ភ្នំពេញៈ គណៈកម្មការទន្លេមេគង្គ (MRC) ប្រកាសថា កម្ពស់ទឹកទន្លេមេគង្គនៅកម្ពុជាបានកើនឡើង ០.៦៥ម៉ែត្រចាប់ពីខេត្តស្ទឹងត្រែងដល់អ្នកលឿងខេត្តព្រៃវែងក្នុងរយៈពេល៧ថ្ងៃចុងក្រោយហើយបានព្យាករថានឹងកើនឡើង ០.៦០ ម៉ែត្រទៀតក្នុងរយៈពេល៥ថ្ងៃខាងមុខដោយសារមានភ្លៀងធ្លាក់ខ្លាំង។
លេខាធិការដ្ឋាន MRC បានបញ្ជាក់ក្នុងសេចក្តីប្រកាសព័ត៌មាន កាលពីថ្ងៃទី១៨ ខែមិថុនាថា កម្ពស់ទឹកក្នុងអាងទន្លេមេគង្គក្រោមបានកើនឡើងគួរឱ្យកត់សម្គាល់ក្នុងរយៈពេល ៧ថ្ងៃចុងក្រោយនេះ ប៉ុន្តែផ្នែកខ្លះនឹងធ្លាក់ចុះបន្តិចក្នុងរយៈពេល ៥ថ្ងៃខាងមុខ។
សេចក្តីប្រកាសព័ត៌មានបញ្ជាក់ថា៖«នៅក្នុងប្រទេសកម្ពុជា កម្ពស់ទឹក ដែលលាតសន្ធឹង ពីខេត្តស្ទឹងត្រែង ដល់អ្នកលឿងក្នុងខេត្តព្រៃវែងត្រូវបានរាយការណ៍ថាបានកើនឡើង ០,៦៥ម៉ែត្រក្នុងរយៈពេលដូចគ្នា។ ក្នុងរយៈពេល ៥ថ្ងៃខាងមុខទៀត កម្ពស់ទឹកត្រូវបានព្យាករថានឹងកើនឡើង០,៦០ម៉ែត្រទៀត»។
MRC បានបញ្ជាក់ថា ភ្លៀងធ្លាក់ខ្លាំងពាសពេញតំបន់ទន្លេមេគង្គ ដែលបានចាប់ផ្តើមនៅដើមខែមិថុនានេះបានរួមចំណែកដល់ការកើនឡើងទឹកភ្លៀងនេះ រួមជាមួយនឹងកម្រិតទឹកទន្លេនៅតាមស្ថានីយជលសាស្ត្រដែលបានកត់ត្រាទុក។
លោក Lam Hong Son ប្រធានមជ្ឈមណ្ឌលគ្រប់គ្រងគ្រោះទឹកជំនន់និងគ្រោះរាំងស្ងួតប្រចាំតំបន់នៃលេខាធិការដ្ឋាន MRC បានថ្លែងថា៖«តំបន់មេគង្គនេះទទួលបានទឹកភ្លៀងប្រមាណ៦០ភាគរយច្រើនជាងមធ្យមក្នុងខែនេះបើប្រៀបធៀបនឹងរយៈពេលដូចគ្នាក្នុងឆ្នាំ២០១៩ និងឆ្នាំ ២០២០។ ទឹកភ្លៀងនឹងទាបជាងមធ្យមក្នុងខែកក្កដានិងប្រហែលកម្រិតមធ្យមនៅខែសីហា និងកញ្ញា»។
MRC បញ្ជាក់ថា MRC នឹងបន្តតាមដានកម្រិតទឹកនៅទូទាំងតំបន់ទន្លេមេគង្គស្របពេលស្ថានភាពអាកាសធាតុខុសប្រក្រតី។
លោកសូ សុភ័ទ្ទ អគ្គលេខាធិការគណៈកម្មាធិការជាតិទន្លេមេគង្គកម្ពុជា និងលោក ចាន់ យុត្ថា អ្នកនាំពាក្យក្រសួងធនធានទឹក និងឧត្តុនិយម មិនអាចទាក់ទងដើម្បីសុំការបញ្ជាក់បានទេកាលពីថ្ងៃទី២០ ខែមិថុនា។
សេចក្តីប្រកាសរបស់ក្រសួងធនធានទឹកឱ្យដឹងថា កម្ពស់ទឹកពិនិត្យឃើញនៅត្រឹមម៉ោង ៧ ព្រឹកថ្ងៃទី ២០ មិថុនា នៅស្ថានីយជលសាស្ត្រទន្លេមេគង្គ-ស្ទឹងត្រែងមានកម្ពស់៥.១៣ម៉ែត្រ ខណៈកម្ពស់ទឹកដែលត្រូវប្រុងប្រយ័ត្នគឺ ១០.៧០ ម៉ែត្រ។ ក្រសួងបានព្យាករថា នៅថ្ងៃទី២១ ខែមិថុនា នេះកម្ពស់ទឹកនៅស្ថានីយនេះនឹងធ្លាក់ចុះមកនៅ ៥ម៉ែត្រ នៅថ្ងៃទី២២ ខែមិថុនា នឹងចុះមក៤.៨៤ម៉ែត្រ ហើយនៅថ្ងៃទី២៣ ខែមិថុនា នឹងធ្លាក់ចុះមកនៅ ៤.៧២ ម៉ែត្រ។
យោងតាមសេចក្តីប្រកាសដដែល កម្ពស់ទឹកពិនិត្យឃើញនៅត្រឹមម៉ោង៧ព្រឹកថ្ងៃទី២០ ខែមិថុនា នៅស្ថានីយជលសាស្ត្រទន្លេមេគង្គ-អ្នកលឿងមានកម្ពស់២.៤៤ម៉ែត្រ ខណៈកម្ពស់ទឹកដែលត្រូវប្រុងប្រយ័ត្នគឺ៧.៥០ម៉ែត្រ។ ក្រសួងបានព្យាករថា នៅថ្ងៃទី២១ ខែមិថុនានេះកម្ពស់ទឹកនៅស្ថានីយនេះនឹងឡើងដល់២.៥១ម៉ែត្រ នៅថ្ងៃទី២២ ខែមិថុនា នឹងឡើងដល់២.៥៤ម៉ែត្រ ហើយនៅថ្ងៃទី២៣ ខែមិថុនា នឹងធ្លាក់ចុះមកនៅ២.៤៧ម៉ែត្រ។
យោងតាមសេចក្តីជូនដំណឹងរបស់ក្រសួងធនធានទឹក ចាប់ពីថ្ងៃទី១៦ ដល់ ថ្ងៃទី២២ ខែមិថុនា ប្រទេសកម្ពុជាទទួលឥទ្ធិពលខ្យល់មូសុងនិរតីក្នុងកម្រិតពីមធ្យមទៅបង្គួរគួបផ្សំនឹងប្រព័ន្ធសម្ពាធទាបនៅភាគខាងលើ ដែលធ្វើឱ្យខេត្តនៅតំបន់វាលទំនាបកណ្តាលនឹងមានភ្លៀងធ្លាក់ក្នុងកម្រិតពីតិចទៅបង្កួរ ហើយផ្គរ រន្ទះ និងខ្យល់កន្ទ្រាក់ (thunderstorm) ក៏កើតមានផងដែរ។
សេចក្តីជូនដំណឹងបញ្ជាក់ថា ការទទួលឥទ្ធិពលនេះក៏ធ្វើឱ្យខេត្តដែលនៅជាប់នឹងជួរភ្នំដងរែក និងខ្ពង់រាបឦសាននឹងមានភ្លៀងធ្លាក់ក្នុងកម្រិតពីមធ្យមទៅបង្គួរ ពិសេសនៅភាគឦសាន ភាគខាងជើងនៃជួរភ្នំដងរែក។ បាតុភូតផ្គរ រន្ទះ និងខ្យល់កន្ត្រាក់(Thunderstorm)ក៏កើតមានដែរ៕
វីដេអូ៖