាង រដ្ឋមន្ត្រីក្រសួងការពារប្រទេសរបស់វៀតណាមបានធ្វើជាអធិបតីភាពរួមគ្នាប្រារព្ធពិធីរំឭកខួបនៃដំណើរការតស៊ូនេះ ព្រមទាំងបញ្ចុះបឋមសិលាសាងសង់អគារមិត្តភាពកម្ពុជា-វៀតណាម និងសម្ពោធសមិទ្ធផលមួយចំនួនដែលបានសាងសង់នៅភូមិទន្លូង ឃុំកោះថ្ម ស្រុកមេមត់ ខេត្តត្បូងឃ្មុំដែលជាទីតាំងស្លាកស្នាមនៃតម្រាយផ្លូវលោកហ៊ុន សែននិងយុទ្ធមិត្តបានភៀសខ្លួនទាំងយប់ទៅកាន់វៀតណាមកាលពី៤៤ឆ្នាំមុន៕